އެމެރިކާ ސަރުކާރުގެ ސިއްރު ލިޔެކިޔުންތަކެއް ލީކުކޮށްލުމުގައި ޒިންމާވާ މީހާ ހޯދައި، އޭނާ ހައްޔަރުކޮށްފިއެވެ. މި މައްސަލައިގައި ހައްޔަރުކޮށްފައި ވަނީ އުމުރުން 21 އަހަރުގެ ޖެކް ޓިޝެއިރާ ކިޔާ މީހެކެވެ. އޭނާ އަކީ، އެމެރިކާގެ ވައިގެ ސިފައިންގެ ނޭޝަނަލް ގާޑުގައި މަސައްކަތް ކުރާ މީހެކެވެ.
ޓިޝެއިރާ ހައްޔަރުކޮށްފައި ވަނީ އެމެރިކާގެ ތަހުޤީޤީ އިދާރާ – ފެޑެރަލް ބިޔުރޯ އޮފް އިންވެސްޓިގޭޝަން (އެފް.ބީ.އައި) އިން ހިންގި ތަހުޤީޤަކަށް ފަހު ކަމުގައި އެމެރިކާގެ އެޓަރނީ ޖެނެރަލް މެރިކް ގާލެންޑް ވިދާޅުވިއެވެ. ޓިޝެއިރާ ހައްޔަރުކޮށްފައި ވަނީ، އެމެރިކާގެ ޤައުމީ ސަލާމަތާ ގުޅުންހުރި ސިއްރު ލިޔެކިޔުންތަކެއް، ޤަވާޢިދާ ޚިލާފަށް އެ ތަކެތި ހުރި އިދާރާއިން ނެރެ، އެހެން ބަޔަކަށް ފޯރުކޮށްދިނުމުގެ ކުށުގައެވެ.
ޓިޝެއިރާއަކީ އޮންލައިން ގޭމު ކުޅުންތެރިން ބޭނުންކުރާ ޕްލެޓްފޯމެއް ކަމުގައިވާ ޑިސްކޯޑްގައި ޗެޓް ރޫމެއް ހިންގާ މީހެކެވެ. އޭނާ ސިއްރު ލިޔެކިޔުންތައް ލީކުކޮށްލާފައި ވަނީ އެ ޗެޓް ރޫމް މެދުވެރިކޮށެވެ. އޭނާ ހައްޔަރު ކޮށްފައި ވަނީ އެމެރިކާގެ އިރުއުތުރުގައިވާ މެސެޗުސެޓްސް ސްޓޭޓްގެ ނޯރތް ޑައިޓަން ކިޔާ ރަށެއްގައި ހުންނަ އޭނާގެ ގޭގައި ހުއްޓައެވެ.
އޭނާ ލީކުކޮށްލާފައިވާ ލިޔެކިޔުންތަކުގެ މަޢުލޫމާތު އެންމެ ފުރަތަމަ ރިޕޯޓުކޮށްފައި ވަނީ އެމެރިކާގެ ނޫހެއް ކަމުގައިވާ ދަ ވޮޝިންގްޓަން ޕޯސްޓުންނެވެ. އެހެން ނޫހެއް ކަމުގައިވާ ދަ ނިއު ޔޯކް ޓައިމްސްގައި ރިޕޯޓުކޮށްފައިވާ ގޮތުގައި، ލިޔެކިޔުންތައް ލީކުކޮށްލާފައިވާ ގޮތް ފޮރުވަން ޓިޝެއިރާ މަސައްކަތް ކޮށްފައެއް ނުވެއެވެ. އަދި، ލިޔެކިޔުންތައް ޝެއަރކޮށްފައިވާ ގޮތް ބަލައި، އެފް.ބީ.އައި.އިން ވަރަށް ފަސޭހައިން ޓިޝެއިރާ ދެނެގަނެފައިވާ ކަމުގައި ވެސް ރިޕޯޓްކޮށްފައިވެއެވެ.
