ރަޝިޔާއިން ޔޫކްރެއިނުގެ ވެރިރަށް ކީވްއާއި ބޮޑެތި ރަށްތަކަށް އަނެއްކާ ވެސް ވަރުގަދަ މިސައިލް ހަމަލާތަކެއްދީ ޢާންމުންގެ ހަ މީހުން މަރައިލައިފިއެވެ. ރަޝިޔާއިން ދީފައިވާ ގިނަ މިސައިލް ހަމަލާތައް ޔޫކްރެއިނުގެ އަސްކަރިއްޔާއިން ދިފާޢުކޮށްފައިވީ ނަމަވެސް، ބައެއް ހަމަލާތަކުގައި ބޮޑެތި ގެއްލުންތަކެއް ވަނީ ލިބިފައެވެ. އަދި، ބައެއް ހިސާބުތަކުން ކަރަންޓުގެ ޚިދުމަތް ވަނީ މެދުކެނޑިފައެވެ.
ރަޝިޔާއިން ޔޫކްރެއިނުގެ 10 ސަރަޙައްދަކަށް އަމާޒުކޮށް މިސައިލް ހަމަލާތައް ދީފައިވާ ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ. ހަމަލާތައް އަމާޒުކޮށްފައިވާ ރަށްތަކުގެ ތެރޭގައި ލްވިވްއާއި ދެވަނައަށް އެންމެ ބޮޑު ރަށް ޚާރްކިވް ވެސް ހިމެނެއެވެ. މި ހަމަލާތަކުގައި ޚާރްކިވްގެ ބޮޑު ސަރަޙައްދަކުން ކަރަންޓާއި ފެނުގެ ޚިދުމަތް ވަނީ މެދުކެނޑިފައެވެ.
"ރަޝިޔާއިން ޔޫކްރެއިނުގެ ރަށްތަކަށް 81 މިސައިލް ހަމަލާ ފޮނުވައިލި. މިއީ، ޔޫކްރެއިނުގެ ރައްޔިތުންނަށް ބިރުދައްކައި، ފަހަތަށް ޖައްސަން ދީފައިވާ ހަމަލާތަކެއް. މިއީ ރަޝިޔާއިން ހިންގާ ވަރަށް ހަޑިމުޑުދާރު އަމަލުތަކެއް،" ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވިއެވެ.
ޔޫކްރެއިނުގެ ވެރިރަށް ކީވްއަށް ރަޝިޔާއިން ދިން ހަމަލާތަކުގައި ދެ މީހަކު ޒަޚަމުވެ، އެ ރަށުގެ ބޮޑު ސަރަޙައްދަކުން ކަރަންޓާއި ދެނުގެ ޚިދުމަތް މެދުކެނޑިފައިވާ ކަމުގައި އެ ރަށުގެ މޭޔަރު ވިޓާލީ ކްލިޓްޝްކޯ ވިދާޅުވިއެވެ. ރަޝިޔާގެ ހަމަލާތަކުގައި މިސައިލްގެ އިތުރުން ޑްރޯން ވެސް ބޭނުންކޮށްފައިވާ ކަމުގައި އޭނާ ވިދާޅުވިއެވެ. ހަމަލާތަކުގައި ޢާންމުން ދިރިއުޅޭ ޢިމާރާތްތަކާއި ޢާންމުންގެ މުދަލަށް ވެސް ވަނީ ގެއްލުން ލިބިފައެވެ.
ލްވިވްއަށް ދިން ހަމަލާތަކުގައި ޢާންމުން ދިރިއުޅޭ ޢިމާރާތަކަށް މިސައިލެއް އަރައި، ފަސް މީހުން މަރުވިއެވެ. ލްވިވްގެ ގަވަރުނަރު ވިދާޅުވީ މިސައިލް ހަމަލާގައި ގެއްލުން ލިބުނު ޢިމާރާތުގެ ތެރެއިން ފަސް މީހެއްގެ ހަށިގަނޑު ފެނިފައިވާ ކަމުގައެވެ. އަދި، އިރުމަތީ ޑްނިޕްރޯޕެޓްރޮވްސްކުގައި ވެސް 34 އަހަރު މީހަކު މަރުވި ކަމުގައި އެ ރަށުގެ ގަވަރުނަރު ވިދާޅުވިއެވެ.
ކީވްއާއި ލްވިވްގެ އިތުރުން ޚާރްކިވްއާއި ހުޅަނގުދެކުނުގައިވާ އޮޑެސާއަށް ރަޝިޔާއިން ދިން ގިނަ ހަމަލާތައް އަމާޒުކޮށްފައި ވަނީ ކަރަންޓާއި ފެނުގެ ޚިދުމަތްދޭ ވަސީލަތްތަކަށެވެ. ޚާރްކިވްގެ އިންޖީނުގެތަކާއި ޓްރާންސްފޯމަރުތަކަށް އަމާޒުކޮށް 15 މިސައިލް ހަމަލާދީފައިވާ ކަމުގައި އެ ރަށުގެ ގަވަރުނަރު އޮލެގް ސިނެގުބޮފް ވިދާޅުވިއެވެ.
ރަޝިޔާއިން ވެރިރަށް ކީވްއާއި ބޮޑެތި ރަށްތަކަށް ވަރުގަދަ ހަމަލާތަކެއްދީފައި މި ވަނީ، އިރުމަތީ ޑޮނެޓްސްކުގެ ރަށެއް ކަމުގައިވާ ބަޚްމުތް ހިފުމަށް ރަޝިޔާއިން ސިފައިން މަސައްކަތް ކުރަމުންދާ ދަނޑިވަޅެއްގައެވެ. މީގެ ހަތް މަސް ކުރިން ފެށި މަސައްކަތުގައި ރަޝިޔާ ސިފައިންނަށް މިހާރު ކުރިއެރުންތަކެއް ލިބިފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޔޫކްރެއިނަށް ރަޝިޔާއިން ފޮނުވާފައިވާ ވެންގަރ ގުރޫޕުގެ ކުލީ ސިފައިން ވަނީ، އެ ރަށުގެ ބޮޑު ބައެއް އެ މީހުންގެ ކޮންޓްރޯލްގެ ދަށުގައި އޮތް ކަމަށް ބުނެފައެވެ. ނަމަވެސް، އެ ސަރަޙައްދުގައި ޔޫކްރެއިނުގެ 12,000 އާއި 20,000 އާ ދެމެދުގެ ޢަދަދެއްގެ ސިފައިން އަދިވެސް ހަރަކާތްތެރިވަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.