އިއާދަކުރަނިވި ހަކަތައިގެ ދާއިރާއިން ހިންގާ މަޝްރޫޢުގެ ދަށުން 60 މެގަވޯޓުގެ ސޯލާ ހަރުކުރުމަށް ބޭނުންވާ ފައިސާ ހަމަޖެހިފައިވާކަމަށް އެންވަޔަރަމަންޓް މިނިސްޓްރީން ވިދާޅުވެއްޖެއެވެ.
ސަރުކާރުގެ އެންމެ ބޮޑު އެއް އަމާޒަކީ ރާއްޖޭގައި ހަކަތައިގެ ދާއިރާ، އިޢާދަކުރަނިވި ހަކަތައަށް ހެދުމަށާއި، 2030 ވަނަ އަހަރު އަންނައިރު، ދިވެހިރާއްޖެއަކީ ކާބަން ނިއުޓްރަލް ޤައުމަކަށް ހެދުމަށެވެ. މިގޮތުން ސަރުކާރުގެ ހަކަތައިގެ ސިޔާސަތުތަކުގެ ތެރެއިން އެންމެ އިސްކަންދޭ ސިޔާސަތަކީ، ފޮސިލްފިއުލްއަށް ބަރޯސާވުން ކުޑަކޮށް އަވިންނާއި ވައިން ހަކަތަ އުފެއްދުމަށެވެ.
މިގޮތުން މިސަރުކާރުގެ ފާއިތުވި 3 އަހަރުގެ ތެރޭގައި ވަނީ، 20 މެގަވޮޓްގެ ކަރަންޓް ސޯލާ ހަކަތައިން އުފައްދަން ފަށާފައެވެ. މިއާއެކު މިހާރު ރާއްޖޭގައި 36.5 މެގަވޮޓްގެ ކަރަންޓް އުފައްދަނީ، ސޯލާ ޕެނަލްތަކުންނެވެ. އަދި 9.3 މިލިޔަން ލީޓަރުގެ ތެޔޮ ވަނީ ސަލާމަތްކޮށްފައެވެ.
ޕީއެސްއެމްނިއުސްގެ ރާއްޖެ މިިއަދު ޕްރޮގްރާމްގައި ވާހަކަ ދައްކަވަމުން، އެންވަޔަރަމަންޓް މިނިސްޓްރީގެ ޑިރެކްޓަރ ޖެނެރަލް، އަޙްމަދު ޢަލީ ވިދާޅުވީ ރާއްޖޭގައި ދުވާލުގަޑިގައި ބޭނުންކުރާ ކަރަންޓަކީ އިޔާދަކުރަނިވި ހަކައިތައިން ބޭނުން ކުރާ ކަރަންޓަށް ހެދުމަށް ކުރަމުން އަންނަ މަސައްކަތުގެ ދަށުން އޭޑީބީގެ އެހީގައި 20 މެގަވޮޓުގެ ސޯލަރަ ހަރުކުރުމަށް ތައއްޔާރުވަމުން އަންނަކަމަށެވެ. އެގޮތުން މިކަމަށް ބޭނުންވާ ފައިސާ ހަމަޖެހިފައިވާކަމަށާއި، އެކަން ކޮށްދޭނެ ބަޔަކު ހޯދުމަށް އިޢުލާން ކުރުމަށް ތައްޔާރުވަމުން އަންނަކަމަށް އަޙްމަދު އަލީ ވިދާޅުވިއެވެ.
މީގެ އިތުރަށް ސޯލަރ ޕެނަލްތައް ހަރުކުރާ ރަށްރަށުގައި އެކަމުގެ ގްރިޑްތައް އަޕްގްރޭޑް ކުރުމަށާއި، ބެޓެރީ ސްޓޯރޭޖް ސިސްޓަމްތައް ޤާއިމްކުރުމަށް ބޭނުންވާ ފައިސާވެސް ހަމަޖެހިފައިވާކަން އޭނާ ފާހަގަކުރެއްވިއެވެ. އަޙްމަދު އަލީ ވިދާޅުވީ ވޭތުވެދިޔަ 3 އަހަރެއްހާ ދުވަހުގެ ތެރޭގައި ކުރެވުނު މަސައްކަތުގެ ދަށުން 60 މެގަވޮޓުގެ ސޯލަރ ހަރުކުރުމަށް ބޭނުންވާ ފައިސާ މިހާރު ހަމަޖެހިފައިވަކަމަށެވެ.
"ތެލުގެ ސަބްސިޑީއަށް ކުރާ ޚަރަދު ކުޑަކުރުމަށްޓަކައި މިމަސައްކަތް ކުރަނީ. ރާއްޖެއަށް ތެޔޮ އެތެރެކުރުމަށް ކުރާ ޚަރަދުތައް ކުޑަކޮށް ރާއްޖެއިން ލިބެން ހުރި ވަޞީލަތްތަކާއެކު ކަރަންޓު ފޯރުކޮށްދިނުމުން ފައިދާވާނެކަމަށް މި ބަލަނީ." އަޙްމަދު އަލީ ވިދާޅުވިއެވެ.
ސަރުކާރުން ދަނީ ރާއްޖޭގައި އިއާދަކުރަނިވި ހަކަތަ ބޭނުންކުރާ މިންވަރު އިތުރުކުރުމަށް، ބިޔަ މަޝްރޫޢުތަކެއް ފެށުމަށް ތައްޔާރުވަމުންނެވެ. މީގެތެރެއިން ފާހަގަކޮށްލެވޭ އެއް މަޝްރޫޢަކީ ރާއްޖޭގެ 6 ސަރަހައްދެއްގައި 11 މެގަވޯޓު ސޯލާ ޕެނަލް ހަރުކުރުމުގެ މަޝްރޫޢެވެ.
މި މަޝްރޫޢު ވެގެންދާނީ މިހާތަނަށް ރާއްޖޭގައި ހިންގާ އިއާދަކުރަނިވި ހަކަތައިގެ އެންމެބޮޑު މަޝްރޫޢަށެވެ. މި މަޝްރޫޢުގެ ސަބަބުން ތެލަށް ކުރާ ޚަރަދާއި ޖައްވަށް ދޫކުރާ ވިހަ ގޭހުގެ މިންވަރު ކުޑަކުރެވޭނެކަމަށް ސަރުކާރުން ވިދާޅުވެއެވެ.
ރަށްރަށުގައި ކަރަންޓު ފޯރުކޮށްދިނުމަށް ތެލަށް ބަރޯސާވާ މިންވަރު ކުޑަކުރުމުގެގޮތުން އިއާދަކުރަނިވި ހަކަތައިގެ ވަޞީލަތްތައް ރާއްޖޭގައި ބޭނުންކުރަން ފަށާފައިވަނީ 2007ވަނަ އަހަރުގެ ތެރޭގައެވެ. އޭރު އިއާދަކުރަނިވި ހަކަތަ ބޭނުންކުރެވޭ ނިސްބަތް ރާއްޖޭގައި ހުރީ އެންމެ 0.07 މެގަވޮޓްގައެވެ. ނަމަވެސް ސޯލާ ޕޭނަލް ހަރުކުރުމުގެ މަސައްކަތްތައް ފުޅާކުރެވި، ފާއިތުވި 14 އަހަރުގެ ތެރޭގައި މިހާތަނަށް 36.5 މެގަވޮޓްގެ އިއާދަކުރަނިވި ހަކަތަ ރާއްޖޭގައިވަނީ ޤާއިމުކޮށްފައެވެ.