މެދުތެރޭ އެމެރިކާގެ ޤައުމެއް ކަމުގައިވާ ޕެނަމާގައި ދެ ބަސް ޖެހި ހިނގި ނުރައްކާތެރި އެކްސިޑެންޓެއްގައި 39 މީހުން މަރުވެއްޖެއެވެ. މި ހާދިސާ ހިނގާފައި ވަނީ ޕެނަމާއާއި ކޮސްޓަ ރީކާ ގުޅޭ ސަރަޙައްދީ ރޮނގު ކައިރީގައި އޮންނަ ރަށެއް ކަމުގައިވާ ގުއާލަކާގައެވެ. މި ހާދިސާގައި މަރުވެފައި ވަނީ، ލިޔެކިޔުންތައް ނެތި އެމެރިކާއަށް ހިޖުރަކުރަން މަސައްކަތްކުރި ބަޔެއް ކަމުގައި ޕެނަމާގެ އޮފިޝަލުން ވިދާޅުވެއެވެ.
އެ މީހުން ގޮވައިގެން ދަތުރުކުރި ބަހުގައި 66 މީހުން ތިބި ކަމަށާއި، މި ހާދިސާގައި ގިނަ ޢަދަދެއްގެ ބަޔަކަށް އަނިޔާވެ، ފަރުވާދެމުންދާ ކަމުގައި ޕެނަމާގެ މައިގްރޭޝަންއާ ބެހޭ ޤައުމީ އިދާރާއިން ބުންޏެވެ. އެ ބަސް، އެހެން މިނީ ބަހެއްގައި ޖެހުނީ ވެރިރަށް ޕެނަމާ ސިޓީއާ 400 ކިލޯމީޓަރު ދުރުންނެވެ.
ބަހުގައި ތިބި މީހުންނަކީ ކޮން ޤައުމަކަށް ނިސްބަތްވާ ބައެއް ކަން އަދި ސާފެއް ނޫނެވެ. ނަމަވެސް، އެ މީހުން ޕެނަމާއަށް އެތެރެވެފައި ވަނީ މެދުތެރޭ އެމެރިކާ ބައްރުގައި އޮންނަ ޖަންގަލި ބޯ ސަރަޙައްދެއް ކަމުގައިވާ "ޑާރިޔަން ގެޕް" ހުރަސްކުރުމަށް ފަހުއެވެ. މިއީ، ޤަވާޢިދާ ޚިލާފަށް ލިޔެކިޔުންތައް ނެތި އެމެރިކާއަށް ހިޖުރަކުން މަސައްކަތްކުރާ މީހުން ޢާންމުކޮށް ބޭނުންކުރާ މަގެކެވެ. ޕެނަމާއިން އެ މީހުން ދެން ދަތުރުކުރަނީ، މެކްސިކޯއަށެވެ.
މި ބަސް އެކްސިޑެންޓަކީ ވަރަށް ހިތާމަވެރި ހާދިސާއެއްގެ ގޮތުގައި ސިފަ ކުރައްވާ، ޕެނަމާގެ ރައީސް ލޯރެންޓީނޯ ކޯރްޓީޒޯ ވަނީ، އަނިޔާވި މީހުންނަށް ފަރުވާދިނުމަށް އޮފިޝަލުން މަސައްކަތް ކުރަމުންދާ ކަމުގައި ވިދާޅުވެފައެވެ. މި އެކްސިޑެންޓުގައި އަނިޔާވި މީހުންގެ ތެރޭގައި ފަސް ކުޑަކުދިން ހިމެނޭ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ބުނެއެވެ.
ޑާރިޔަން ގެޕްއަކީ ނުރައްކާތެރި ޖަންގައްޔެއް ނަމަވެސް، އެ ޖަންގަލި ހުރަސްކޮށް ކޮންމެ އަހަރަކު ވެސް އެތަކެއް ހާސް ބަޔަކު އެމެރިކާއަށް ހިޖުރަކުން މަސައްކަތް ކުރެއެވެ. އެ ޖަންގައްޔަކީ މިނިކާ ޖަނަވާރާއި، ޗަކަ ބިންތައް ގިނަ، އަދި ހަތިޔާރުއެޅި ނުރައްކާތެރި ގުރޫޕުތައް ހަރަކާތްތެރިވާ ސަރަޙައްދެކެވެ. ހުސްވި 2022 ވަނަ އަހަރު، އެ ޖަންގަލި ހުރަސްކޮށް ދަތުރުކުރަން މަސައްކަތްކުރި 60 އަށްވުރެ ގިނަ މީހުން މަރުވެފައިވާ ކަމަށް ޕެނަމާގެ އޮފިޝަލުން ވިދާޅުވެއެވެ. އޭގެ ކުރީ އަހަރު 50 މީހުން ވަނީ މަރުވެފައެވެ.
ނަމަވެސް، ހުސްވި 2022 ވަނަ އަހަރު އެކަނިވެސް އެ ޖަންގަލި ހުރަސްކޮށް ޕެނަމާއަށް އެތެރެވި މީހުންގެ ޢަދަދު 248,000 އަށް އަރައެވެ. އެއީ، އޭގެ ކުރީ އަހަރާ އަޅައިބަލާއިރު، ދެގުނަ އިތުރު ޢަދަދެކެވެ. މީގެ ތެރޭގައި ގިނައީ ވެނެޒުއެލާ، އެކުއެޑޯ އަދި ހެއިޓީއާއި ކިޔުބާގެ ރައްޔިތުންގެ އިތުރުން އެފްރިކާއާއި އޭޝިޔާ ބައްރުގެ ޤައުމުތަކުގެ މީހުންނެވެ.
ޕެނަމާ ހުރަސްކޮށް އެމެރިކާއަށް ހިޖުރަކުރަން މަސައްކަތް ކުރާ މީހުންނަށް އިންސާނީ އެހީތެރިކަން ފޯރުކޮށްދިނުމަށް އެ ޤައުމުގެ ސަރުކާރާއި އ.ދ.އާ ގުޅިގެން ދަނީ މަސައްކަތްތަކެއް ކުރަމުންނެވެ. މީގެ ތެރޭގައި، އެ މީހުން ހުރަސްކުރާ ސަރަޙައްދުތަކުގައި އެހީދޭ ކޭމްޕުތައް ޖެހުން ހިމެނެއެވެ. ކުރިއަށް އޮތް ތަނުގައި ވެސް އެ މީހުންނަށް އެހީތެރިކަން ފޯރުކޮށްދިނުމުގައި ޕެނަމާއިން ދެމިއޮންނާނެ ކަމުގައި ކޯރްޓީޒޯ ވިދާޅުވިއެވެ.
ކޮލަމްބިޔާގެ ސަރަޙައްދީ ރޮނގާ ހިސާބުން ފެށިގެން ކޮސްޓަ ރީކާއާ ހަމައަށް އެ މީހުން ގެންދިޔުމަށް ވެސް ޕެނަމާގެ ސަރުކާރުން ދަނީ އެހީތެރިކަން ފޯރުކޮށްދެމުންނެވެ. އަދި، 700 ކިލޯމީޓަރުގެ ދިގު އެ މަގު ހުރަސް ކުރުމަށް ޚާއްޞަކޮށްގެން ޕެނަމާއިން ވަނީ ބަސް ދަތުރުތަކެއް ވެސް ފަށާފައެވެ.