ނައިޖީރިޔާގެ ވިޔަފާރީގެ މަރުކަޒީ ރަށް ލޭގޯސްގައި ރޭލަކާއި ބަހެއް ޖެހިގެން ހިނގި ނުރައްކާތެރި އެކްސިޑެންޓެއްގައި ހަ މީހުން މަރުވެއްޖެއެވެ. 20 މިލިޔަން މީހުންގެ އާބާދީއެއް އޮންނަ ލޭގޯސްގެ ޕީ.ޑަބްލިޔު.ޑީ. ސަރަޙައްދުގައި ހިނގި މި ހާދިސާގައި ގިނަ ޢަދަދެއްގެ ބަޔަކު ޒަޚަމުވިއެވެ.
މި ހާދިސާ ހިނގާފައި ވަނީ، ރޭލު ދަގަނޑު ހުރަސްކޮށް އަނެއް ފަރާތަށް ބަހެއް ދަތުރުކުރަން އުޅުމުގެ ތެރޭގައެވެ. ބަހުގެ ޑްރައިވަރު ރޭލު ދަގަނޑު ހުރަސްކުރަން މަސައްކަތް ކޮށްފައި ވަނީ، ރޭލެއް އަންނަ ކަމުގެ އިންޒާރުގެ ރަނގަބީލު ޖަހަމުންދިޔަ ވަގުތެއްގައެވެ. އަދި، ރޭލު ދަގަނޑު މަތިން ހުރަސްކުރަން އުޅުނު ވަގުތު، ބާރު ދުވެލީގައި ދުއްވާފައި ދިޔަ ރޭލު ވަނީ ބަހުގައި ޖެހިފައެވެ.
މި ހާދިސާގައި މަރުވި މީހުންގެ ތެރޭގައި ހިމެނެނީ ހަތަރު އަންހެނުންނާއި ދެ ފިރިހެނުން ކަމުގައި ލޭގޯސްގެ ކުއްލި ހާލަތްތަކުގައި ހަރަކާތްތެރިވާ އިދާރާގެ އިސް އޮފިޝަލެއް ކަމުގައިވާ އިބްރާހީމް ފަރިންލޮޔޭ ވިދާޅުވިއެވެ. މި ހާދިސާގައި އިތުރު 74 މީހަކަށް އެކިވަރުގެ އަނިޔާތައް ލިބުނު ކަމުގައި އޭނާ ވިދާޅުވިއެވެ. އަދި، ބައެއް މީހުންގެ ހާލު ސީރިޔަސް ކަމަށާއި، މަރުވި މީހުންގެ ޢަދަދު އިތުރުވުމަކީ އެކަށީގެންވާ ކަމެއް ކަމުގައި ވެސް އޭނާ ވިދާޅުވިއެވެ.
މި ހާދިސާގައި ބަހަށް ލިބިފައިވާ ގެއްލުންތަކުގެ ސަބަބުން، ބަހުގެ ތެރޭގައި ތާށިވި މީހުން ސަލާމަތްކުރުމަށް ގިނަ ވަގުތެއް ހޭދަވިއެވެ. ބަހުގެ ޑްރައިވަރު މި ހާދިސާގައި ޒިންމާވާން ޖެހޭނެ ކަމަށާއި، އޭނާއާ ދެކޮޅަށް ފިޔަވަޅުތަ އަޅާނެ ކަމުގައި ވެސް ފަރިންލޮޔޭ ވިދާޅުވިއެވެ. ނައިޖީރިޔާއަކީ މި ފަދަ އެކްސިޑެންޓުތައް ގިނަ ޤައުމެއް ކަން ފާހަގަކުރެވެއެވެ. މި ކަމަށް މަގުފަހިވާ އެއް ސަބަބަކީ، ބާރު ސްޕީޑުގައި ދުއްވުމާއި، މަގުތަކުގެ ފެންވަރު ދަށްވުމާއި، މަގުމަތީގެ ޤަވާޢިދުތަކަށް އިޙުތިރާމު ނުކުރުމެވެ.