ރަޝިޔާ ސިފައިން ޔޫކްރެއިނަށް އަރައި ފެށި ހަނގުރާމައާ ގުޅިގެން ރަޝިޔާއަށް ހިޖުރަކުރި ރެފިޔުޖީންގެ ތެރޭގައި ޔޫކްރެއިނުގެ 730,000 އަށްވުރެ ގިނަ ޢަދަދަކަށް ކުޑަކުދިން ހިމެނޭ ކަމުގައި ރަޝިޔާއިން ބުނެފިއެވެ. ކުޑަކުދިންގެ ހައްޤުތަކާ ބެހޭ ރަޝިޔާގެ ކޮމިޝަނަރު މާރިޔާ ލްވޯވާ-ބެލޯވާ މި ޢަދަދު ހާމަކުރައްވާފައި ވަނީ، ރަޝިޔާއިން ގަދަބާރުން ގެންގޮސްފައިވާ ޔޫކްރެއިނުގެ ކުޑަކުދިންގެ ފުރިހަމަ މަޢުލޫމާތު ހާމަކުރުމަށް އ.ދ.ގެ އިންސާނީ ހައްޤުތަކާ ބެހޭ ކައުންސިލުން ގޮވައިލުމާ ގުޅިގެންނެވެ.
ހަނގުރާމަ ފެށި ފަހުން ޔޫކްރެއިނުގެ ފަސް މިލިޔަނަށް ވުރެ ގިނަ ރެފިޔުޖީން ރަޝިޔާއަށް ހިޖުރަކުރި ކަމުގައި ލްވޯވާ-ބެލޯވާ ވިދާޅުވިއެވެ. އަދި، އޭގެ ތެރޭގައި 730,000 އެއްހާ ކުޑަކުދިން ހިމެނޭ ކަމަށާއި، ރަޝިޔާއަށް ހިޖުރަކުރި މީހުންގެ ތެރޭގައި ގިނައީ ދޮންބާސްގެ ޖުމްހޫރިއްޔާތަކުގެ ރައްޔިތުން ކަމުގައި ވެސް އޭނާ ވިދާޅުވިއެވެ. ދޮންބާސްގެ ޖުމްހޫރިއްޔާތަކޭ ބުނެ އޭނާ އިޝާރާތް ކުރައްވާފައި އެ ވަނީ، ރަޝިޔާއިން އަތްގަދަކޮށްފައިވާ ޔޫކްރެއިނުގެ އިރުމަތީގައިވާ ދޮންބާސް ސަރަޙައްދަށެވެ. އެ ސަރަޙައްދު ބެހިފައި ވަނީ ލުހާންސްކާއި ޑޮނެޓްސްކުގެ މައްޗަށެވެ.
ނުރުހުމުގައި ޔޫކްރެއިނުގެ ގިނަ ޢަދަދެއްގެ ކުޑަކުދިންތަކެއް ރަޝިޔާއިން ފޭރިގަނެގެން އެ ޤައުމަށް ގެންގޮސްފައިވާ ކަމުގައި ޔޫކްރެއިނާއި އ.ދ.އިން ތުހުމަތުކުރެއެވެ. އެއީ ހަނގުރާމައިގެ ކުށަކަށް ވާއިރު، އެ ކުށުގެ ތުހުމަތުގައި ބައިނަލްއަޤުވާމީ ޖިނާޢީ ކޯޓު (އައި.ސީ.ސީ)އިން ވަނީ ރަޝިޔާގެ ރައީސް ވްލަޑިމިޔަރ ޕުޓިން ހައްޔަރުކުރުމުގެ އަމުރެއް ނެރެފައެވެ. ޕުޓިންގެ އިތުރުން ލްވޯވާ-ބެލޯވާއާ ދެކޮޅަށް ވެސް ހަމަ އެ ކުށުގެ ތުހުމަތުގައި އައި.ސީ.ސީން ވަނީ އަމުރު ނެރެފައެވެ.
ގަދަބާރުން ރަޝިޔާއަށް ގެންގޮސްފައިވާ ޔޫކްރެއިނުގެ ކުޑަކުދިންނާ ގުޅޭ ފުރިހަމަ މަޢުލޫމާތު ހާމަކުރުމަށް އ.ދ.ގެ އިންސާނީ ހައްޤުތަކާ ބެހޭ ކައުންސިލުން ގޮވައިލާފައި ވަނީ، ރަޝިޔާއާ ދެކޮޅަށް އެ ކައުންސިލުން ފާސްކުރި ޤަރާރެއްގައެވެ. ޔޫކްރެއިނުގެ ކުޑަކުދިންގެ އިތުރުން އެ ޤައުމުގެ ޢާންމު ރައްޔިތުންނާއި، ޚާއްޞަކޮށް ރައްކާތެރިކަން ކަށަވަރުކޮށްދޭން ޖެހޭ މީހުން، ރަޝިޔާއަށް ބަދަލުކުރުން ހުއްޓައިލުމަށް މި ޤަރާރުގައި ވަނީ ގޮވައިލާފައެވެ.
މި ޤަރާރު ފާސްވީ 47 މެންބަރުން ހިމެނޭ ކައުންސިލުގެ 28 މެންބަރުންގެ ތާޢީދާ އެކުގައެވެ. މި ޤަރާރާ ދެކޮޅަށް ވޯޓުލާފައި ވަނީ ޗައިނާއާއި އެރިޓްރިޔާއިންނެވެ. އަދި، 17 މެންބަރަކު ވަކި ފަރާތަކަށް ނުޖެހެއެވެ. ރަޝިޔާއަށް ބަދަލުކޮށްފައިވާ ކުޑަކުދިންގެ ތެރެއިން މައިންބަފައިންނާ ވަކިވެފައިވާ އަދި ބެލެނިވެރިއެއްގެ ބެލުމުގެ ދަށުގައި ނެތް ކުދިންގެ ހައްޤުތައް ކަށަވަރު ކޮށްދިނުމަށް ވެސް އ.ދ.ގެ އިންސާނީ ހައްޤުތަކާ ބެހޭ ކައުންސިލުން ވަނީ ރަޝިޔާއަށް ގޮވައިލާފައެވެ.
ނުރުހުމުގައި ރަޝިޔާއިން ޑިޕޯޓްކޮށްފައިވާ ނުވަތަ ގެންގޮސްފައިވާ ޔޫކްރެއިނުގެ ކުޑަކުދިންގެ ޢަދަދު 16,000 އަށްވުރެ އިތުރުވާނެ ކަމުގައި ޔޫކްރެއިނުން ބުނެއެވެ. މި ކަމާ ދެކޮޅަށް އ.ދ.ގެ އިންސާނީ ހައްޤުތަކާ ބެހޭ ކައުންސިލުން ނެރުނު ޤަރާރުގައި، މި މައްސަލަ ތަހުޤީޤު ކުރުމުގެ މުއްދަތު އަހަރު ދުވަހުގެ މުއްދަތަކަށް ވަނީ އިތުރުކޮށްފައެވެ. އަދި، ބައިނަލްއަޤުވާމީ އިދާރާތަކުގެ އޮފިޝަލުންނަށް އެ ކުދިންނާ ބައްދަލުކޮށް، އެ ކުދިންގެ ހާލަތު ދެނެގަތުމުގެ ފުރުޞަތު ދިނުމަށް ވެސް ޤަރާރުގައި ގޮވައިލާފައިވެއެވެ.