ދެކުނު ކޮރެޔާގެ މެދުތެރޭގެ ސަރަޙައްދެއްގައި ފަތުރުވެރިންތަކެއް އަރުވައިގެން ދަތުރުކުރަމުންދިޔަ ބަހެއް ފުރަޅައިލާ، އޭގެން ދަތުރުކުރި އެއް ފަސިންޖަރަކު މަރުވެއްޖެއެވެ. މި ހާދިސާ ހިނގި ވަގުތު ބަހުގައި ތިބީ ޔަހޫދީ އިސްރާޢީލުގެ ފަތުރުވެރިންނެވެ. ބަސް އެކްސިޑެންޓު ހިނގާފައި ވަނީ އިރުދެކުނުގައިވާ ޗޮންގްޖޫއިން ފުރައިގެން އެ ރަށް ކައިރީގައި އޮންނަ ޗުންގްޖޫއަށް ދަތުރުކުރި މަގުމަތީގައެވެ.
މި ހާދިސާ ހިނގި ވަގުތު ބަހުގައި އިސްރާޢީލިގެ 33 ފަތުރުވެރިން ތިބިއިރު، މި ހާދިސާގައި މަރުވެފައި ވަނީ އަންހެނެއް ކަމުގައި ޗުންގްޖޫގެ އޮފިޝަލުން ވިދާޅުވިއެވެ. މި ހާދިސާގައި ބަހުގައި ދަތުރުކުރި ގިނަ ޢަދަދެއްގެ ފަތުރުވެރިން ޒަޚަމުވި ކަމުގައި ވެސް އޮފިޝަލުން ވިދާޅުވެއެވެ.
ބަސް ފުރޮޅައިލާފައި ވަނީ ހަނި މަގަކުން ދުއްވާފައި ދިޔަ ވަގުތެއްގައި ގިޔަ ބަދަލުކުރަން އުޅުމުގެ ތެރޭގައި ކޮންޓްރޯލް ގެއްލި ގަހެއްގައި ބަސް ޖެހިގެން ކަމުގައި އޮފިޝަލުން ވިދާޅުވެއެވެ. މި ހާދިސާގައި ބަސް ދުއްވަން އިން މީހާއާއި، ފަތުރުވެރިންނާ އެކު ދަތުރުކުރަމުންދިޔަ ގައިޑަށް ވެސް އަނިޔާވިއެވެ. ބަހުގައި ދަތުރުކުރި ފަސިންޖަރުންގެ ތެރޭގައި ހިމެނެނީ އުމުރުން 50 އިން މަތީގެ މީހުން ކަމަށް ވެސް އޮފިޝަލުން ވިދާޅުވެއެވެ.
މި ހާދިސާގައި މަރުވި މީހާއާއި ޒަޚަމުވި މީހުންގެ އިތުރުން އެ މީހުންގެ ޢާއިލާތަކަށް އެހީތެރިކަން ފޯރުކޮށްދޭނެ ކަމުގައި ދެކުނު ކޮރެޔާގެ ޚާރިޖީ ވުޒާރާއިން ވަނީ ބުނެފައެވެ. އިސްރާޢީލުގެ ޚާރިޖީ ވުޒާރާއިން ބުނީ، ދެކުނު ކޮރެޔާގެ ޚާރިޖީ ވުޒާރާއާ ގުޅިގެން ބަސް އެކްސިޑެންޓުގައި ގެއްލުންވި މީހުންގެ ހާލު ބަލަމުންދާ ކަމުގައެވެ.