ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަށް އެއް އަހަރު ފުރުމާ ދިމާކޮށް، ހަނގުރާމަ ހުއްޓައިލަން ގޮވައިލާ އ.ދ.އިން ޤަރާރެއް ފާސްކޮށްފިއެވެ. ރަޝިޔާ ސިފައިން ޔޫކްރެއިނަށް ފޮނުވައިގެން ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައަށް މިއަދު މި ވަނީ އެއް އަހަރު ފުރިފައެވެ.
ހަނގުރާމައަށް އެއް އަހަރު ފުރުމާ ދިމާކޮށް އ.ދ.އިން މި ވަނީ ހަނގުރާމަ ހުއްޓައިލައި، ޔޫކްރެއިނަށް އަރާފައިވާ ރަޝިޔާ ސިފައިން ބޭލުމަށް ގޮވައިލާ ޤަރާރެއް ފާސްކޮށްފައެވެ. މި ޤަރާރު ފާސްވީ 141 މެންބަރުންގެ ތާޢީދާއެކުގައެވެ. ޤަރާރާ ދެކޮޅަށް ވޯޓުލުމުގައި ރަޝިޔާއާ ބައިވެރިވެފައި ވަނީ ބެލަރޫސް، އުތުރު ކޮރެޔާ، އެރިޓްރިޔާ، މާލީ، ނިކަރާގުއާ އަދި ސޫރިޔާއެވެ. ރަޝިޔާގެ ގާތް އެކުވެރިޔާ ޗައިނާއިން ވޯޓުގައި ބައިވެރިއެއް ނުވެއެވެ.
ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ އ.ދ.ގެ ޤަރާރަށް މަރުޙަބާ ވިދާޅުވެފައެވެ. "މި ވޯޓުން ދޭހަކޮށްދެނީ، ޔޫކްރެއިނަށް މުޅި ދުނިޔެއިން ކުރަމުންދާ ތާޢީދު،" ޒެލެންސްކީ ވިދާޅުވިއެވެ. ނަމަވެސް، ރަޝިޔާއިން ވަނީ ޤަރާރާ ދެކޮޅު ހަދާފައެވެ. ރަޝިޔާއިން އ.ދ.އަށް ކަނޑައަޅާފައި ހުންނަވާ ސަފީރުގެ ނައިބު ޑިމިޓްރީ ޕޮލިޔެންސްކީ ވިދާޅުވީ މިއީ "ބޭކާރު" ޤަރާރެއް ކަމުގައެވެ.
ހަނގުރާމައަށް އެއް އަހަރު ފުރުމާ ދިމާކޮށް ދުނިޔޭގެ އެކި ކަންކޮޅުތަކުން ދަނީ ޔޫކްރެއިނަށް ތާޢީދު ކުރާ ކަން ހާމަކުރަމުންނެވެ. ފަރަންސޭސިވިލާތުގެ ޕެރިސްގެ އައިފުލް ޓަވަރ ޔޫކްރެއިނުގެ ދިދައިގެ ކުލަތަކުން ދިއްލައިލާފައިވާއިރު، އިނގިރޭސިވިލާތުގެ ލަންޑަނާއި، ވިލާތުގެ އިއްތިހާދު (އީ.ޔޫ)ގެ މައި އޮފީސް ހުންނަ ބެލްޖިޔަމްގެ ބްރަސަލްސްގައި ވެސް ޔޫކްރެއިނަށް އޮތް ތާޢީދު ހާމަކޮށްދިނުމަށް ހަރަކާތްތައް ހިންގާފައިވެއެވެ.
ހަނގުރާމައިގެ މައިދާނުގައި ރަޝިޔާ ސިފައިން ދަނީ ހަމަލާތައް އިތުރު ކުރަމުންނެވެ. ޔޫކްރެއިނުގެ އިރުމައްޗާއި ދެކުނުގެ އިތުރުން އުތުރުގެ 25 ރަށަކާއި އަވަށަކަށް ރަޝިޔާއިން ވަރުގަދަ ހަމަލާތަކެއް ދެމުންދާ ކަމުގައި ޔޫކްރެއިނުން ބުނެއެވެ. އިރުމަތީގައިވާ ދޮންބާސްގެ ލުހާންސްކާއި ޑޮނެޓްސްކްގެ ބޮޑު ސަރަޙައްދެއްގެ އިތުރުން ދެކުނުގައިވާ ޒަޕޮރީޜިޔާ އޮތީ ރަޝިޔާ ސިފައިންގެ އަތްދަށުގައެވެ.
