އަންނަ ޖުލައި މަހު ލިތުއޭނިޔާގެ ވެރިރަށް ވިލްނިއަސްގައި ބާއްވާ ނޭޓޯގެ ސަމިޓުގައި ބައިވެރިވުމުގެ ދަޢުވަތު ޔޫކްރެއިންގެ ރައީސް ވޮލޮޑޮމީރް ޒެލެންސްކީއަށް އަރުވާފައިވާ ކަމުގައި ނޭޓޯގެ ސެކްރެޓަރީ ޖެނެރަލް ޔެންސް ސްޓޮލްޓެންބަރގް ހާމަކުރައްވައިފިއެވެ. ޔޫކްރެއިނުގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައަށް އިތުރު އެހީތެރިކަން ފޯރުކޮށްދިނުމާ ގުޅޭ ގޮތުން މަޝްވަރާ ކުރުމަށް ޖަރުމަނުވިލާތުގައި ބޭއްވި ބައްދަލުވުމެއްގައި ވާހަކަފުޅު ދައްކަވަމުން ސްޓޮލްޓެންބަރގް ވިދާޅުވީ، ނޭޓޯގެ ދަޢުވަތު ޒެލެންސްކީ ގަބޫލުފުޅު ކުރައްވާފައިވާ ކަމުގައެވެ.
ޖަރުމަނުވިލާތުގައި ބޭއްވި ބައްދަލުވުމާ ގުޅޭ ގޮތުން ސްޓޮލްޓެންބަރގް ވިދާޅުވީ ޔޫކްރެއިނަށް އެ ޤައުމުގެ މިނިވަންކަމާއި ސިޔާދަތު ޙިމާޔަތް ނުކުރެވޭ ނަމަ، އެ ޤައުމަކީ ނޭޓޯގެ މެންބަރަކަށް ހެދުމާ މެދު މަޝްވަރާ ކުރުމަކީ ބޭނުންތެރި ކަމެއް ނޫން ކަމުގައެވެ. ޖަރުމަނުވިލާތުގައި ބައްދަލުވުން ބާއްވާފައި ވަނީ އެމެރިކާގެ އިސްނެގުމުގެ މަތިންނެވެ.
މި ބައްދަލުވުމުގައި ވާހަކަފުޅު ދައްކަވަމުން އެމެރިކާގެ ދިފާޢީ ވަޒީރު ލޮއިޑް އޮސްޓިން ވިދާޅުވީ ޔޫކްރެއިނަށް އިތުރު އެހީތެރިކަން ފޯރުކޮށްދިނުމަށް ނޭޓޯގެ ހުރިހާ މެންބަރު ޤައުމަކުން ވެސް ތައްޔާރަށް އޮތް ކަމުގައެވެ. ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައިގައި ޔޫކްރެއިނަށް އެންމެ ބޮޑަށް އެހީތެރިކަން ފޯރުކޮށްދެމުން ދަނީ ނޭޓޯގެ ޤައުމުތަކުންނެވެ.
"ޔޫކްރެއިނުގެ މިނިވަންކަމާއި ސިޔާދަތުގެ ދިފާޢުގައި ކުރަމުންދާ ހަނގުރާމައިގައި އެ ޤައުމަށް އެހީތެރިކަން ފޯރުކޮށްދޭން ނޭޓޯއިން އޮތީ ތައްޔާރަށް. މި ބައްދަލުވުމުގައި މައިގަނޑު ތިން ދާއިރާއަކުން އެހީތެރިކަން ފޯރުކޮށްދޭން މަޝްވަރާ ކުރެވުނު. އޭގެ ތެރޭގައި ވައިގެ ދިފާޢީ ނިޒާމު ވަރުގަދަ ކުރުމާއި، މެދުކެނޑުމެއް ނެތި ހަތިޔާރު ފޯރުކޮށްދިނުން ހިމެނޭ،" އޮސްޓިން ވިދާޅުވިއެވެ.
މި ބައްދަލުވުމާ ގުޅޭ ގޮތުން ވާހަކަފުޅު ދައްކަވަމުން ޒެލެންސްކީ ވަނީ ރަޝިޔާގެ އިސްތިއުމާރީ ސިފައިން އެ ޤައުމުން ބޭލުމަށް އިތުރު ހަތިޔާރު ބޭނުންވާ ކަމުގައި ވިދާޅުވެފައެވެ. އަދި، އެ ޤައުމުގެ ސިފައިންނަށް މި ވަގުތު އެންމެ ބޮޑު ބޭނުންތެރިކަމެއް އޮތީ އަސްކަރީ މަތިންދާބޯޓާއި ދުރު ރާސްތާ މިސައިލަށް ކަމުގައި ވެސް އޭނާ ވިދާޅުވިއެވެ. ޖަރުމަނުވިލާތުގައި އޮތް ބައްދަލުވުމުގެ ކުރިން ޒެލެންސްކީ ވަނީ ސްޓޮލްޓެންބަރގާ ބައްދަލުކުރައްވާ، އިތުރު ހަތިޔާރު ހޯދައިދިނުމަށް އެދިވަޑައިގަންނަވާފައެވެ.
ނޭޓޯގެ ޤައުމުތަކުން މީގެ ކުރިން ވެސް ވަނީ ޔޫކްރެއިނަށް އަސްކަރީ މަތިންދާބޯޓުތައް ފޯރުކޮށްދީފައެވެ. ނަމަވެސް، އެއީ ކުރީގެ ރޫސީ ވިލާތުގެ ޒަމާނުގައި އުފައްދާ އުޅަނދުތަކެކެވެ. ޔޫކްރެއިނުން ބޭނުން ވަނީ އެންމެ ފަހުގެ ޒަމާނީ ހަތިޔާރާއި އަސްކަރީ މަތިންދާބޯޓުތަކެވެ. ޚާއްޞަކޮށް، އެމެރިކާގައި އުފައްދާ "އެފް-16" މަރުކާގެ އަސްކަރީ މަތިންދާބޯޓު ހޯދަން ޔޫކްރެއިނުން ދަނީ މަސައްކަތް ކުރަމުންނެވެ.
އެމެރިކާއިން ދާދި ފަހުން ވަނީ އެ ޤައުމުގައި އުފައްދާ "ޕޭޓްރިއަޓް" މަރުކާގެ ދުރު ރާސްތާ ވައިގެ ދިފާޢީ ނިޒާމުތަކެއް ޔޫކްރެއިނަށް ފޮނުވާފައެވެ. އެއީ އެންމެ ފަހުގެ ޒަމާނީ ނިޒާމެކެވެ. އަދި، ޖަރުމަނުވިލާތުން ވަނީ "އައިރިސް-ޓީ" މަރުކާގެ ވައިގެ ދިފާޢީ މިސައިލްތަކެއް ވެސް އެ ޤައުމަށް ފޯރުކޮށްދީފައެވެ.