މެދުއިރުމަތީގެ ސުލްޙައާއި ހަމަޖެހުން ޔަގީންކުރަން ސަޢޫދީ ޢަރަބިއްޔާއާއި އީރާނުން އެއްބަސްވެއްޖެ

ސަޢޫދީ ޢަރަބިއްޔާއާއި އީރާނުގެ ޚާރިޖީ ވަޒީރުން ބައްދަލުކުރައްވައި، މެދުއިރުމަތީގެ ސުލްޙައާއި ހަމަޖެހުން ޔަގީންކުރަން ގުޅިގެން މަސައްކަތް ކުރަން އެއްބަސްވެއްޖެއެވެ. ޗައިނާއިން މެދުވެރިއެއްގެ ދައުރު އަދާކުރި މި ބައްދަލުކުރެއްވުން ބާއްވާފައި ވަނީ ބެއިޖިންގްގައެވެ.

މިއީ، ހަތް އަހަރު ދުވަހުގެ މެދުކެނޑުމަކަށް ފަހު ސަޢޫދީ ޢަރަބިއްޔާއާއި އީރާނާ ދެމެދު އަލުން ސިޔާސީ ގުޅުން ގާއިމުކުރި ފަހުން ސަޢޫދީ ޚާރިޖީ ވަޒީރު ޕްރިންސް ފައިޞަލް ބިން ފަރްޙާނާއި އީރާނުގެ ޚާރިޖީ ވަޒީރު ޙުސައިން އާމިރު-ޢަބްދުاللهހިއަން ބައްދަލުކުރެއްވި ފުރަތަމަ ފަހަރެވެ. ދެ ޤައުމުގެ ދެމެދުގައި ސުލްޙާ ގާއިމުކޮށް ސިޔާސީ ގުޅުން ގާއިމުކޮށްފައި ވަނީ ޗައިނާއިން މެދުވެރިއެއްގެ ގޮތުގައި މަސައްކަތްކޮށްގެންނެވެ.

މި ބައްދަލުވުމުގައި ދެ ބޭފުޅުން ވަނީ މާރިޗު 10 ވަނަ ދުވަހު އެކުލަވައިލި ބެއިޖިންގް އެއްބަސްވުމުގެ ދަށުން ދެ ޤައުމުގެ ދެމެދުގައި އޮތް ގުޅުން އިތުރަށް ބަދަހިކޮށް، ދެ ޤައުމުގެ ދެމެދުގައި ސުލްޙަ ކުރިއަރުވަން އެއްބަސްވެ ވަޑައިގަންނަވާފައެވެ. އަދި، މެދުއިރުމަތީގެ ސަލާމަތާއި ރައްކާތެރިކަން ކަށަވަރުކޮށް، ސުލްޙައާއި ހަމަޖެހުން ދެމެހައްޓަން ގުޅިގެން މަސައްކަތް ކުރަން ދެ ބޭފުޅުން ވަނީ އެއްބަސްވެ ވަޑައިގަންނަވާފައެވެ.

އަދި، ދެ ޤައުމުގެ އެމްބަސީތަކާއި ކޮންސިއުލޭޓްތައް އަލުން ހުޅުވައި، ޚާރިޖީ ޚިދުމަތްތައް އަލުން ފެށުމާ ގުޅޭގޮތުން ވެސް ދެ ބޭފުޅުން މަޝްވަރާ ކުރެއްވިއެވެ. މިއީ، ވަރަށް ތާރީޚީ ބައްދަލުވުމެއްގެ ގޮތުގައި ޗައިނާއިން ސިފަ ކުރެއެވެ. ދެ ޤައުމުގެ ދެމެދުގައި އަލުން ސިޔާސީ ގުޅުން ގާއިމުކުރުމާއެކު، މީގެ 20 ވަރަކަށް އަހަރު ކުރިން އެކުލަވައިލާފައިވާ ސަލާމަތީ އަދި އިޤުތިޞާދީ އެއްބަސްވުންތަކަށް އަލުން އަމަލުކުރަން ފެށުމާ ގުޅޭ ގޮތުން މަޝްވަރާތަކުގައި އަލިއަޅުވައިލާފައިވެއެވެ.

ދެ ޤައުމުގެ ދެމެދުގައި އަލުން ސިޔާސީ ގުޅުން ގާއިމުކޮށްފައި މި ވަނީ ދެ ޤައުމުގެ ގުޅުން ހީނަރުވެފައިވާ ދަނޑިވަޅެއްގައެވެ. 2019 ވަނަ އަހަރު ސަޢޫދީ ޢަރަބިއްޔާގެ ތެޔޮ ސާފުކުރާ ކާރުޚާނާތަކަށް ދީފައިވާ މިސައިލާއިން ޑްރޯން ހަމަލާތަކެއްގެ ފަހަތުގައި ވަނީ އީރާނު ކަމަށް ސަޢޫދީން ވަނީ ތުހުމަތުކޮށްފައެވެ. ގަލްފް ކަނޑުގައި އޮތް ސަޢޫދީގެ ތެޔޮ ޓޭންކަރުތަކަކަށް އީރާނުން ހަމަލާދީފައިވާ ކަމަށް ވެސް އެ ޤައުމުން ތުހުމަތުކުރިއެވެ. ނަމަވެސް، އީރާނުން ވަނީ ތުހުމަތުތައް ދޮގުކޮށްފައެވެ.

