"ސްމޯކް ބޮމް" ނުވަތަ ދުންއަރާ ބޮމެއް ބޭނުންކޮށްގެން ޖަޕާނުގެ ބޮޑުވަޒީރު ފުމިޔޯ ކިޝިޑާއަށް ޙަމަލާދޭން ކުރި މަސައްކަތްތަކެއް ނާކާމިޔާބުވެއްޖެއެވެ. ކިޝިޑާއަށް ހަމަލާދޭން މަސައްކަތް ކޮށްފައި ވަނީ ޖަޕާނުގެ ހުޅަނގުގައިވާ ވަކަޔާމާ ޕްރިފެކްޗަރގެ ސައިކަޒަކީގައި އޮތް ކެމްޕޭން ހަރަކާތެއްގެ ތެރެއިންނެވެ.
މި ކެޕްމޭން ޖަލްސާ އޮތީ ސައިކަޒަކީގެ މަސް މާރުކޭޓެއް ހުންނަ ސަރަޙައްދެއްގައެވެ. އޭނާ އެ ތަނަށް ވަޑައިގަންނަވާފައި ވަނީ، ޖަޕާނުގެ ޤާނޫނު ހަދާ މަޖިލީހުގެ ތިރިގޭގެ ބައި-އިލެކްޝަނެއްގައި އޭނާގެ ޕާޓީގެ ކެނޑިޑޭޓަށް ތާޢީދު ހޯއްދެވުމަށެވެ. ބޮން އެއްލައިގެން ހަމަލާދީފައި ވަނީ، އޭނާއަށް ތާޢީދުކުރާ މީހުންނާ މުޚާތަބުކޮށް ވާހަކަފުޅު ދައްކަވަން އުޅުއްވަނިކޮށެވެ.
ކިޝިޑާއަށް އަމާޒުކޮށް ބޮން އެއްލި ނަމަވަސް، މި ހަމަލާގައި އޭނާއަށް އެއްވެސް ވަރެއްގެ އަނިޔާއެއް ލިބިވަޑައިނުގަންނަވާ ކަމުގައި ޖަޕާނުގެ މީޑިޔާތަކުން ރިޕޯޓުކުރެއެވެ. އަދި، ފުލުހުން ވަނީ ކިޝިޑާއަށް ހަމަލާދޭން މަސައްކަތް ކުރި މީހާ ވަގުތުން ހައްޔަރުކޮށްފައެވެ. އެއީ، 20 އާއި 30 އާ ދެމެދުގެ އުމުރުފުރައިގެ މީހެއް ކަމަށް ބެލެވޭ ކަމުގައި މީޑިޔާ ރިޕޯޓުތައް ބުނެއެވެ.
މި ހާދިސާއާ ގުޅޭ ގޮތުން އެއްވެސް މަޢުލޫމާތެއް ހާމަކުރުމަށް ޖަޕާނުގެ ފުލުހުން ވަނީ އިންކާރުކޮށްފައެވެ. ނަމަވެސް، ކިޝިޑާއަށް ހަމަލާދޭން މަސައްކަތް ކޮށްފައި މި ވަނީ ޖަޕާނުގެ ކުރީގެ ބޮޑުވަޒީރު ޝިންޒޯ އަބޭގެ ހަށިކޮޅަށް ބަޑިޖަހައި އަވަހާރަކޮށްލި ހާދިސާގެ ނުވަ މަސް ފަހުންނެވެ. އޭނާ އަވަހާރަކޮށްލާފައި ވަނީ ޤާނޫނު ހަދާ މަޖިލީހުގެ ކެމްޕޭނުގައި އުޅުއްވަނިކޮށެވެ.
އަބޭއަށް ހަމަލާދީފައި ވަނީ ޓެޓްސުޔާ ޔަމަގާމީ ކިޔާ މީހެކެވެ. އޭނާ އަބޭއަށް ހަމަލާދީފައި ވަނީ ޖަޕާނުގެ ޔުނިފިކޭޝަން ޗަރޗާ އެކު އަބޭ ގެންގުޅުއްވާ ގާތް ގުޅުމާ ނުރުހިގެން ކަމަށް ތުހުމަތު ކުރެވެއެވެ. އޭނާގެ މައްޗަށް މިހާރު ވަނީ ދަޢުވާ އުފުލާފައެވެ. އަބޭއަށް ހަމަލާދީ އަވަހާރަކޮށްލާފައި ވަނީ ނާރާ ޕްރިފެކްޗަރގައި އޮތް ކެމްޕޭން ހަރަކާތެއްގައެވެ.
ކިޝިޑާއަށް ހަމަލާދޭން މަސައްކަތް ކޮށްފައި މި ވަނީ، ސިނާޢީ ގޮތުން އެންމެ ކުރިއަރާފައިވާ ހަތް ޤައުމު – ގްރޫޕް އޮފް ސެވަން (ޖީ7)ގެ މިނިސްޓަރުންގެ ފެންވަރުގެ ބައްދަލުވުމެއް ޖަޕާނުގައި ބޭއްވުމުގެ ތައްޔާރީތައް ކުރަމުންދާ ދަނޑިވަޅެއްގައެވެ. އެއީ، މޭ މަހުގެ 19 އިން 21 އަށް ބާއްވާ ޖީ7ގެ ސަމިޓަށް ތައްޔާރުވުމުގެ ގޮތުން ބާއްވާ ބައްދަލުވުމެކެވެ.