ތައިލެންޑުގެ ވެރިރަށް ބެންގްކޮކުގެ ވައި ނުސާފުވުމުގެ ސަބަބުން ޞިއްޙީ މައްސަލަތައް ކުރިމަތިވި 200,000 އަށްވުރެ ގިނަ މީހުންނަށް ފަރުވާދިނުމަށް ހޮސްޕިޓަލުގައި އެޑްމިޓްކޮށްފިއެވެ. 11 މިލިޔަން މީހުންގެ އާބާދީއެއް އޮންނަ ބެންގްކޮކަކީ ފަތުރުވެރިންނާއި ވިޔަފާރިވެރިންގެ މެދުގައި ވަރަށް މަޤުބޫލު މަންޒިލެކެވެ.
ބެންގްކޮކުގެ ވައި ނުސާފުވެފައި ވަނީ، އެއްގަމު އުޅަނދުފަހަރުންނާއި، ސިނާޢީ މަސައްކަތްތައް ކުރާ ކާރުޚާނާތަކުންނާއި، ދަނޑުބިންތަކުގައި ރޯކުރާ އަލިފާންގަނޑުތަކުގެ ސަބަބުން އަރާ ދުމުގެ ސަބަބުން ކަމުގައި އޮފިޝަލުން ވިދާޅުވެއެވެ. އަދި، ބެންގްކޮކުގެ ހުރިހާ ސަރަޙައްދެއްގައި ނުރައްކާތެރި "ހޭޒް" އެއް ފެތުރިފައިވާ ކަމުގައި އޮފިޝަލުން ވިދާޅުވިއެވެ.
ނުރައްކާތެރި ވައިގެ ސަބަބުން މި ހަފުތާގައި އެކަނިވެސް 200,000 އަށްވުރެ ގިނަ މީހުން ހޮސްޕިޓަލުގައި އެޑްމިޓުކޮށްގެން ދަރުވާދީފައިވާއިރު، ވައި ނުސާފުވުމުގެ ސަބަބުން މި އަހަރުގެ މިހާތަނަށް 1.3 މިލިޔަން މީހަކު ބަލިވެފައިވާ ކަމުގައި ތައިލެންޑުގެ ޢާންމު ޞިއްޙަތާ ބެހޭ އިދާރާއިން ހާމަކުރެއެވެ.
އަދި، ކުޑަކުދިންނާއި މާބަނޑު އަންހެނުން ގޭތެރޭގައި މަޑުކުރުމަށް ޑޮކްޓަރުން ވަނީ ލަފާދީފައެވެ. ތައިލެންޑުގެ ޞިއްޙަތާ ބެހޭ ވުޒާރާގެ ޑޮކްޓަރެއް ކަމުގައިވާ ކްރިއަންގްކްރައި ނަމްތައިސޮންގު ވިދާޅުވީ، ބޭރުގައި ހޭދަކުރާ ވަގުތުތަކުގައި ފެންވަރު ރަނގަޅު "އެން95" މާސްކު ބޭނުންކުރުމަށް ޢާންމުންނަށް އިރުޝާދު ދީފައިވާނެ ކަމުގައެވެ.
ބެންގްކޮކުގެ ވައި ނުސާފުވުމުގެ ސަބަބުން މި އަހަރުގެ ޖަނަވަރީ މަހާއި ފެބްރުވަރީ މަހުގެ ތެރޭގައި ވެސް އެ ޤައުމުގެ ސަރުކާރުން ވަނީ ގޭގައި މަސައްކަތް ކުރުމަށް ޢާންމުންނަށް އަންގާފައެވެ. އަދި، ކުރިއަށް އޮތް ތަނުގައި މި މައްސަލަ ހައްލު ނުކުރެވިއްޖެނަމަ، ގޭގައި މަޑުކުރަން އަންގާނެ ކަމުގައި ބެންގްކޮކުގެ ގަވަރުނަރު ޗަދްޗަރްޓް ސިއްތީޕުންޓް ވަނީ ވިދާޅުވެފައެވެ.
ބެންގްކޮކުގެ ތިމާވެއްޓަކީ ޢާންމުންނަށް ރައްކާތެރި ތަނަކަށް ހެދުމަކީ އޭނާގެ މުހިންމު ވަޢުދެކެވެ. އޭނާގެ ތަރުޖަމާނު އެކްވަރުންޔޫ އަމްރަޕަލަ ވިދާޅުވީ، ކުޑަކުދިންނަށް ރައްކާތެރިކަން ކަށަވަރު ކޮށްދިނުމަށް ބެންގްކޮކުގެ އެކި ހިސާބުތަކުގައި ގާއިމުކޮށްފައިވާ ނަރސަރީތަކުގައި ހިރަފުހުން ސަލާމަތްވެވޭނެ ގޮތަށް ވައި ސާފުކުރާ "އެއަރ ޕިޔުރިފަޔަރ" ބަހައްޓާފައިވާ ކޮޓަރިތަކެއް ގާއިމުކޮށްފައިވާނެ ކަމުގައެވެ.
ބެންގްކޮކުގެ 11 ޑިސްޓްރިކްޓެއްގެ ވައިގެ ތެރޭގައި "ޕީ.އެމް.25 ޕާޓިކަލްސް" ނުވަތަ އިންސާނުންގެ ނޭވާލާ ނިޒާމުގެ ތެރެއިން ލޭހޮޅިތަކަށް ވާސިލުވެވޭ ފަދަ ކުދި ކުނޑިތަކެއް ދައުރުވަމުންދާ ކަމުގައި އެ ޤައުމުގެ ޢާންމު ޞިއްޙަތާ ބެހޭ ވުޒާރާއިން ހާމަކުރެއެވެ. ބެންގްކޮކުގެ އިތުރުން އުތުރުގައިވާ ޗަންގް މާއީގައި ވެސް ނޭވާލާން ރައްކާތެރި ނޫން މިންވަރަކަށް ވައި ނުސާފުވެފައިވާ ކަމުގައި އޮފިޝަލުން ވިދާޅުވިއެވެ. މި ވަގުތު ތައިލެންޑަކީ ތިންވަނައަށް އެންމެ ނުރައްކާތެރި މިންވަރަކަށް ވައި ނުސާފުވެފައިވާ ޤައުމުގައި ކަމުގައި އައި.ކިޔު.އެއަރއިން ބުނެއެވެ.