ޔަމަނުގައި ހަރަކާތްތެރިވާ ހޫޘީ ޖަމާޢަތަކީ ވެސް އީރާނުން ވާގިވެރިވެދޭ ބަޔެކެވެ. އެ ޖަމާޢަތުން ވެސް ވަނީ، ސަޢޫދީ ޢަރަބިއްޔާއަށް މިސައިލް ހަމަލާތަކެއް ދީފައެވެ. އަދި، 2022 ވަނަ އަހަރުގެ ތެރޭގައި އެކުވެރި ޢަރަބި ޢިމާރާތް (ޔޫ.އޭ.އީ)އަށް ވެސް ހޫޘީން ވަނީ ހަމަލާތަކެއް ދީފައެވެ.

ދެ ޤައުމުގެ ޚާރިޖީ ވަޒީރުން ބެއިޖިންގްގައި ބައްދަލުކުރައްވާފައި މި ވަނީ، ފަރަންސޭސިވިލާތުގެ ރައީސް އެމަނުއެލް މެކްޚޯނާއި ވިލާތުގެ އިއްތިހާދު (އީ.ޔޫ) ކޮމިޝަނުގެ ރައީސް އުރްސުލާ ވޮންޑެ ލަޔަން ވެސް ބެއިޖިންގްއަށް ވަޑައިގަންނަވައިގެން އުޅުއްވާ ދަނޑިވަޅެއްގައެވެ. އެ ދެ ބޭފުޅުން ޗައިނާއަށް ވަޑައިގަންނަވާފައި ވަނީ، ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމަ ނިމުމަށް ގެނައުމަށް ކުރަމުންދާ މަސައްކަތަށް ޗައިނާގެ އެއްބާރުލުން ހޯދުމާ ގުޅޭ ގޮތުން އެ ޤައުމުގެ ރައީސް ޝީ ޖިންޕިންގްއާ މަޝްވަރާ ކުރެއްވުމަށެވެ.

ދެ ޤައުމުގެ ޚާރިޖީ ވަޒީރުންގެ ބައްދަލުވުމަށް ފަހު، އީރާނުގެ ރައީސް އިބްރާހީމް ރައީސީ ސަޢޫދީ ޢަރަބިއްޔާއަށް ދަތުރުފުޅެއް ކުރެއްވުމަށް ވަނީ ހަމަޖެހިފައެވެ. އޭނާ ސަޢޫދީ ޢަރަބިއްޔާއަށް ވަޑައިގެންނެވުމަށް ދަޢުވަތު އަރުވާފައި ވަނީ ސަޢޫދީ ރަސްގެފާނު ސަލްމާނެވެ. ރައީސީ ވަނީ އެ ދަޢުވަތު ގަބޫލުފުޅު ކުރައްވާފައެވެ.

ސަޢޫދީ ޢަރަބިއްޔާއާއި އީރާނާ ދެމެދު އުފެދިފައިވާ ނުތަނަވަސްކަމަކީ ސުންނީންނާއި ޝިޔަޢީންނާ ދެމެދު އުފެދިފައިވާ ކޯޅުންގަނޑެކެވެ. މި ކޯޅުންގަނޑު މެދުއިރުމަތީގެ ސަރަޙައްދުތަކަށް ފެތުރި، ދެ ޤައުމުން ދަނީ ސޫރިޔާއާއި ޔަމަނުގެ ދާޚިލީ ހަނގުރާމައިގައި ވާދަވެރި ފަރާތްތަކަށް އެއްބާރުލުން ދީފައެވެ.

ސަޢޫދީ ޢަރަބިއްޔާއިން އީރާނާ އެކު ސިޔާސީ ގުޅުން ކަނޑައިލާފައި ވަނީ 2016 ވަނަ އަހަރު ތެހެރާނުގައި ހުންނަ ސަޢޫދީ ޢެމްބަސީއަށް ބަޔަކު ވަތް ހާދިސާއާ ގުޅިގެންނެވެ. އެ ހާދިސާ ހިނގާފައި ވަނީ، ސަޢޫދީ ޢަރަބިއްޔާއިން އެ ޤައުމުގައި އުޅޭ ޝިޔަޢީންގެ ދީނީ ޢިލްމުވެރިއަކަށް މަރުގެ އަދަބު ދިނުމާ ގުޅިގެންނެވެ.