ބާރުގަދަ ތޫފާނެއް ކަމުގައިވާ ގެބްރިއޭލް ނިއު ޒިލެންޑުގެ އުތުރުގެ ސަރަޙައްދުތަކަށް އެރުމާ ގުޅިގެން ހިނގި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި ތިން މީހުން މަރުވެއްޖެއެވެ. މި ތޫފާނާ އެކު، އެ ޤައުމުގެ އުތުރުގައި އޮންނަ ނޯތް އައިލެންޑުގެ ރަށްތަކަށް ވަނީ ބޮޑެތި ގެއްލުންތަކެއް ލިބިފައެވެ.
ތޫފާނާ އެކު އެ ޤައުމުގެ އޮކްލެންޑާއި ހޯކްސް ބޭ ސަރަޙައްދަށް ބޯކޮށް ވާރޭވެހި ފެންބޮޑުވެފައިވާއިރު، ގިނަ ޢަދަދެއްގެ ބަޔަކު ވަނީ އެ މީހުންގެ ގެދޮރުގައި ތާށިވެފައެވެ. އުފުލެމުންދިޔަ ފެންގަނޑުން ސަލާމަތްވުމަށް ގިނަ ބަޔަކު ވަނީ އެ މީހުންގެ ގެދޮރުގެ ފުރާޅުތަކަށް އަރާފައެވެ. އެ މީހުން ސަލާމަތްކުރުމަށް ނިއު ޒިލެންޑުގެ އަސްކަރިއްޔާއިން ދަނީ ހެލިކޮޕްޓަރުތައް ބޭނުންކޮށްގެން މަސައްކަތް ކުރަމުންނެވެ.
"ބައެއް ސަރަޙައްދުތަކުގައި ދެ ބުރިއަށް ނަގާފައިވާ ޢިމާރާތްތައް ވެސް ވަނީ ފެނު އަޑީގައި. އެ ޢިމާރާތްތަކުގެ ފުރާޅުގައި ތާށިވެފައިވާ މީހުން ސަލާމަތްކުރަން ހުއްޓުމެއް ނެތި މި ދަނީ މަސައްކަތް ކުރަމުން،" ނިއު ޒިލެންޑުގެ އަސްކަރިއްޔާގެ އޮފިޝަލަކު ވިދާޅުވިއެވެ. މިހާތަނަށް، 300 އަށްވުރެ ގިނަ މީހުން ވަނީ ސަލާމަތްކޮށްފައެވެ.
ތޫފާން ގެބްރިއޭލްގެ ބާރު މިހާރު ކެނޑިފައިވީ ނަމަވެސް، އެ ޤައުމުގެ ނޯތް އައިލެންޑުގެ ސަރަޙައްދުތަކަށް ވަނީ ބޮޑެތި ގެއްލުންތަކެއް ލިބިފައެވެ. ތޫފާނާއެކު ޖެހެމުންދިޔަ ބާރު ވައިގެ ސަބަބުން، ގިނަ ޢަދަދެއްގެ ގެދޮރަށް ވަނީ ގެއްލުންވެފައެވެ. ތޫފާން އަރާނެ ކަމުގެ އިންޒާރާއެކު، 10,500 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ނަމަވެސް، ގިނަ ޢަދަދެއްގެ ބަޔަކު ވަނީ އަމިއްލަ ގެދޮރު ދޫކޮށް ދިޔުމަށް ދެކޮޅު ހަދާފައެވެ.
މި ތޫފާނާ އެކު ނޯތް އައިލެންޑުގެ ސަރަޙައްދުތަކުގެ މަގުތައް ވެސް ވަނީ ހަލާކުވެފައެވެ. އަދި، ބައެއް ސަރަޙައްދުތަކުގެ ބިންގަނޑު ކަނޑައިގެން ގޮސް، ޢިމާރާތްތައް ވެއްޓިފައިވާއިރު، ގިނަ ސަރަޙައްދުތަކުން ކަރަންޓާއި ފެނުގެ ޚިދުމަތް ވަނީ މެދުކެނޑިފައެވެ. އެ ސަރަޙައްދަކީ، 5 މިލިޔަން މީހުންގެ އާބާދީއެއް އޮންނަ ނިއު ޒިލެންޑުގެ އާބާދީގެ ބޮޑު ބައެއް ދިރިއުޅޭ ސަރަޙައްދެވެ.
ތޫފާނާއެކު ހިނގި ހާދިސާތަކުގައި މަރުވި މީހުންގެ ޢަދަދު އިތުރުވުމަކީ އެކަށީގެންވާ ކަމެއް ކަމުގައި އެ ޤައުމުގެ ކުއްލި ހާލަތްތަކާ ބެހޭ ވަޒީރު ކީރަން މެކްއެނަލްޓީ ވިދާޅުވިއެވެ. މަރުވެފައިވާ ތިން މީހެއްގެ ހަށިގަނޑު މިހާރު ވަނީ ފެނިފައެވެ. މީގެ ތެރެއިން އަންހެނެއް މަރުވީ ބިންގަނޑު ކަނޑައިގެން ދިޔުމުންނެވެ. އިތުރު މީހަކު މަރުވީ ވެއްޓުނު ޢިމާރާތެއްގެ ދަށުވެގެންނެވެ.
ތޫފާން ގެބްރިއޭލްއާ ގުޅިގެން އެ ޤައުމުގެ ނޯތް އައިލެންޑުގެ ސަރަޙައްދުތަކުގައި ކުއްލި ހާލަތު އިޢުލާނުކޮށްފައިވާއިރު، ކަރަންޓުގެ ޚިދުމަތް ކެނޑިފައިވާ މީހުންގެ ޢަދަދު 140,000 އަށް އަރާ ކަމުގައި މެކްއެނަލްޓީ ވިދާޅުވިއެވެ. ތޫފާނުގެ ނުރައްކަލުން ސަލާމަތްވުމަށް ކޮމިޔުނިޓީ ސެންޓަރަކަށް ބަދަލުވި 60 އަށްވުރެ ގިނަ މީހުން ސަލާމަތްކޮށްފައިވާ ކަމުގައި ވެސް އޭނާ ވިދާޅުވިއެވެ.
ތޫފާން ގެބްރިއޭލް އުފެދިފައި ވަނީ އޮސްޓްރޭލިޔާގެ އިރުއުތުރު އައްސޭރިފަށުގައި ކޮރަލް ކަނޑުގެ ސަރަޙައްދުގައެވެ. އަދި، ނިއު ޒިލެންޑުގެ ސަރަޙައްދުތަކަށް އަރާފައި ވަނީ ފެބްރުވަރީ 12 ވަނަ ދުވަހުއެވެ. މި ތޫފާނާ އެކު އެންމެ 24 ގަޑިއިރުގެ ތެރޭގައި 200 މިލިމީޓަރުގެ ވާރޭވެހިފައިވާއިރު، ގަޑިއަކު 140 ކިލޯމީޓަރުގެ ބާރުމިނުގައި ވައި ޖެހިފައިވެއެވެ.