ފާއިތުވި 24 ގަޑިއިރުގެ ތެރޭގައި ޔޫކްރެއިނުގެ އިރުމަތީގައިވާ ބަޚްމުތްގައި ކުރަމުންދާ ހަނގުރާމައިގައި އެތަކެއް ސަތޭކަ ސިފައިން މަރުވެފައިވާ ކަމުގައި ރަޝިޔާއާއި ޔޫކްރެއިނުން ބުނެފިއެވެ. ޔޫކްރެއިނުގެ ދޮންބާސް ސަރަޙައްދުގެ ޑޮނެޓްސްކުގެ ރަށެއް ކަމުގައިވާ ބަޚްމުތް ހިފުމަށް ރަޝިޔާއިން މަސައްކަތް ކުރަމުންދާތާ މިހާރު ހަތް މަސް ފާއިތުވެއްޖެއެވެ.
ޔޫކްރެއިނުގެ އަސްކަރިއްޔާގެ އިސް އޮފިޝަލެއް ކަމުގައިވާ ސެރްހީ ޗެރެވަތްޔީ ވިދާޅުވީ، ބަޚްމުތްގައި ހިނގަމުންދާ ހަނގުރާމައިގައި ފާއިތުވި 24 ގަޑިއިރުގެ ތެރޭގައި ރަޝިޔާގެ 221 ސިފައިން މަރުވެފައިވާ ކަމުގައެވެ. އަދި، 300 އަށްވުރެ ގިނަ ރަޝިޔާ ސިފައިން ޒަޚަމުވެފައިވާ ކަމުގައެވެ.
ރަޝިޔާގެ ދިފާޢީ ވުޒާރާއިން ވެސް ބުނީ، ބަޚްމުތް ދިފާޢުކުރަން ހަނގުރާމަ ކުރަމުންދާ ޔޫކްރެއިނު ސިފައިންގެ ގިނަ ޢަދަދެއްގެ ބަޔަކު މަރުވެފައިވާ ކަމުގައެވެ. ބަޚްމުތްގައި މަރުވެފައިވާ ޔޫކްރެއިނު ސިފައިން ޢަދަދު ރަޝިޔާގެ ދިފާޢީ ވުޒާރާއިން ހާމަކޮށްފައި ނުވި ނަމަވެސް، ޑޮނެޓްސްކް ސަރަޙައްދުގައި ހަރަކާތްތެރިވަމުންދާ ޔޫކްރެއިނުގެ 210 ސިފައިން މަރުވެފައިވާ ކަމުގައި ރަޝިޔާގެ ދިފާޢީ ވުޒާރާއިން ބުންޏެވެ.
ބަޚްމުތް ހިފުމަށް ކުރަމުންދާ ހަނގުރާމައިގެ އިސް ސަފުގައި ހަރަކާތްތެރިވަމުން ދަނީ ވެގްނަރ ގުރޫޕުގެ ކުލީ ސިފައިންނާއި، ރަޝިޔާގެ އަސްކަރިއްޔާގެ އެންމެ ޚާއްޞަ ފައުޖުތަކެވެ. އެ ފައުޖުތަކުން ބަޚްމުތްގެ އިރުމަތީގެ ސަރަޙައްދުތަކަށް މިހާރު އަތްގަދަކޮށްފައިވާ ކަމުގައި އިނގިރޭސިވިލާތުގެ ޖާސޫސީ އިދާރާއިން ހާމަކުރެއެވެ. އަދި، ބަޚްމުތްގެ ހާލަތު ބަދަލުވެފައިވާ ކަމުގައި ވެސް އިނގިރޭސިވިލާތުގެ ދިފާޢީ ވުޒާރާއިން ބުނެއެވެ.
ނަމަވެސް، ބަޚްމުތް އަދިވެސް އޮތީ ޔޫކްރެއިނުގެ ބާރުގެ ދަށުގައި ކަމަށް އެ ޤައުމުގެ އަސްކަރިއްޔާއިން ދަނީ ބުނަމުންނެވެ. އަދި، ބަޚްމުތަކީ ރަޝިޔާއިން އަތްގަދަކޮށްފައިވާ ސަރަޙައްދުތައް މިނިވަންކުރުމަށް ފެށުމަށް ތައްޔާރުވަމުންދާ އަސްކަރީ ކެމްޕޭނަށް މުހިންމު ރަށެއް ކަމުގައި ވެސް ޔޫކްރެއިނުން ބުނެއެވެ.
2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އެރުމުގެ ކުރިން ބަޚްމުތަކީ 80,000 އެއްހާ މީހުންގެ އާބާދީއެއް ދިރިއުޅެމުންދިޔަ، ސިނާޢީ މަސައްކަތްކުރާ ރަށެކެވެ. ނަމަވެސް، މިހާރު އެ ރަށުގައި ދިރިއުޅެމުނީ އެންމެ 4,000 އެއްހާ މީހުންނެވެ.