ޗައިނާގެ ހުޅަނގުދެކުނުގައިވާ ޔުނާން ޕުރޮވިންސުގެ ޖަންގަލިތަކުގައި ރޯވެފައިވާ އަލިފާންގަނޑު 100 ގަޑިއިރަށް ފަހު ނިއްވައިލައިފިއެވެ. އަލިފާންގަނޑުތަކުގެ ސަބަބުން އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި، އަލިފާން ނިއްވުމުގައި ހަރަކާތްތެރިވި ޓީމުތަކުން ބުނެއެވެ.
އަލިފާން ރޯވެފައި ވަނީ ޔުޝީ ކިޔާ ރަށެއްގެ ޖަންގްޗުއާން ޑިސްޓްރިކްޓުގެ އަވަށެއް ކަމުގައިވާ ޖިޔުޝީ ކައިރީގައިވާ ޖަންގަލިތަކުގައެވެ. އަލިފާން ރޯވިތާ 100 ގަޑިއިރު ފަހުން އަލިފާންގަނޑު ކޮންޓްރޯލް ކުރެވިފައި ވަނީ 4,000 އަށްވުރެ ގިނަ މީހުންގެ މަސައްކަތުންނެވެ.
އަލިފާންގަނޑުތައް ނިއްވައިލުމަށް ގިނަ ޢަދަދެއްގެ ހެލިކޮޕްޓަރު ވެސް ބޭނުންކުރަން ޖެހުނު ކަމުގައި، އެ މަސައްކަތުގައި ހަރަކާތްތެރިވި ޓީމުތަކުން ބުނެއެވެ. އަދި، އަލިފާންގަނޑު ކޮންޓްރޯލްވީ 1,400 ޓަނުގެ ފެން ޖެހުމުން ކަމުގައި ވެސް އެ ޓީމުތަކުން ބުނެއެވެ. ޖިޔުޝީގެ ޖަންގަލިތަކުގައި ރޯވުމާ ގުޅިގެން އެ ސަރަޙައްދުގައި ދިއިރުޅޭ ހުރިހާ ރައްޔިތުން ވަނީ ރައްކާތެރި ހިސާބުތަކަށް ބަދަލުކޮށްފައެވެ.