އެމެރިކާގެ ކުރީގެ ރައީސް ޑޮނަލްޑް ޓްރަމްޕް ފުލުހުންގެ ބެލުމުގެ ދަށަށް ގެންގޮސްފިއެވެ. އޭނާ ހައްޔަރުކޮށްފައިވަނީ ނިއު ޔޯކްގެ މެންހެޓަން ޑިސްޓްރިކްޓް އެޓަރނީގެ އޮފީހުންނެވެ. އޭނާ ހައްޔަރުކޮށްފައިވަނީ އޭނާއާ ދެކޮޅަށް ދަޢުވާ އުފުލާފައިވާ މައްސަލައެއްގައި ކޯޓަށް ހާޒިރުކުރުމަށެވެ.
ޓްރަމްޕުގެ މައްޗަށް ޖިނާޢީ ދަޢުވާ އުފުލާފައިވަނީ، 2016 ވަނަ އަހަރުގެ ރިޔާސީ އިންތިޚާބާ ދިމާކޮށް މީހަކަށް ރިޝްވަތު ދިނުމުގެ ކުށުގެ ތުހުމަތުގައެވެ. މިއީ، އެމެރިކާގެ ކުރީގެ ރައީސަކާ ދެކޮޅަށް ޖިނާޢީ ކުށެއްގެ ދަޢުވާ އުފުލާފައިވާ ފުރަތަމަ ފަހަރެވެ. އަދި، އޭނާއަކީ 2024 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެ ކަން އިޢުލާނު ކުރައްވާފައިވާ ބޭފުޅެކެވެ. ރިޕަބްލިކަން ޕާޓީގެ ޓިކެޓް އޭނާ ކާމިޔާބު ކުރައްވާނެ ކަމަށް ގިނަ ބަޔަކު ގަބޫލުކުރެއެވެ.
މެންހެޓަން ޑިސްޓްރިކްޓް އެޓަރނީގެ އޮފީހުން ޓްރަމްޕާ ދެކޮޅަށް ތަހުޤީޤު ފަށާފައި ވަނީ 2016 ވަނަ އަހަރުގެ ރިޔާސީ އިންތިޚާބާ ގާތްވެފައިވާ ދަނޑިވަޅެއްގައި އޭނާ ރިޝްވަތު ދިނުމުގައި ބައިވެރިވެފައިވާ ކަމުގެ ކުށުގެ ތުހުމަތުގައެވެ. އޭނާ ރިޝްވަތު ދީފައިވާ ކަމަށް ބެލެވެނީ ސްޓޯމީ ޑެނިއެލްސް ކިޔާ އަންހެނަކަށެވެ. އެއީ، އޮރިޔާންކާޑު އުފައްދާ މީހެކެވެ. އޭނާއަށް ރިޝްވަތުގެ ފައިސާ ދީފައި ވަނީ، ޓްރަމްޕާއި އޭނާއާ މެދު ކުރިން ހިނގާފައިވާ ލޯބީގެ ގުޅުމުގެ މަޢުލޫމާތު ސިއްރު ކުރުމުގެ ނިޔަތުގައެވެ. ރިޝްވަތާ ގުޅޭ އަދި ލޯބީގެ ގުޅުމާ ގުޅޭ ތުހުމަތުތައް ވެސް ޓްރަމްޕް ދޮގުކުރައްވައެވެ.
ޓްރަމްޕު ހައްޔަރުކުރުމަށްފަހު ކުށުގެ ތުހުމަތުގައި ހައްޔަރުކުރާ އެހެން މީހުންނެކޭ އެއްފަދައިން އޭނާގެ އިނގިލީގެ ނިޝާން ނަގާފައިވާ ކަމަށް އެމެެރިކާގެ ނޫސްތަކުން ރިޕޯޓުކުރެއެވެ. ނަމަވެސް، އޭނާގެ “މަގް ޝޮޓް” ފޮޓޯއެއް ނަގާފައިވާ ކަން އަދި ކަށަވަރު ނުވާ ކަމަށް ރިޕޯޓުކޮށްފައިވެއެވެ.
ހައްޔަރުކުރުމަށްފަހު ޓްރަމްޕް ކޯޓަށް ހާޒިރުކުރުމަށް ހަމަޖެހިފައިވާއިރު، މިއީ އެމެރިކާގެ ތާރީޚުގައި ވެސް އެ ޤައުމުގެ ރައީސް ކަމުގެ މަޤާމު ފުރުއްވާފައިވާ ބޭފުޅަކު ޖިނާޢީ މައްސަލައެއްގައި ކޯޓަށް ހާޒިރުކުރާ ވެސް ފުރަތަމަ ފަހަރެވެ. ޓްރަމްޕުގެ އަތުގައި ބިޑި އަޅުވާފައި ނުވާއިރު، އޭނާ މިހާރު ހުރީ ފުލުހުންގެ ރައްކާތެެރިކަމުގެ ދަށުގައެވެ.
ކޯޓުގައި ބާއްވާ އަޑުއެހުން ލައިވްކޮށް ދުރަށް ދެއްކުމުގެ ހުއްދައަށް މީޑިޔާތަކުން އެދިފައިވީ ނަމަވެސް، މި މައްސަލަ ބައްލަވާ ޣާޒީ އެ ކަމަށް ހުއްދަ ދެއްވާފައެއް ނުވެއެވެ. ނަމަވެސް، އަޑުއެހުން ފެށުމުގެ ކުރިން އޭނާގެ ފޮޓޯ ނަގައި ޢާންމު ކުރާނެއެވެ.
ޓްރަމްޕާ ދެކޮޅަށް މެންހެޓަން ޑިސްޓްރިކްޓް އެޓަރނީގެ އޮފީހުން ތަހުޤީޤު ފެށިއިރު، އޭނާ ހުންނެނީ ރައީސް ކަމުގެ މަޤާމުގައެވެ. ސްޓޯމީ ޑެނިއެލްސްއަށް ޓްރަމްޕް 130,000 އެމެރިކާ ޑޮލަރު ރިޝްވަތުގެ ގޮތުގައި ދީފައި ވަނީ އޭނާގެ ޕަރސަނަލް އެޓަރނީގެ ގޮތުގައި އެއިރު މަސައްކަތްކުރި މައިކަލް ކޯހެން މެދުވެރިކޮށް ކަމަށް އެ އޮފީހުން ބުނެއެވެ. އެ ފައިސާ ދޫކޮށްފައި ވަނީ 2016 ވަނަ އަހަރުގެ އޮކްޓޫބަރު މަހު، ރިޔާސީ އިންތިޚާބު ފެށެން ކުޑަ ދުވަސްކޮޅަކަށްވައި ވަނިކޮށެވެ.
އަޑުއެހުމަށް ފަހު ފްލޮރިޑާގެ މާރް-އަ-ލާގޯގައި ހުންނަ ގެކޮޅަށް އޭނާ އެނބުރި ވަޑައިގަންނަވާނެ ކަމަށް ރިޕޯޓުތައް ބުނެއެވެ. އަދި ދަޢުވާތަކަށް ރައްދު ދިނުމުގެ ފުރުޞަތު އޭނާއަށް ލިބިވަޑައިގަންނަވާނެއެވެ. އޭނާ ކޯޓަށް ހާޒިރުކުރުމާ ދިމާކޮށް ނިއު ޔޯކްގައި ސަލާމަތީ ފިޔަވަޅުތައް ވަނީ ވަރަށް ވަރުގަދަކޮށްފައެވެ.