އިންޑޮނީޝިޔާގެ ނަތޫނާ ޑިސްޓްރިކްޓުގެ ރަށެއް ކަމުގައިވާ ސެރާސަންގައި ހިނގި ނުރައްކާތެރި ބިންގަނޑު ކަނޑައިގެން ދިޔުމުގެ ހާދިސާގައި ކިސަޑުތަކުގެ ދަށުވެ މަރުވެފައިވާ އިތުރު މީހުންގެ ހަށިތައް ފެނި، މި ހާދިސާގައި މަރުވި މީހުންގެ ޢަދަދު 30 އަށް އަރައިފިއެވެ. ސެރާސަންއަކީ ބޯނިޔޯއާއި ޕެނިންސިޔުލާ މެލޭޝިޔާއާ ދެމެދުގައި އޮންނަ ސަރަޙައްދެކެވެ.
ފައިބާފައިވާ ކިސަޑުތަކުގެ ދަށުވެފައިވާ އިތުރު ބަޔެއްގެ ހަށިތައް ފެނިފައި ވަނީ ސަރާސަންގެ ޕަންގްކަލަން އަވަށުންނެވެ. އިތުރު 24 މީހުން ކިސަޑު ފައިބާފައިވާ ޢިމާރާތްތަކުގެ ދަށުވެފައިވާ ކަމަށް ބެލެވޭ ކަމަށާއި، އެ މީހުން ހޯދުމުގެ މަސައްކަތް ކުރަމުންދާ ކަމުގައި އޮފިޝަލުން ވިދާޅުވެއެވެ. ނަމަވެސް، އިތުރު ބަޔަކު ދިރިތިއްބާ ފެންނާނެ ކަމުގެ އުންމީދު ވަނީ ފަނޑުވެފައެވެ. އަދި، މި ހާދިސާގައި މަރުވި މީހުންގެ ޢަދަދު އަދިވެސް އިތުރުވާނެ ކަމަށް ބެލެވޭ ކަމުގައި އޮފިޝަލުން ވިދާޅުވިއެވެ.
އިންޑޮނީޝިޔާގެ ބޮޑު ބަޔަކަށް އަދިވެސް ބޯކޮށް ވިއްސާރަކުރަމުންދާއިރު، ބިންގަނޑު ކަނޑައިގެން ދިޔުމުގެ އިތުރު ހާދިސާތައް ހިނގުމަކީ އެކަށީގެންވާ ކަމެއް ކަމުގައި އެ ޤައުމުގެ މޫސުމާ ބެހޭ އިދާރާއިން ވަނީ އިންޒާރުކޮށްފައެވެ. ވިއްސާރަ މޫސުމުގައި މި ފަދަ ބިންގަނޑު ކަނޑައިގެން ދިޔުމުގެ ހާދިސާތައް ހިނގުމަކީ އެ ޤައުމުގައި ޢާންމު ކަމެކެވެ.
މޫސުމީ ބަދަލުތަކުގެ ސަބަބުން އިންޑޮނީޝިޔާއަށް ކުރިމަތިވާ ޤުރުދަތީ ކާރިސާތަކުގެ ނުރައްކާތެރިކަން އިތުރުވެފައިވާ ކަމުގައި މޫސުމާ ބެހޭ ދާއިރާގެ މާހިރުން ބުނެއެވެ. އަދި، ނަތޫނާ ޑިސްޓްރިކްޓަށް މިފަދަ އިތުރު ހާދިސާތަކެއް ކުރިމަތިވެދާނެ ކަމަށް ބަލައި، އެ ސަރަޙައްދުގައި ދިރިއުޅޭ ބައެއް ޢާއިލާތައް ރައްކާތެރި ހިސާބުތަކަށް ބަދަލުކުރަން ފަށާފައިވާ ކަމުގައި އެ ޤައުމުގެ ކާރިސާތަކާ ބެހޭ އިދާރާ (ބީ.އެން.ޕީ.ބީ)އިން ބުނެއެވެ.
މޫސުން ގޯސްވެ، ބޯނިޔޯގައި އޮންނަ އިންޑޮނީޝިޔާގެ ސަރަޙައްދަށް އަދިވެސް ބޯކޮށް ވާރޭވެހެމުންދާ ކަމުގައި އެ ޤައުމުގެ މޫސުމާ ބެހޭ އިދާރާއިން ބުނެއެވެ. އެ ސަރަޙައްދުގައި ފެންބޮޑުބުމުގެ އަސަރު ކޮށްފައިވާ ގެދޮރުގެ ޢަދަދު 17,000 އަރާ ކަމުގައި އޮފިޝަލުން ވިދާޅުވެއެވެ. އަދި، އޭގެ ތެރެއިން ބައެއް ޢިމާރާތްތައް ވަނީ ވެއްޓިފައެވެ.
ފެންބޮޑުވުމާ ގުޅިގެން މެލޭޝިޔާގައި ހިނގާފައިވާ އެކި ހާދިސާތަކުގައި ހަތަރު މީހުން މަރުވެފައިވާއިރު، 41,000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފައެވެ. ފަހުގެ ތާރީޚެއްގައި އިންޑޮނީޝިޔާއަށް ކުރިމަތިވި އެންމެ ނުރައްކާތެރި ފެންބޮޑުވުމުގެ ހާދިސާ ހިނގާފައި ވަނީ 2020 ވަނަ އަހަރުއެވެ. އެ އަހަރު ފެންބޮޑުވުމާ ގުޅިގެން ހިނގި އެކި ހާދިސާތަކުގައި 67 މީހުން މަރުވިއެވެ.