އެމެރިކާގެ ބޮޑު ސަރަޙައްދަކަށް އަރާފައިވާ ފިނީގެ ތޫފާނުގައި ބޯކޮށް ސްނޯ ފައިބައި، އެކަކު މަރުވެއްޖެއެވެ. މި ތޫފާނުގެ އަސަރު އެންމެ ބޮޑަށް ކޮށްފައި ވަނީ އެމެރިކާގެ އުތުރާއި މެދުތެރޭގެ ސަރަޙައްދުތަކަށެވެ. ބޯކޮށް ސްނޯ ފޭބުމުގެ ސަބަބުން އެ ސަރަޙައްދުގެ ބޮޑު ބަޔަކުން ވަނީ ކަރަންޓުގެ ޚިދުމަތް މެދުކެނޑިފައެވެ.
މި ތޫފާނާ ގުޅިގެން އެކަކު މަރުވީ، ކަރަންޓު ކޭބަލެއް ކަނޑައިގެން ގޮސް، ކަރަންޓުގައި ޖެހުމުގެ ސަބަބުންނެވެ. މަރުވެފައި ވަނީ އަލިފާން ނިއްވުމުގެ މަސައްކަތުގައި ހަރަކާތްތެރިވާ މީހެއް ކަމުގައި މިޝިގަން ސްޓޭޓްގެ އޮފިޝަލުން ބުނެއެވެ.
ކަރަންޓުގެ ޚިދުމަތް މެދުކެނޑިފައިވާ ގެދޮރާއި ވިޔަފާރިތަކުގެ ޢަދަދު 900,000 އަށް އަރާއިރު، ކުރިއަށް އޮތް 24 ގަޑިއިރުގެ ތެރޭގައި އެމެރިކާގެ އުތުރުގެ ސަރަޙައްދުތަކަށް 18 އިންޗީގެ ސްނޯ ފައިބާގެ ކަމުގައި މޫސުމާ ބެހޭ އިދާރާއިން ލަފާކުރެއެވެ. އަދި، ގަޑިއަކު 80 ކިލޯމީޓަރުގެ ބާރުމިނުގައި ވައިޖެހޭނެ ކަމަށާއި، ވައިގެ ފިނިކަން މައިނަސް 40 ޑިގްރީ ސެލްސިއެސްއަށް ދަށްވާނެ ކަމުގައި ވެސް މޫސުމާ ބެހޭ އިދާރާއިން ބުނެއެވެ.
ސްނޯގެ ތޫފާނުގެ އަސަރު އެންމެ ބޮޑަށް ކުރަމުންދާ ސްޓޭޓްތަކުގެ ތެރޭގައި އިލިނޯއީ، އިންޑިޔާނާ، މިޝިގަން، ނިއު ޔޯކް އަދި ވިސްކޮންސިން ހިމެނެއެވެ. މި ތޫފާނާ ގުޅިގެން 2,000 އަށްވުރެ ގިނަ ވައިގެ ދަތުރުފަތުރު ކެންސަލްކޮށްފައިވާއިރު، 15,000 އަށްވުރެ ގިނަ ފްލައިޓް ވަނީ ޑިލޭވެފައެވެ. އަދި، އެތަކެއް ހާސް މީހުން ވަނީ ވައިގެ ބަނދަރުތަކުގައި ތާށިވެފައެވެ.
2.9 މިލިޔަން މީހުން ދިރިއުޅޭ މިނެސޯޓާގެ ރަށެއް ކަމުގައިވާ މިނިއެޕޮލިސްއަށް ގަޑިއަކު 2 އިންޗީގެ ސްނޯ ފައިބަމުންދާއިރު، ސްނޯގެ ތޫފާނުގެ ސަބަބުން އެއްގަމު އުޅަނދުފަހަރު ދުއްވުމަކީ ނުރައްކާތެރި ކަމެއްގެ ގޮތުގައި މޫސުމާ ބެހޭ އިދާރާއިން ވަނީ ކަނޑައަޅާފައެވެ. ދައުރުވަމުންދާ ވީޑިޔޯތަކުން ފެންނަނީ، މަގުތަކުގައި ދުއްވާ އުޅަނދުފަހަރު ހުއްޓިފައިވާ މަންޒަރެވެ. މިނިއެޕޮލިސްގެ އިތުރުން އުތުރާއި ދެކުނު ޑެކޯޓާއާއި، ކޮލޮރާޑޯއާއި، މިޝިގަން އަދި ވަޔޯމިންގައި ސްކޫލްތައް ވެސް ވަނީ ބަންދުކޮށްފައެވެ.
މި ތޫފާނުގެ އަސަރު އެމެރިކާގެ ހުޅަނގުގައި ކެލިފޯނިޔާއަށް ވެސް ކުރާނެ ކަމަށް މޫސުމާ ބެހޭ އިދާރާއިން ވަނީ އިންޒާރުކޮށްފައެވެ. ކެލިފޯނިޔާގެ ލޮސް އެންޖެލެސް ކައިރީގައިވާ ސަރަޙައްދުތަކަށް މިހާރު ވެސް 8 ފޫޓަށް ސްނޯ ފައިބާފައިވާ ކަމުގައި އެ ރަށުގެ އޮފިޝަލުން ބުނެއެވެ. ނަމަވެސް، އެމެރިކާގެ ދެކުނުގެ ސަރަޙައްދުތަކަށް ވަނީ ހޫނު ގަދަވެފައެވެ. އެ ސަރަޙައްދުތަކުގެ ފިނިހޫނުމިން 31 ޑިގްރީ ސެލްސިއެސްއަށް އުފުލޭނެ ކަމަށް މޫސުމާ ބެހޭ އިދާރާއިން ބުނެއެވެ.