ވައިގެ ތެރޭގައި އުފެދިފައިވާ އާދަޔާޚިލާފު "އެޓްމޮސްފެރިކް" ކޯރެއްގެ ސަބަބުން އެމެރިކާގެ ހުޅަނގުގައިވާ ކެލިފޯނިޔާ ސްޓޭޓްގެ ސަރަޙައްދުތަކަށް ބޯކޮށް ވާރޭވެހި، ގިނަ ސަރަޙައްދުތަކެއްގައި ފެންބޮޑުވެއްޖެއެވެ. ފެންބޮޑުވުމާ ގުޅިގެން އެއްވެސް މީހެއްގެ ފުރާނައަށް ނުރައްކާވިކަމުގެ ރިޕޯޓެއް ކޮށްފައެއް ނެތެވެ. ނަމަވެސް، ފެންބޮޑުވުމުގައި ޢާންމުންގެ ގެދޮރާއި މުދަލަށް ވަނީ ބޮޑެތި ގެއްލުންތަކެއް ލިބިފައެވެ.
"އެޓްމޮސްފެރިކް ރިވަރ"އޭ ކިޔެނީ، ވައިގެ ތެރޭގައި އުފެދިފައިވާ ވިއްސާރަ ވިލާގަނޑުގެ ކޯރަކަށެވެ. މި ވިއްސާރައިގެ ސަބަބުން ކެލިފޯނިޔާގެ ކޯރުތައް ފުރިގެން ބަންޑުންވުމާއި، ކޯރުތަކުގައި ޖަހާފައިވާ އެއްގަމު ތޮށިތަކުގެ ރައްކާތެރިކަން ކަށަވަރު ކުރުމަށް އޮފިޝަލުން ދަނީ މަސައްކަތް ކުރަމުންނެވެ.
އެޓްމޮސްފެރިކް ކޯރުގެ ސަބަބުން ބޯކޮށް ވާރޭވެހިފައިވާ ގިނަ ސަރަޙައްދުތަކަކީ، ފާއިތުވި ދެ ހަފުތާއެއްހާ ދުވަހުގެ ތެރޭގައި ކެލިފޯނިޔާއަށް ކުރިމަތިވި ސްނޯގެ ތޫފާނެއްގައި ބޯކޮށް ސްނޯ ފައިބާފައިވާ ސަރަޙައްދުތަކެކެވެ. ސްނޯގެ ތޫފާނާ ގުޅިގެން ހިނގި އެކި ހާދިސާތަކުގައި އަށް މީހުން މަރުވިއެވެ. މަރުވި މީހުންގެ ތެރޭގައި ގިނައީ އުމުރުން ދުވަސްވީ މީހުންނެވެ. އެ މީހުން މަރުވާން މެދުވެރިވި ސަބަބު ދެނެގަތުމަށް ކެލިފޯނިޔާގެ އޮފިޝަލުން ދަނީ ތަހުޤީޤު ކުރަމުންނެވެ.
ބޯކޮށް ވާރޭވެހުމުގެ ސަބަބުން ފެންބޮޑުވުމާ ކުރިމަތިވެފައިވާ ސަރަޙައްދުތަކުގެ ތެރޭގައި ލޮސް އެންޖެލެސް، ސެން ފްރެންސިސްކޯ އަދި ސެކްރެމެންޓޯ ހިމެނެއެވެ. މީގެ އިތުރުން، ސެން ޑިއޭގޯއާއި މެކްސިކޯގެ ސަރަޙައްދީ ރޮނގު ކައިރީގައި އޮންނަ ސަރަޙައްދުތަކަށް ވެސް ފެންބޮޑުވެދާނެ ކަމުގެ އިންޒާރު ވަނީ ނެރެފައެވެ. ބައެއް ސަރަޙައްދުތަކަށް 76 މިލިމީޓަރާއި 254 މިލިމީޓަރާއި ދެމެދުގެ ވާރޭވެހިފައިވާ ކަމުގައި އެމެރިކާގެ ޤައުމީ މޫސުމާ ބެހޭ ޚިދުމަތް (އެން.ޑަބްލިޔު.އެސް) އިން ބުނެއެވެ.
ކެލިފޯނިޔާއަށް ބޯކޮށް ވާރޭވެހި ފެންބޮޑުވުމާ ގުޅިގެން ރައީސް ޖޯ ބައިޑަން ވަނީ އެ ސަރަޙައްދުގައި ކުއްލި ހާލަތު އިޢުލާނު ކުރައްވާފައެވެ. އަދި، ކެލިފޯނިޔާގެ ރަށްތަކުގައި ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އޭނާ ވަނީ އިރުޝާދު ދެއްވާފައެވެ. ފެންބޮޑުވުމުގެ އަސަރުކޮށްފައިވާ ސަރަޙައްދުތަކުގައި 26 މިލިޔަނަށްވުރެ ގިނަ މީހުން ދިރިއުޅެއެވެ.
މިއީ، އެ ސަރަޙައްދުގައި އުފެދިފައިވާ "އެޓްމޮސްފެރިކް ރިވަރ"ގެ ސަބަބުން ހުސްވި އަހަރުގެ ޑިސެންބަރު މަހުގެ ފަހުކޮޅުން ފެށިގެން މިހާތަނަށް އެ ސަރަޙައްދަށް ބޯކޮށް ވާރޭވެހި، ފެންބޮޑުވުމާ ކުރިމަތިވި 10 ވަނަ ފަހަރު ކަމުގައި އެން.ޑަބްލިޔު.އެސް.އިން ބުނެއެވެ. ފެންބޮޑުވެފައިވާ ސަރަޙައްދުތަކުގައި ދިރިއުޅޭ 2,000 އަށްވުރެ ގިނަ މީހުން މިހާރު ވަނީ ރައްކާތެރި ހިސާބުތަކަށް ބަދަލުކޮށްފައެވެ.