އެފްރިކާގެ ހުޅަނގު ބިތުގައި އޮންނަ ޤައުމެއް ކަމުގައިވާ މާލީގައި ހަރަކާތްތެރިވާ ޓެރެރިސްޓު ޖަމާޢަތަކުން ދިން ހަމަލާއެއްގައި ޢާންމުންގެ 13 މީހުން މަރުވެއްޖެއެވެ. ޓެރެރިސްޓު ޖަމާޢަތުން ހަމަލާދީފައި ވަނީ ޢާންމުން ދިރިއުޅޭ އަވަށެއް ކަމުގައިވާ ކަނަ-ބޮންޒޮންއަށް ކަމުގައި މާލީގެ އޮފިޝަލުން ވިދާޅުވެއެވެ. އެ އަވަށަށް ވަރުގަދަ ބަޑީގެ ހަމަލާތަކެއް ދިނުމަށް ފަހު ހަނގުރާމަވެރިން ވަނީ އެ އަވަށުގެ ގެތަކުގައި ހުޅުޖަހާފައެވެ.
މި ހަމަލާއަށް ފަހު އެ އަވަށުގައި ދިރިއުޅޭ ޢާންމުންގެ ތިން މީހަކު ރަހީނުކޮށްގެން ގެންގޮސްފައިވާ ކަމުގައި މާލީގެ އޮފިޝަލުން ވިދާޅުވެއެވެ. އެ އަވަށުގައި ގެންގުޅޭ ނައަމްސޫފި ވެސް ވަނީ ވަގަށް ގެންގޮސްފައެވެ. މި ހަމަލާގައި ގިނަ ޢަދަދެއްގެ ބަޔަކު ޒަޚަމުވެފައިވާއިރު، މަރުވި މީހުންގެ ޢަދަދު 20 އަށްވުރެ އިތުރުވެދާނެ ކަމަށް ބެލެވޭ ކަމުގައި ވެސް އޮފިޝަލުން ވިދާޅުވިއެވެ.
ކަނަ-ބޮންޒޮން އަވަށުގެ އޮފިޝަލުން ވިދާޅުވީ، ހަމަލާތަކާ ގުޅިގެން މާލީގެ ސަރުކާރާއި އެ ޤައުމުގައި ހަރަކާތްތެރިވާ އ.ދ.ގެ ސުލްޙަ ބަލަހައްޓާ ފައުޖުގެ އެހީތެރިކަމަށް އެދިފައިވާނެ ކަމުގައެވެ. އަދި، ހަމަލާތަކާ ގުޅިގެން، ޓެރެރިސްޓުންގެ ކިބައިން ސަލާމަތާއި ރައްކާތެރިކަން ކަށަވަރުކޮށްދިނުމަށް އެދި ގިނަ ޢަދަދެއްގެ ބަޔަކު ވަނީ މުޒާހަރާ ވެސް ކޮށްފައެވެ.
މި ހަމަލާތަކުގެ ފަހަތުގައި ވަނީ އަލް ޤައިދާއާއި އައި.އެސް. ޖަމާޢަތަށް ވަފާތެރި ޓެރެރިސްޓުން ކަމަށް ބެލެވެއެވެ. އެ ޖަމާޢަތްތަކަށް ވަފާތެރި ހަތިޔާރުއެޅި ގުރޫޕުތަކުން މާލީގެ ސަރުކާރާ ދެކޮޅަށް ތެދުވެ، ހަނގުރާމަ ފަށާފައި ވަނީ 2012 ވަނަ އަހަރުއެވެ. އެ ޖަމާޢަތްތައް ހަރަކާތްތެރި ވަނީ މާލީގެ އުތުރުގެ ސަރަޙައްދުތަކުގައެވެ.
މާލީގެ އިތުރުން އެ ޤައުމާ އިންވެގެން އޮންނަ ނައިޖަރއާއި ބުރްކިނާ ފާސޯގައި ވެސް ހަތިޔާރު އެޅި ޖަމާޢަތްތަކުގެ ހަރަކާތްތައް ފަހަކަށް އައިސް ވަނީ އިތުރުކޮށްފައެވެ. މި ހަމަނުޖެހުންތަކުގައި އެތަކެއް ހާސް ޢާންމުންނަކާއި ފުލުހުންނާއި ސިފައިން މަރުވެފައިވާއިރު، ދެ މިލިޔަނެއްހާ މީހުންނަށް ވަނީ އަމިއްލަ ވަޒަން ދޫކޮށް ރައްކާތެރި ހިސާބުތަކަށް ހިޖުރަކުރަން މަޖުބޫރުވެފައެވެ.
ހުސްވި ހަފުތާއެއްހާ ދުވަހުގެ ތެރޭގައި ބުރްކިނާ ފާސޯގައި ހަތިޔާރުއެޅި ޖަމާޢަތްތަކުން ދީފައިވާ ހަމަލާތަކުގައި ސިފައިންގެ 70 މީހުން ވަނީ މަރައިލާފައެވެ. އެފްރިކާ ބައްރުގެ ސާހިލް ސަރަޙައްދުގައި ހަރަކާތްތެރިވާ ހަނގުރާމަވެރި ޓެރެރިސްޓު ޖަމާޢަތްތަކުގެ އެންމެ ގިނަ މެންބަރުން ހަރަކާތްތެރި ވަނީ މާލީގައި ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ސާހިލް ސަރަޙައްދުގައި ހިމެނޭ ޤައުމުތަކަކީ ބުރްކިނާ ފާސޯ، ކެމަރޫން، ޗާޑް، ދަ ގެމްބިޔާ، ގިނީ މޮރިޓޭނިޔާ، މާލީ، ނައިޖަރ، ނައިޖީރިޔާ އަދި ސެނެގޯލްއެވެ. ހުސްވި ހަފުތާގައި ސެނެގޯލްގައި ދިން ނުރައްކާތެރި ހަމަލާއެއްގައި އ.ދ.ގެ ސުލްޙަ ބަލަހައްޓާ ފައުޖުގެ ތިން ސިފައިން ވަނީ މަރައިލާފައެވެ. އެ ހަމަލާ ދީފައި ވަނީ ބޮމެއް ގޮއްވައިލައިގެންނެވެ.
މާލީގެ މެދުތެރޭގެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތުގެ ނަމަކީ ކާތިބާ މަސީނާއެވެ. އަދި، އައި.އެސް. ޖަމާޢަތުގެ ހަނގުރާމަވެރިން ދަނީ އެ ޤައުމުގެ އިރުއުތުރުގެ ސަރަޙައްދުތަކުގައި ހަރަކާތްތެރިވަމުންނެވެ. މާލީގައި ވެރިކަން ކުރާ އަސްކަރީ ސަރުކާރުން ދާދިފަހުން ވަނީ، އެ ޖަމާޢަތުގެ ހަނގުރާމަވެރިންނާ ދެކޮޅަށް އަސްކަރީ ކެމްޕޭނެއް ފަށާފައެވެ. ނަމަވެސް، އެ ޖަމާޢަތުގެ ހަނގުރާމަވެރިން ޢާންމު ރައްޔިތުންނަށް އަމާޒުކޮށް ދެމުންދާ ހަމަލާތައް އިތުރުކޮށްފައިވާ ކަމަށް އ.ދ.އިން ބުނެއެވެ.