2020 ވަނަ އަހަރު ދުނިޔެއަށް ކުރިމަތިވި ކޮރޯނާވައިރަސް ޑިޒީޒް ނުވަތަ ކޮވިޑް-19ގެ ބަލިމަޑުކަމުގެ ފެށުން ހޯދުމަކީ ވަރަށް މުހިންމު ކަމެއް ކަމުގައި ވިދާޅުވެ، ބަލީގެ ފެށުން ހޯދުމަށް ކުރަމުންދާ މަސައްކަތްތައް ހުއްޓުމެއް ނެތި ކުރާނެ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)ގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވިދާޅުވެއްޖެއެވެ.
މިއީ، ކޮވިޑް-19ގެ ބަލިމަޑުކަން ފެށުނު ގޮތެއް ހޯދާނެ ކަމަށް ޓެޑްރޯސް އެންމެ ހަރުކަށިކޮށް ވިދާޅުވެފައިވާ ފުރަތަމަ ފަހަރެވެ. ޓެޑްރޯން މިހެން ވިދާޅުވެފައި މި ވަނީ، ކޮވިޑް-19ގެ ބަލިމަޑުކަން ފެށުނީ ޗައިނާގެ ލެބޯޓްރީއަކުން އެ ބަލީގެ ވައިރަސް ލީކުވުމުގެ ސަބަބުން ކަމަށް އެމެރިކާގެ ހަކަތައާ ބެހޭ އިދާރާއިން ބުނެފައިވާ ދަނޑިވަޅެއްގައެވެ. އެ އިދާރާއިން އެހެން ބުނުމާ ގުޅިގެން، ކޮވިޑްގެ ފެށުން ހޯދުމަށް އިތުރު މަސައްކަތްތަކެއް ކުރުމަށް ޑަބްލިޔު.އެޗް.އޯ.އަށް ވަނީ ބާރުބޮޑުވެފައެވެ.
"ކޮވިޑް-19ގެ ފެށުމާ ގުޅޭގޮތުން ޤަބޫލުކުރެވޭ ހުރިހާ ކަމެއް ދިރާސާކުރުމަކީ ސައިންސްގެ ދާއިރާއަށް މަޖުބޫރުކަމެއް. އަދި، ކުރިއަށް އޮތް ތަނުގައި މި ފަދަ ބަލިމަޑުކަމެއް ފެތުރުނަ ނުދިނުމަށް ކޮންމެހެން ބޭނުންވާ، އަޅަންޖެހޭ މުހިންމު ފިޔަވަޅެއް. އެ ބަލީގައި މަރުވި އެތަކެއް މިލިޔަން މީހުންނަށް ޓަކައި ވެސް ކުރަން ޖެހޭ ކަމެއް،" ޓެޑްރޯސް ވިދާޅުވިއެވެ.
ކޮވިޑް-19ގެ ވައިރަސް އިންސާނުންނާ ހަމައަށް ވާސިލުވެފައި ވަނީ ޗައިނާގެ ލެބޯޓްރީއެއްގެ ތެރެއިން ލީކުވުމުގެ ސަބަބުން ކަމަށް އެމެރިކާގެ ހަތަކައާ ބެހޭ އިދާރާއިން ނިންމާފައިވާ ކަން ހާމަވެފައި ވަނީ، އެ އިދާރާގެ ޑިރެކްޓަރ އޮފް ނޭޝަނަލް އިންޓެލިޖެންސް އެކްރިލް ހެއިންސްގެ އޮފީހުން ތައްޔާރުކޮށްފައިވާ ރިޕޯޓަކުންނެވެ. އެއީ، ސިއްރުކޮށްފައިވާ ލިޔުމެއް ނަމަވެސް، އެ ރިޕޯޓާ ބެހޭ ގޮތުން އެމެރިކާގެ ނޫސްތަކެއް ކަމުގައިވާ ދަ ވޯލް ސްޓްރީޓް ޖަރނަލްއާއި ދަ ނިއު ޔޯކް ޓައިމްސްއަށް ވަނީ މަޢުލޫމާތު ދީފައެވެ. ނަމަވެސް، ޗައިނާއިން ދަނީ އެ ތުހުމަތު ދޮގުކުރަމުންނެވެ.
މި ބަލި ޖެހިފައިވާ މީހަކު އެންމެ ފުރަތަމަ ފެނިފައި ވަނީ ޗައިނާގެ ވޫހާންގެ މާރުކޭޓެއް ހުންނަ ސަރަޙައްދަކުންނެވެ. އަދި، 2021 ވަނަ އަހަރު ޑަބްލިޔު.އެޗް.އޯ.ގެ ސައިންސްވެރިންނާއި ތަހުޤީޤީ ޓީމުތަކުން ވަނީ ވޫހާންއަށް ދަތުރުކޮށް، ބަލީގެ ފެށުން ހޯދުމަށް ތަހުޤީޤު ކޮށްފައެވެ.
އެ ތަހުޤީޤަށް ފަހު ހާމަކޮށްފައިވާ ރިޕޯޓުގައި ބުނެފައި ވަނީ، މި ބަލި އިންސާނުންގެ ހަށިގަނޑަށް ދަތުރުކޮށްފައި ވަނީ ވައުލުގެ ފުށުން ކަމަށް ބެލެވޭ ކަމުގައެވެ. އަދި، އެ ކަން ކަށަވަރުކުރުމަށް އިތުރު ދިރާސާތައް ކުރަން ބޭނުންވާ ކަމުގައި ވެސް ޑަބްލިޔު.އެޗް.އޯ.އިން ވަނީ ބުނެފައެވެ. ނަމަވެސް، ޗައިނާއިން ވަނީ ތަހުޤީޤީ ޓީމުތަކަށް އެ ޤައުމަށް ދަތުރުކުރުމަށް އިތުރު ފުރުޞަތެއް ދިނުމަށް ދެކޮޅު ހަދާފައެވެ.
ކޮވިޑް-19 ބަލި އެންމެ ފުރަތަމަ ފެނިފައި ވަނީ ވޫހާންއިން ނަމަވެސް، ކުޑަ ދުވަސްކޮޅެއްގެ ތެރޭގައި ދުނިޔޭގެ އެކި ކަންކޮޅުތަކަށް މި ބަލި ހަލުވިކަމާ އެކު ފެތުރެން ފެށިއެވެ. އަދި، މުޅި ދުނިޔެ ހުއްޓުމަކަށް ގެނުވިއެވެ. މި ބަލީގައި ދުނިޔޭގެ އެކި ކަންކޮޅުތަކުގައި މަރުވެފައިވާ މީހުންގެ ޢަދަދު މިހާރު ހަތް މިލިޔަނާ ގާތްކުރެއެވެ.
މި ބަލީގެ ފެށުން ހޯދުމަށް ޑަބްލިޔު.އެޗް.އޯ.އިން ވެސް ދަނީ ހުއްޓުމެއް ނެތި މަސައްކަތް ކުރަމުންނެވެ. އަދި، ބަލީގެ ވައިރަސް ފެށިފައި ވަނީ ލެބޯޓްރީއަކުން ނޫން ކަމަށް ޑަބްލިޔު.އެޗް.އޯ.އިން ވެސް ޤަބޫލުކުރާ ކަމަށް ޗައިނާއިން ބުނެއެވެ.