މީގެ އެއް އަހަރު ކުރިން ރަޝިޔާގެ ރައީސް ވްލަޑިމިޔަރ ޕުޓިން ޔޫކްރެއިނަށް ސިފައިން ފޮނުވައިގެން ހަނގުރާމަ ފަށާފައި ވަނީ ވެރިރަށް ކީވް ހިފައި، ޒެލެންސްކީގެ ވެރިކަން ނިމުމަކަށް ގެނައުމުގެ ނިޔަތުގައެވެ. ޕުޓިން ސިފަކުރައްވާ ގޮތުގައި މިއީ ހަނގުރާމައެއް ނޫނެވެ. ނަމަވެސް، އަސްކަރީ އޮޕަރޭޝަނެކެވެ. ބޭނުމަކީ، ނާޒީންގެ އަތްދަށުން ޔޫކްރެއިން މިނިވަންކުރުން ކަމުގައި އޭނާ ވަނީ ވިދާޅުވެފައެވެ.
ނަމަވެސް، ޔޫކްރެއިން ސިފައިން ވަނީ ރަޝިޔާގެ ފައުޖުތަކާ ކުރިމަތިލައި ޤައުމުގެ މިނިވަންކަމާ ސިޔާދަތު ހިމާޔަތް ކުރުމަށް ހަނގުރާމަ ފަށާފައެވެ. އަދި، ރަޝިޔާ ސިފައިންގެ ބައެއް ރޭވުންތައް ފޭލުކޮށްލައި، ޔޫކްރެއިން ސިފައިން ވަނީ ރަޝިޔާއިން އަތްގަދަކޮށްފައިވާ ބައެއް ސަރަޙައްދުތައް މިނިވަން ކޮށްފައެވެ. ނަމަވެސް، ޔޫކްރެއިނުގެ ފަސްބައިކުޅަ އެއްބައި ސަރަޙައްދެއް އަދިވެސް އޮތީ ރަޝިޔާގެ އަސްކަރިއްޔާގެ އަތްދަށުގައެވެ.
އެންމެ ވަރުގަދަކޮށް މި ވަގުތު ހަނގުރާމަ ކުރަމުންދަނީ ޑޮނެޓްސްކްގެ ރަށެއް ކަމުގައިވާ ބަޚްމުތު ކައިރީގައެވެ. އެ ރަށް ހިފަން ރަޝިޔާ ސިފައިން މަސައްކަތް ކުރަމުންދާތާ މިހާރު މަސްތަކެއް ފާއިތުވެއްޖެއެވެ. ނަމަވެސް، އަދި އެ ކަން ކާމިޔާބުކުރެވޭ ގޮތް ވަނީ ނުވެފައެވެ.
މި ހަނގުރާމައިގައި މިހާތަނަށް މަރުވެފައިވާ ނުވަތަ ޒަޚަމުވެފައިވާ ރަޝިޔާ ސިފައިންގެ ޢަދަދު 200,000 އަށްވުރެ އިތުރުވާނެ ކަމުގައި އެމެރިކާއާއި ހުޅަނގުގެ ޤައުމުތަކުން އަންދާޒާ ކުރެއެވެ. އަދި، ރަޝިޔާއިންނާއި ޔޫކްރެއިނުން، ކޮންމެ ޤައުމަކުން 100,000 އަށްވުރެ ގިނަ ސިފައިން މަރުވެފައިވާ ކަމަށް އެމެރިކާގެ އަސްކަރިއްޔާގެ ޖެނެރަލަކު 2022 ނޮވެންބަރު މަހު ވަނީ ވިދާޅުވެފައެވެ.
ނަމަވެސް، ހަނގުރާމަ ހިނގަމުންދާތީ، މަރުވެފައިވާ ސިފައިންނާއި ޢާންމުންގެ ފުރިހަމަ ޢަދަދުތައް ކަށަވަރު ކުރަން ވަނީ ދަތިވެފައެވެ. ރަޝިޔާ ސިފައިން މި ހަނގުރާމައިގައި ޔޫކްރެއިނުގެ ޢާންމު ރައްޔިތުންނާ ދެކޮޅަށް އިންސާނިއްޔަތާ ޚިލާފު ޖަރީމާތައް ހިންގަމުންދާ ކަމުގައި ވެސް އެމެރިކާއާއި ހުޅަނގުން ދަނީ ތުހުމަތު ކުރަމުންނެވެ.