އެކުވެރި ޢަރަބި ޢިމާރާތް (ޔޫ.އޭ.އީ)ގެ ދުބާއީގައި ހުންނަ އުސް ޢިމާރާތެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 16 މީހުން މަރުވެއްޖެއެވެ. ދުބާއީގެ މުސްކުޅި ރަށުގައި ހުންނަ ޢިމާރާތެއްގައި ހިނގި މި ހާދިސާގައި އިތުރު ނުވަ މީހަކު ޒަޚަމްވިއެވެ. އަލިފާން ރޯވެފައި ވަނީ މީހުން ދިރިއުޅޭ އެޕާޓްމަންޓްތަކެއް ހުންނަ ޢިމާރާތެއްގެ ހަތަރުވަނަ ފަންގިފިލާގައެވެ.
އަލް-ރަސް އަވަށުގައި ހިނގި މި ހާދިސާގެ ތަހުޤީޤު ފަށާފައިވާއިރު، މިއީ ސަލާމަތާއި ރައްކާތެރިކަމަށް އިހުމާލުވުމުގެ ސަބަބުން ހިނގާފައިވާ ހާދިސާއެއް ކަމަށް ބެލެވޭ ކަމުގައި މި ހާދިސާ ތަހުޤީޤު ކުރަމުންދާ ފަރާތްތަކުން ވަނީ ބުނެފައެވެ. ދުބާއީގެ ސިވިލް ޑިފެންސް ފޯސްއިން ބުނީ، އަލިފާން ރޯވި ޢިމާރާތުގައި ސަލާމަތާއި ރައްކާތެރިކަމުގެ ފިޔަވަޅުތައް ގާއިމުކޮށްފައި ނުވާ ކަމުގައެވެ. އަދި، މި ހާދިސާގެ ފުރިހަމަ ތަހުޤީޤެއް ހިންގަމުންދާ ކަމުގައި ވެސް އެ އިދާރާއިން ބުނެއެވެ.
ޔޫ.އޭ.އީ.އަކީ ހަތް ސަރަޙައްދެއްގެ މައްޗަށް ބިނާވެފައިވާ ޤައުމެކެވެ. ދުބާއީގެ އާބާދީ 3.3 މިލިޔަނަށް އަރާއިރު، މީގެ ތެރެއިން 90 އިންސައްތައަކީ އެކި ދާއިރާތަކުގައި މަސައްކަތް ކުރުމަށް އެ ޤައުމަށް ހިޖުރަކޮށްފައިވާ ބިދޭސީންނެވެ. އަލިފާނުގެ ހާދިސާގައި މަރުވި މީހުންގެ ތެރޭގައި އިންޑިޔާގެ ހަތަރު ރައްޔިތުންނާއި ޕާކިސްތާނުގެ ތިން މީހުން ހިމެނެއެވެ.
ދުބާއީގައި މީގެ ކުރިން ވެސް މި ފަދަ ނުރައްކާތެރި އަލިފާނުގެ ހާދިސާތައް ހިނގާފައިވެއެވެ. ޢަލަށް ޢިމާރާތް ކުރަމުންދިޔަ އުސް ފިހާރަބަރިއެއްގައި ވެސް 2017 ވަނަ އަހަރު މި ފަދަ އަލިފާނުގެ ހާދިސާއެއް ހިނގާފައިވެއެވެ. އަދި، 2015 ވަނަ އަހަރު ފަސް ތަރީގެ ހޮޓަލެއްގައި ހިނގި ނުރައްކާތެރި އަލިފާނުގެ ހާދިސާއެއްގައި ބައެއް މީހުންނަށް އަނިޔާވިއެވެ.
ދުބާއީގައި ހަދާފައިވާ އުސް ޢިމާރާތްތަކުގައި ހިނގާ އަލިފާނުގެ ހާދިސާތައް ފެތުރެނީ، ޢިމާރާތްތަކުގެ ބޭރުގައި ބޭނުންކޮށްފައިވާ "ކްލެޑިންގް"އެއްގެ ސަބަބުން ކަމަށް ޢިމާރާތް ކުރުމުގެ ދާއިރާގެ މާހިރުން ބުނެއެވެ. ބޭރުގައި އެލުމިނިޔަމް ހުންނަ އެ ކްލެޑިންގެ އެތެރޭގައި ޕްލާސްޓިކް ހުންނަ ކަމަށާއި، އެ ސަބަބާ ގުޅިގެން ވަރަށް ފަސޭހައިން އަލިފާންގަނޑު ފެތުރޭ ކަމުގައި ވެސް މާހިރުން ބުނެއެވެ. މި ކަން ހައްލުކުރަން ދުބާއީން 2017 ވަނަ އަހަރު ވަނީ ޢިމާރާތް ކުރުމުގެ ޤަވާޢިދުތައް އިސްލާޙުކޮށް، އަލިފާން ހިފާ ބާވަތުގެ ކްލެޑިންގް ބޭނުން ކުރުން މަނާކޮށްފައެވެ.