އިނގުރައިދޫއަށް އެއްވަނަ، ހިންނަވަރު ސެމީއަށް

މިހާރު ކުރިއަށްދާ އެފްއޭއެމް ފުޓްސަލް ޒޯން ޗެމްޕިއަންޝިޕުގެ ނޯތު ޒޯން 2 ގެ އެއްވަނަ ޓީމުގެ ގޮތުގައި ރ. އިނގުރައިދޫން ސެމީއަށް ދަތުރުކުރިއިރު، ބ. ތުޅާދޫ ބަލިކޮށް ޅ. ހިންނަވަރުން ސެމީ ފައިނަލުގެ ޖާގަ ކަށަވަރުކޮށްފިއެވެ.

އިނގުރައިދޫއިން ގުރޫޕްގެ އެއްވަނަ ހޯދީ ގުރޫޕް ސްޓޭޖުގެ ފަހު މެޗުގައި ނ. މަނަދޫގެ 6-3 ގެ ނަތީޖާއަކުން ކުރިހޯދައިގެންނެވެ.

މި މެޗުގެ ހަވަނަ މިނިޓްގައި އިނގުރައިދޫން ވަނީ ލަނޑު ޖަހައި ލީޑު ނަގައިފައެވެ. މި ގޯލު އެ ޓީމަށް ޖަހައިދިނީ މުހައްމަދު ޖުމާން އެވެ. އޭގެ ތިން މިނިތް ފަހުން އިނގުރައިދޫގެ ބިދޭސީ ކުޅުންތެރިޔާ އުލާން ވަނީ ގޯލު ޖަހައި އެ ޓީމުގެ ލީޑު ފުޅާކޮށްފައެވެ. އަދި މިނިޓެއް ފަހުން އިނގުރައިދޫގެ ތަރި އަލީ ހާފިޒް އެ ޓީމުގެ ތިންވަނަ ލަނޑު ޖެހިއެވެ.

ދެވަނަ ހާފު ފަށައިގެން މިނިޓެއްގެ ތެރޭގައި މަނަދޫގެ މުހައްމަދު ޝަދުވާން ޖައުފަރު ވަނީ ގޯލު ޖަހައި ފަރަގު ކުޑަކޮށްފައެވެ. އެކަމަކު އޭގެ ފަސް މިނިޓު ފަހުން އިނގުރައިދޫގެ އަހުމަދު މަޝީދު ވަނީ އިނގުރައިދޫގެ ހަތަރުވަނަ ގޯލު ޖަހައިފައެވެ. އަދި މެޗުގެ 31 ވަނަ މިނިޓުގައި އުލާން އިނގުރައިދޫގެ ފަސްވަނަ ލަނޑު ކާމިޔާބުކޮށްދިންއިރު، އިނގުރައިދޫން ޖެހި ފަހު ލަނޑަކީ މަނަދޫގެ ރައުފަތު އަބޫބަކުރު އަތުން ބައިކޮޅަށް ވަން ލަނޑެކެވެ. މަނަދޫގެ ފަހު ދެ ގޯލު އެ ޓީމަށް ޖަހައިދިނީ މުހައްމަދު އިޔާން ހަސަން އާއި، އަބްދުﷲ އިޝާންއެވެ.

މި ގްރޫޕްގެ ދެވަނަ ހިންނަވަރުން ޔަގީންކުރީ ތުޅާދޫގެ މައްޗަށް 3-2 ގެ ނަތީޖާއަކުން ކުރިހޯދައިގެންނެވެ.

މި މެޗުގެ ފުރަތަމަ މިނިޓު ތެރޭގައި ހިންނަވަރުގެ އިބްރާހީމް ސިމާހް ގޯލު ޖަހައި ލީޑު ނެގިއެވެ. އެކަމަކު މެޗުގެ 12 ވަނަ މިނިޓްގައި ތުޅާދޫގެ ހައްޔާން ހަސަން ހުސެއިން ވަނީ ގޯލު ޖަހައި ނަތީޖާ ހަމަހަމަ ކޮށްފައެވެ. އޭގެ މިނިޓެއް ފަހުން ހިންނަވަރުގެ އަބުލްފަޒިލް ވަނީ ލަނޑު ޖަހައި އަލުން ލީޑު ނަގައިފައެވެ.

އެކަމަކު ފުރަތަމަ ހާފު ނިމުމުގެ ކުރިން ތުޅާދޫގެ ހައްޔާން ވަނީ އިތުރު ގޯލެއް ޖަހައި ނަތީޖާ ހަމަހަމަ ކޮށްފައެވެ. މެޗުން ހިންނަވަރު މޮޅުކޮށްދިން ގޯލު އެ ޓީމަށް ޖަހައިދިނީ ވެސް އަބުލްފަޒިލްއެވެ.