އިންފްލޭޝަން ކޮންޓްރޯލު ކުރުމަށް ހަނޑުލާއި އެނޫންވެސް އިމްޕޯޓު ކުރާ މުދަލުން އަންނަ އަހަރު ނިމެންދެން ޓެރިފް ކަނޑާލަން ފިލިޕީންސްގެ ރައީސް ފަރޑިނަންޑް މާކޯސް ޖޫނިއާ ނިންމަވައިފިއެވެ.
2021 ވަނަ އަހަރު ފިލިޕީންސްއިން ފާސްކުރި މޮޑިފައިޑް ރޭޓްތަކުގެ މުއްދަތު މި އަހަރު ނިމޭއިރު ހަމަވާނެއެވެ. ނަމަވެސް ވޭތުވެދިޔަ 14 އަހަރު ދުވަހުވެސް ނުދާހާ މައްޗަށް ފިލިޕީންސްގެ އިންފްލޭޝަން ދިއުމުގެ ސަބަބުން އަންނަ އަހަރުގެ ޑިސެމްބަރު 31 ވަނަ ދުވަހާއި ހަމައަށް ޓެރިފް މަދުކުރާ މުއްދަތު އިތުރު ކުރަން ވަނީ ޖެހިފައެވެ.
މިގޮތަށް ޓެރިފް ކަނޑާލުމުން އިމްޕޯޓް ކުރާ ހަނޑުލުގެ ޓެރިފް ރޭޓް ހުންނާނީ 35 އިންސައްތައިގައެވެ. ކާށީގެ އިމްޕޯޓް ލެވީ %5 އާއި %15 އާއި ދެމެދުގެ މިންވަރެއްގައި އޮންނާނެކަމަށް ޕިލިޕީންސްގެ ރައީސްގެ އޮފީހުން ބުނެއެވެ.
ކަރަންޓް އުފެއްދުމަށް މުހިއްމު އެއް މާއްދާއެއް ކަމަށްވާ ކޯލް އިމްޕޯޓްގެ ޓެރިފް އަންނަ އަހަރު ނިމޭއިރުވެސް އޮންނާނީ ސުމެއްގައި ކަމަށާއި ނަމަވެސް ގަވާއިދުން މުރާޖައާ ކުރާނެ ކަމަށް އެ އޮފީހުން ބުނެއެވެ.
މި ސިޔާސަތުގެ ސަބަބުން އެތެރޭގެ ކާބޯތަކެތީގެ ސަޕްލައި އިތުރުކޮށް ކޮންމެ ދުވަހަކު ކާ ކާބޯތަކެތި ލިބޭނެ އިތުރު ގޮތްތައް ހޯދައި، އިންފްލޭޝަން ޕްރެޝަރު ކުޑަ ކުރެވޭނެކަމަށް އިކޮނޮމިކް ޕްލޭނިން ސެކްރެޓަރީ އާސެނިއޯ ބަލިސާކަން ވިދާޅުވީއެވެ.
ނޮވެމްބަރު މަހު %8.0 އަށް އަރާފައިވާ ކޮންސިއުމަރ ޕްރައިސް އިންފްލޭޝަންއަކީ މި އަހަރާއި ކުރިއަށް އޮތް ދެ އަހަރަށް ފިލިޕީންސްގެ މަރުކަޒީ ބޭންކުން ކަނޑައަޅާފައިވާ ޓާގެޓް ރޭންޖް ކަމަށްވާ، %2 އާއި %4 އަށް ވުރެ މާ ބޮޑު އަދަދެކެވެ.
އިންފްލޭޝަން މަތިވުމުގެ ސަބަބުން ބެންކޯ ސެންޓްރަލް އެންޖީ ފިލިޕީންސް، ބީއެސްޕީއިން މިއަހަރު ވަނީ 7 ފަހަރު އިންޓަރެސްޓް ރޭޓް މަތިކޮށްފައެވެ. އަދި ބޭންކުގެ އަމާޒަށް ވާސިލުވުމަށް އަންނަ އަހަރުވެސް އިންޓެރެސްޓު ރޭޓު ހަރުކަށި ކުރަން ޖެހިދާނެކަމުގެ އިޝާރާތެއް އެ ބޭންކުން ދަނީ ދީފައެވެ.