ލީކުކޮށްލާފައިވާ ލިޔެކިޔުންތަކުގައި އެކި ޤައުމުތަކާ ގުޅޭގޮތުން އެމެރިކާގެ ޖާސޫސީ އިދާރާތަކުން އެއްކޮށްފައިވާ މަޢުލޫމާތު ހުއްޓެވެ. މީގެ ތެރޭގައި، ޔޫކްރެއިނަށް އަރައި ހަނގުރާމަ ކުރަމުންދާ ރަޝިޔާގެ އިސްތިއުމާރީ ސިފައިންނާ ދެކޮޅަށް ޔޫކްރެއިނުގެ ފައުޖުތަކުން ފެށުމަށް ތައްޔާރުވަމުންދާ އަސްކަރީ ކެމްޕޭނާ ގުޅޭ ގިނަ މަޢުލޫމާތުތަކެއް ހިމެނެއެވެ. އެމެރިކާއިން އެ ޤައުމުގެ އެކުވެރިންނަށް ވެސް ޖާސޫސްކޮށްފައިވާ ކަން ލިޔެކިޔުންތަކުން ވަނީ ހާމަވެފައެވެ.
ޓިޝެއިރާ އޮންލައިންކޮށް ބޭނުންކުރާ ނަމަކީ "އޯ.ޖީ"އެވެ. އޭނާ ޑިސްކޯޑްގައި ހަދާފައިވާ "ތަގް ޝޭކަރ ސެންޓްރަލްގެ" ނަމުގައި ހަދާފައިވާ ޗެޓް ރޫމް މެދުވެރިކޮށް ލިޔެކިޔުންތައް ލީކުކުރަން ފަށާފައި ވަނީ މީގެ މަސްތަކެއް ކުރިންނެވެ. އެ ޗެޓް ރޫމްގައި 24 މެންބަރުން ތިބޭއިރު، އޭގެ ތެރޭގައި ޔޫކްރެއިނާއި ރަޝިޔާގެ ރައްޔިތުން ވެސް ހިމެނެއެވެ.
ޕޯސްޓުން ރިޕޯޓުކޮށްފައިވާ ގޮތުގައި އޭނާ ލިޔެކިޔުންތައް ހޯދާފައި ވަނީ ފޯނާއި އިލެކްޓްރޯނިކް އާލާތްތައް ވެއްދުން މަނާ މަރުކަޒަކުންނެވެ. އަދި، ޗެޓް ރޫމްގައި އޭނާ ޝާއިޢުކޮށްފައި ވަނީ ލިޔެކިޔުންތަކުގެ ފޮޓޯތަކެކެވެ. އަދި، އެ މަޢުލޫމާތު އެހެން މީހުންނާ ހިއްސާ ނުކުރުމަށް ވެސް އޭނާ ވަނީ ޗެޓް ރޫމްގެ މެންބަރުންގެ ކިބައިން އެދިފައެވެ.
ޓިޝެއިރާއަކީ އެމެރިކާގެ އަސްކަރިއްޔާގެ ވަޒީފާއެއް އަދާކުރަމުންދިޔަ މީހެއް ނަމަވެސް، އޭނާއަކީ އެމެރިކާގެ ސަރުކާރާއި އަދި ޖާސޫސީ އިދާރާތަކާ މެދު ހިތްހަމަނުޖެހޭ މީހެއް ކަމުގައި ވެސް ޕޯސްޓަށް ދިން އިންޓަރވިއުއެއްގައި ޗެޓް ރޫމްގެ މެންބަރަކު ބުނެފައިވެއެވެ. އަދި، އެމެރިކާގެ ސަރުކާރާއި ޖާސޫސީ އިދާރާތަކުން ގިނަ މަޢުލޫމާތުތަކެއް ރައްޔިތުންނަށް ސިއްރުކޮށްފައި ބާއްވަން ބޭނުންވާ ކަމުގައި އޭނާ ބުނެފައިވާ ކަމަށް ވެސް މެންބަރަކު ބުންޏެވެ.