ރަޝިޔާގެ ނިއުކްލިޔަރ ހަތިޔާރު ބެލަރުސްގައި ބަހައްޓަން ނިންމާފައިވާއިރު، އެ ހަތިޔާރުތައް ބެހެއްޓުމަށް ހަމަޖެހިފައި ވަނީ ބެލަރުސްގެ ހުޅަނގު ފަރާތުގައި ނޭޓޯގެ މެންބަރު ޤައުމުތަކުގެ ސަރަޙައްދީ ރޮނގު ކައިރީގައި ކަން ހާމަކޮށްފިއެވެ. މި ކަން ހާމަކުރައްވާފައި ވަނީ ބެލަރުސްއަށް ރަޝިޔާއިން ކަނޑައަޅާފައި ހުންނަވާ ސަފީރު ބޮރިސް ގްރިޒްލޮފެވެ.
މި ނިންމުމާ އެކު ރަޝިޔާއާއި ނޭޓޯއާ ދެމެދު އުފެދިފައިވާ ކޯޅުންގަނޑު ގޯސްވެ، މަސްރަޙު އިތުރަށް ހޫނުވާނެ ކަމަށް މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. މިއީ، ޔޫކްރެއިނަށް ސިފައިން ފޮނުވައިގެން ރަޝިޔާއިން ފަށާފައިވާ ހަނގުރާމައަށް 13 މަސް ފުރިފައިވާއިރު، ރަޝިޔާއިން މިހާތަނަށް ދީފައިވާ އެންމެ ނުރައްކާތެރި "ނިއުކްލިޔަރ" ސިގްނަލެވެ. ބެލަރުސްގައި ރަޝިޔާގެ "ޓެކްޓިކަލް" ނިއުކްލިޔަރ ހަތިޔާރު ބަހައްޓާނެ ކަން ރައީސް ވްލަޑިމިޔަރ ޕުޓިން އިޢުލާނު ކުރައްވާފައި ވަނީ މާރިޗު މަހުގެ 26 ވަނަ ދުވަހުއެވެ.
ރަޝިޔާއާއި ބެލަރުސްއަކީ ވަރަށް ގާތް ގުޅުމެއް ބާއްވަމުންދާ ދެ ޤައުމެވެ. އަދި، ޔޫކްރެއިނުގައި ކުރަމުންދާ ހަނގުރާމައިގައި ބެލަރުސްއިން ތާޢީދުކުރަނީ ރަޝިޔާއަށެވެ. ހަނގުރާމަ ފެށުމަށް ޔޫކްރެއިނަށް އެރި ރަޝިޔާގެ އެންމެ ފުރަތަމަ ފައުޖުތަކުގެ ތެރެއިން ބައެއް ފައުޖުތައް ޔޫކްރެއިނަށް އެތެރެވެފައި ވަނީ ވެސް ބެލަރުސް މަގުންނެވެ.
"ރަޝިޔާގެ ނިއުކްލިޔަރ ހަތިޔާރުތައް ގާއިމުކުރަން ނިންމާފައި ވަނީ ބެލަރުސްގެ އިރުމަތީ ސަރަޙައްދީ ރޮނގު ކައިރީގައި. އެއީ ނޭޓޯގެ ބޯޑަރު ކައިރި. ބޭނުމަކީ ރަޝިޔާގެ ސަލާމަތާއި ރައްކާތެރިކަން ކަށަވަރު ކުރުން. އެމެރިކާއާއި ވިލާތުން މި ކަމާ ނުރުހުންފާޅު ކުރި ނަމަވެސް، މި ކަން ކުރާނަން،" ގްރިޒްލޮފް ވިދާޅުވިއެވެ.
ރަޝިޔާގެ ނިއުކްލިޔަރ ހަތިޔާރު ބަހައްޓާނީ ކޮން ތަނެއްގައި ކަން ސާފުކޮށްދީފައި ނުވި ނަމަވެސް، ޕުޓިންގެ އެންގެވުމާ އެއްގޮތަށް ޖުލައި މަހުގެ 1 ވަނަ ދުވަހުގެ ކުރިން، ނިއުކްލިޔަރ ހަތިޔާރުތައް ބަހައްޓަން ބޭނުންކުރާނެ ޢުމްރާނީ ވަސީލަތްތައް ބިނާކޮށް ނިންމާނެ ކަމުގައި ވެސް ގްރިޒްލޮފް ވިދާޅުވިއެވެ.
ބެލަރުސްއަކީ ނޭޓޯގެ ތިން ޤައުމަކާ އެކު ސަރަޙައްދީ ރޮނގު ހިއްސާކުރާ ޤައުމެކެވެ. އެ ޤައުމުގެ އުތުރުން އޮންނަނީ ލެޓްވިޔާއާއި ލިތުއޭނިޔާއެވެ. އަދި، ހުޅަނގުގައި އޮތީ ޕޮލެންޑެވެ. އެ ތިން ޤައުމަކީ ވެސް ނޭޓޯގެ މެންބަރުންނެވެ. ޔޫކްރެއިން ހަނގުރާމަ ފެށުމާ އެކު ނޭޓޯއިން ވަނީ އެ ތިން ޤައުމުގައި ވެސް ސަލާމަތީ ފިޔަވަޅުތައް ވަރުގަދަކޮށް، އިތުރު ސިފައިންނާއި ހަތިޔާރު ގާއިމުކޮށްފައެވެ.
ބެލަރުސްގައި ނިއުކްލިޔަރ ހަތިޔާރު ބަހައްޓަން ރަޝިޔާއިން ނިންމުމާ ގުޅިގެން އެމެރިކާއާއި ހުޅަނގުން ވަނީ ކަންބޮޑުވުން ފާޅުކޮށްފައެވެ. އެމެރިކާގެ ރައީސް ޖޯ ބައިޑަން ވިދާޅުވެފައި ވަނީ މިއީ ވަރަށް ބޮޑަށް ކަންބޮޑުވާ މައްސަލައެއް ކަމުގައެވެ.
ނަމަވެސް، ޕުޓިންގެ ގާތް އެކުވެރިއެއް ކަމުގައިވާ ބެލަރުސްގެ ރައީސް އެލެގްޒެންޑަރ ލުކަޝެންކޯ ވަނީ، ރަޝިޔާގެ އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)ތައް ވެސް ބެލަރުސްގައި ބަހައްޓަން ހުއްދަ ދިނުމަށް އެ ޤައުމުން ފަސް ނުޖެހޭނެ ކަމަށް ވިދާޅުވެފައެވެ. އައި.ސީ.ބީ.އެމް.އަކީ އެހެން ޤައުމަކަށް ނިއުކްލިޔަރ ހަމަލާއެއް ދިނުމަށް ވެސް ބޭނުން ކުރެވޭ ފަދަ ދުރު ރާސްތާގެ މިސައިލެކެވެ.