ޖަރުމަނުވިލާތުގެ ހެމްބަރގްގައި ހުންނަ ނަޞާރާދީނުގެ ފައްޅިއެއްގައި ބަޑިޖަހައި ޢާންމުންގެ ހަ މީހުން މަރައިލައިފިއެވެ. މި ހަމަލާގައި އިތުރު އަށް މީހަކު ޒަޚަމުވެފައިވާއިރު، އޭގެ ތެރޭގައި މާބަނޑު އަންހެނެއް ވެސް ހިމެނެއެވެ. މި ހަމަލާގައި އޭނާގެ ބަނޑުގައި އޮތް ދަރިފުޅު ވެސް ވަނީ މަރުވެފައެވެ.
ފައްޅިއަށް ބަޑީގެ ހަމަލާތައް ދީފައި ވަނީ އުމުރުން 35 އަހަރުގެ ފިލިޕް އެފް ކިޔާ ޖަރުމަނު މީހެކެވެ. އޭނާއަކީ ނަޞްރާނީއެކެވެ. ފައްޅީގެ ބޭރުގައި ހުރެ، ކުޑަދޮރު ތެރެއިން އެ ތަނުގައި ތިބި މީހުންނާ އަމާޒުކޮށް ބަޑީގެ ހަމަލާތަކެއް ދިނުމަށްފަހު، އޭނާ ފައްޅީގެ ތެރެއަށް ވަދެފައިވާ ކަމުގައި ހެމްބަރގްގެ ފުލުހުން ބުނެއެވެ. އަދި، ފުލުހުން އެ ތަނަށް ހާޒިރުވުމުގެ ކުރިން އޭނާ ވަނީ އަމިއްލަ ފުރާނަ ނަގައިލައިގެން މަރުވެފައެވެ.
ފިލިޕް އެފް މި ފަދަ ހަމަލާއެއް ދޭން އުޅޭ ކަމުގެ މަޢުލޫމާތު ކުރިން ފުލުހުންނަށް ލިބިފައިވާ ކަމުގައި ހެންބަރގްގެ އޮފިޝަލުން ވިދާޅުވެއެވެ. ނަމަވެސް، އޭނާ ރަޖިސްޓަރީ ކޮށްގެން ގެންގުޅޭ ހަތިޔާރު ފުލުހުން އަތުލާފައެއް ނުވެއެވެ. އޭނާ މި ހަމަލާދީފައި ވަނީ ކޮން ސަބަބަކާ ގުޅިގެން ކަން އަދި ސާފުވެފައި ނުވާ ކަމަށް ވެސް އޮފިޝަލުން ވިދާޅުވެއެވެ.
ފަހަކަށް އައިސް ޖަރުމަނުވިލާތުގައި ދޭ މި ފަދަ ބަޑީގެ ހަމަލާތައް ވަނީ އިތުރުވެފައެވެ. އަދި، ހަތިޔާރު އެޅި ޖަމާޢަތަކުން ދާދިފަހުން ވަނީ، ހަތިޔާރު ބޭނުންކޮށް ބަޣާވާތެއް ހިންގައި، އެ ޤައުމުގެ ސަރުކާރު ވައްޓައިލަން ވެސް މަސައްކަތް ކޮށްފައެވެ. ކުރިން ދީފައިވާ މި ފަދަ ހަމަލާތަކާ ގުޅިގެން ޖަރުމަނު ސަރުކާރުން ވަނީ ހަތިޔާރު ގެންގުޅުމަށް ޢާންމުންނަށް ހުއްދަ ދިނުމުގެ ކަންކަން އިތުރަށް ހަރުކަށި ކޮށްފައެވެ.
ހެމްބަރގްގައި ދިން ހަމަލާއަށްފަހު ފިލިޕް އެފް ދިރިއުޅޭ އެޕާޓްމަންޓް ބަލައިފާސްކުރުމުން، ގިނަ ޢަދަދެއްގެ ހަތިޔާރު ފެނިފައިވާ ކަމަށް ފުލުހުން ބުނެއެވެ. ހަމަލާގެ ކުރިން ވެސް ފުލުހުން ވަނީ އޭނާ ދިރިއުޅޭ އެޕާޓްމަންޓް ބަލައިފާސްކޮށްފައެވެ. ނަމަވެސް، ފުލުހުންގެ ބެލުމުގެ ދަށަށް އެއްވެސް ހަތިޔާރެއް ގެންގޮސްފައެއް ނުވެއެވެ.
ފިލިޕް ދިން ހަމަލާގައި މަރުވެފައި ވަނީ ހަތަރު ފިރިހެނުންނާއި ދެ އަންހެނުންނެވެ. މި ހަމަލާގައި ޒަޚަމުވި މީހުންގެ ތެރޭގައި ޔުގާންޑާގެ ރައްޔިތަކާއި ޔޫކްރެއިނުގެ ރައްޔިތެއް ވެސް ހިމެނެއެވެ. ފައްޅިއަށް ބަޑީގެ ހަމަލާތައް ދިން ވަގުތު އެ ތަނުގެ ތެރޭގައި 50 އަށްވުރެ ގިނަ މީހުން ތިބި ކަމުގައި ފުލުހުން ބުނެއެވެ.
ޖަރުމަނުވިލާތުގައި 2020 ވަނަ އަހަރު ހިނގި މި ފަދަ އެހެން ހާދިސާއެއްގައި ނުވަ މީހުން ވަނީ މަރައިލާފައެވެ. ހުޅަނގުގައި އޮންނަ ހަނާއޫ ކިޔާ ކުޑަ ރަށެއްގައި ހިނގި މި ހާދިސާގައި، ހަމަލާދިން މީހާ ވަނީ އޭނާގެ މައިމީހާ ވެސް މަރައިލާފައެވެ. އޭނާ ވެސް ވަނީ އަމިއްލަ ފުރާނަ ނަގައިލާފައެވެ. 2019 ވަނަ އަހަރު ޔަހޫދީންގެ ފައްޅިއަކަށް ދިން ހަމަލާއެއްގައި ވެސް ދެ މީހުން ވަނީ މަރައިލާފައެވެ.