ޔަމަނުގެ ވެރިރަށް ސަންޢާއަށް އަތްގަދަކޮށްފައިވާ ހޫޘީ ހަތިޔާރުއެޅި ޖަމާޢަތާއި ޔަމަނުގެ ސަރުކާރާ ދެމެދު ގިނަ ޢަދަދެއްގެ އަސީރުން ބަދަލުކޮށްފިއެވެ. ދެ ފަރާތުގެ މެދުގައި އަސީރުން ބަދަލުކޮށްފައި މި ވަނީ، ޔަމަނުގެ ދާޚިލީ ހަނގުރާމަ ނިމުމަކަށް ގެނައުމާ މެދު ކުރިއަށްދިޔަ މަޝްވަރާތަކަށް ފަހުއެވެ.
މި މަޝްވަރާތައް ކުރިއަށް ގޮސްފައި ވަނީ ހޫޘީންނާއި ސަޢޫދީ ޢަރަބިއްޔާގެ އޮފިޝަލުންނާ ދެމެދެވެ. ޔަމަނުގައި ކުރިއަށްދިޔަ މަޝްވަރާތަކުގައި މެދުވެރިއެއްގެ ދައުރު އަދާކޮށްފައި ވަނީ އޮމާނުންނެވެ. ސަޢޫދީ ޢަރަބިއްޔާއިން މި މަޝްވަރާތަކުގައި އިސް ދައުރެއް އަދާކުރަނީ، ޔަމަނުގެ ސަރުކާރުގެ ފަރާތުންނެވެ. 2014 ވަނަ އަހަރު ހޫޘީން ސަންޢާއަށް އަތްގަދަކުރުމުން އެ ޖަމާޢަތާ ދެކޮޅަށް ޔަމަނު ސަރުކާރުން ފެށި ހަނގުރާމައިގައި ސަޢޫދީ ޢަރަބިއްޔާއިން ދަނީ އިސް ދައުރެއް އަދާކޮށްފައެވެ. މަޝްވަރާތަކުގައި ސަޢޫދީ ޢަރަބިއްޔާ ތަމްޞީލު ކުރެއްވީ ޔަމަނަށް ކަނޑައަޅާފައި ހުންނަވާ ސަފީރު މުޙައްމަދު އަލް-ޖާބިރެވެ.
ހޫޘީން އަދިވެސް ތިބީ ސަންޢާގައެވެ. އަދި، ޔަމަނުގެ އިންތިޚާބީ ސަރުކާރުން ވެރިކަން ކުރަމުން ދަނީ ބަނދަރުމަތީ ރަށެއް ކަމުގައިވާ ޢަދަނުގައެވެ. ޢަދަނުގައި ޔަމަނު ސަރުކާރާއި ސަޢޫދީ ގުޅިފައިވާ ލަޝްކަރުން ހައްޔަރުކޮށްފައި ތިބި ހޫޘީ އަސީރުންގެ ތެރެއިން ގިނަ ޢަދަދެއްގެ ބަޔަކު ވަނީ މަތިންދާބޯޓެއްގައި ސަންޢާއަށް ފޮނުވާފައެވެ. އަދި، ސަންޢާގައި ހޫޘީންގެ ހައްޔަރުގައި ތިބި އަސީރުންގެ ތެރެއިން ބަޔަކު ވެސް ވަނީ މިނިވަން ކޮށްފައެވެ.
ޔަމަން ސަރުކާރާއި ހޫޘީންނާ ދެމެދު ޖުމުލަ 887 އަސީރުން ބަދަލުކުރަން ހަމަޖެހިފައިވާއިރު، އޭޕްރިލް 14 ވަނަ ދުވަހު 322 އަސީރުން ވަނީ ބަދަލުކޮށްފައެވެ. އެ މީހުން އުފުލާފައި ވަނީ ރެޑް ކްރެސެންޓުގެ މަތިންދާބޯޓުތަކުގައެވެ. ހޫޘީން މިނިވަންކޮށްފައިވާ އަސީރުންގެ ތެރޭގައި ޔަމަނުގެ ކުރީގެ ދިފާޢީ ވަޒީރު މޭޖަރ ޖެނެރަލް މަޙްމޫދު އަލް-ޞުބައިޙީއާއި، ކުރީގެ ރައީސްގެ ބޭބޭފުޅު މޭޖަރ ޖެނެރަލް ނާޞިރު މަންޞޫރު ހާދީ ހިމެނިވަޑައިގަންނަވައެވެ.
ދެ ފަރާތުގެ ދެމެދުގައި ބަދަލުކުރަން ހަމަޖެހިފައިވާ އަސީރުންގެ ތެރޭގައި ހިމެނެނީ ހޫޘީންގެ ހައްޔަރުގައި ތިބި 181 މީހުންނާއި، ޔަމަން ސަރުކާރުގެ ހައްޔަރުގައި ތިބި 706 މީހުންނެވެ. ހޫޘީން ހައްޔަރުކޮށްފައިވާ މީހުންގެ ތެރޭގައި ސަޢޫދީ ޢަރަބިއްޔާއާއި ސޫދާނުގެ ރައްޔިތުން ވެސް ހިމެނެއެވެ.
އަސީރުން ބަދަލުކުރަން ދެ ފަރާތުން އެއްބަސްވެ، އެ ކަން ތަންފީޒުކުރަން ފަށާފައިވީ ނަމަވެސް، ސުލްޙައިގެ މަޝްވަރާތައް ނިމިފައި ވަނީ އެ ކަމާ މެދު ގޮތެއް ނުނިންމިއެވެ. ނަމަވެސް، ކުރިއަށް އޮތް ތަނުގައި މަޝްވަރާގެ އިތުރު ބައްދަލުވުންތައް ބާއްވައި، ސުލްޙަ ގާއިމުކުރަން މަސައްކަތް ކުރަން ދެ ފަރާތުން ވެސް ވަނީ އެއްބަސްވެފައެވެ.
"ސުލްޙައިގެ އެއްބަސްވުމެއްގެ ދެލިކޮޕީއެއް އެކުލަވައިލާ އެއާ މެދު މަޝްވަރާތައް ދަނީ ކުރިއަށް. އެ އެއްބަސްވުމުގެ ކަންކަން ކަށަވަރުވުމުން، އެއާ ގުޅޭ މަޢުލޫމާތު ހާމަ ކުރެވޭނެ. ކުރިއަށް އޮތީ މި ކަމާ ގުޅޭ ގޮތުން އިތުރަށް މަޝްވަރާ ކުރުން. އެ ކަމަށް ދެ ފަރާތުން ވެސް ވަނީ އެއްބަސްވެފައި،" ޔަމަން ސަރުކާރުގެ އޮފިޝަލަކު ވިދާޅުވިއެވެ.
ޔަމަނުގައި ހިނގަމުންދާ ދާޚިލީ ހަނގުރާމަ ނިމުމަކަށް ގެނައުމުގެ މަސައްކަތް ހަލުވިވެފައި މި ވަނީ، ދާދިފަހުން ސަޢޫދީ ޢަރަބިއްޔާއާއި އީރާނާ ދެމެދު ސިޔާސީ ގުޅުން އަލުން ގާއިމުކުރުމަށް އެއްބަސްވުމާ ގުޅިގެންނެވެ. މެދުއިރުމަތީގެ އެންމެ ގަދަ ދެ ބާރު ކަމުގައި ބެލެވޭ ސަޢޫދީ ޢަރަބިއްޔާއާއި އީރާނާ ދެމެދުގައި އަލުން ގުޅުން ގާއިމުކޮށްފައި ވަނީ މާރިޗު 10 ވަނަ ދުވަހުއެވެ.
ސަޢޫދީ ޢަރަބިއްޔާއާއި ހޫޘީންނާ ދެމެދު ހަމަލާ ބަދަލުކުރުން ހުއްޓައިލުމަށް ހުސްވި 2022 ވަނަ އަހަރުގެ ތެރޭގައި ވަނީ އެއްބަސްވެފައެވެ. އެއީ، ހަ މަސް ދުވަހުގެ މުއްދަތަކަށެވެ. އަދި، އޮކްޓޫބަރު މަހުގެ 2 ވަނަ ދުވަހު އެ މުއްދަތު ހަމަވުމުން، އެއްބަސްވުމުގެ މުއްދަތު އިތުރުކޮށްފައެއް ނުވެއެވެ. ނަމަވެސް، ދެ ފަރާތުގެ ދެމެދުގައި އަލުން ހަމަލާ ބަދަލުކުރަން ފަށާފައެއް ނުވެއެވެ.