ކޮލޮމްބިޔާގެ މެދުތެރޭ ސަރަޙައްދެއްގައި އޮންނަ ބޯޓުދެލި ނަގާ މައިނެއްގައި ބާރުގަދަ އެއްޗެއް ގޮވައި، އެ މައިންގައި މަސައްކަތް ކުރާ 21 މީހުން މަރުވެއްޖެއެވެ. މި ހާދިސާ ހިނގާފައި ވަނީ ވެރިރަށް ބޮގޮތާއާ 75 ކިލޯމީޓަރު އުތުރުން އޮންނަ ކުކުނޫބާ މުނިސިޕަލިޓީގެ ސުތަތައުސާ ކިޔާ ރަށްފުށު ހިސާބެއްގައި އޮންނަ މައިނެއްގައެވެ.
ކޮލޮމްބިޔާއަކީ ލެޓިން އެމެރިކާގެ ޤައުމުތަކުގެ ތެރެއިން އެންމެ ގިނަ ޢަދަދަކަށް ބޯޓުދެލި އެކްސްޕޯޓް ކުރާ ޤައުމެވެ.
މައިންގެ ތެރޭގައި ބާރުގަދަ އެއްޗެއް ގޮވި ހާދިސާގައި ހިނގި ވަގުތު އެ ތަނުގެ ތެރޭގައި މަސައްކަތް ކުރަން ތިބި އިތުރު 10 މީހުން ގެއްލިފައިވާ ކަމުގައި ކޮލޮމްބިޔާގެ އޮފިޝަލުން ވިދާޅުވެއެވެ. އަދި، އެ މީހުން ހޯދައި ސަލާމަތް ކުރުމަށް އޮފިޝަލުން މިހާރު ދަނީ މަސައްކަތް ކުރަމުންނެވެ.
ނަމަވެސް، މައިންގެ ތެރޭގައި ނުރައްކާތެރި ގޭހެއް ކަމުގައިވާ ކާބަންމޮނޮކްސައިޑް އުފެދިފައިވާ ކަމަށާއި، މައިންގެ ތެރޭގައި ތާށިވެފައިވާ ކަމަށް ބެލެވޭ މީހުން ދިރިތިއްބާ ސަލާމަތް ކުރެވޭނެ ކަމުގައި އުންމީދު ވަރަށް ކުޑަ ކަމުގައި، އެ މީހުން ސަލާމަތް ކުރަން މަސައްކަތް ކުރަމުންދާ ޓީމުތަކުން ބުނެއެވެ. މައިންގެ ތެރޭގައި ބާރުގަދަ އެއްޗެއް ގޮވާފައި ވަނީ، އަލިފާން ހިފާ ޒާތުގެ ގޭހެއް އުފެދުމުގެ ސަބަބުން ކަމަށް ބެލެވެއެވެ.
މައިންގައި ހިނގި ހާދިސާގެ އަސަރު އެ ތަނާ ޖެހި އޮންނަ އިތުރު ދެ މައިނެއް ކަމުގައިވާ އެލް ރޯބްލް އަދި އެލް މާންޓޯއަށް ވެސް ކޮށްފައިވާ ކަމުގައި ކުކުނޫބާ މުނިސިޕަލިޓީގެ ރަށެއް ކަމުގައިވާ ކުންޑީނާމާރްކާގެ ގަވަރުނަރު ނިކޮލަސް ގަރްސިޔާ ވިދާޅުވިއެވެ. އެ ސަރަޙައްދަކީ ޤަވާޢިދާ ޚިލާފަށް މައިން ކުރުމުގެ މަސައްކަތް ކުރާ ކަމަށް ފާހަގަކުރެވިފައިވާ ސަރަޙައްދެއް ނަމަވެސް، މި ހާދިސާ ހިނގާފައި ވަނީ ހުއްދަ ނަގައިގެން މަސައްކަތް ކުރަމުންދިޔަ މައިނެއްގައި ކަމަށް ވެސް ގަރްސިޔާ ވިދާޅުވިއެވެ.
2011 ވަނަ އަހަރާއި 2022 ވަނަ އަހަރުގެ މޭ މަހާ ދެމެދު ކޮލޮމްބިޔާގެ މައިންތަކުގައި 1,262 ހާދިސާ ހިނގާފައިވާ ކަމަށް ރެކޯޑުކުރެވިފައިވެއެވެ. އޭގެ ތެރޭގައި ގިނައީ އަލިފާން ރޯވެ، އެއްޗެއް ގޮވުމުގެ ހާދިސާތަކެވެ. މި ހާދިސާތަކުގައި ކޮންމެ އަހަރަކު އެވުރެޖުކޮށް 100 މީހެއްގެ ފުރާނަ ގެއްލިފައިވެއެވެ. ހުސްވި މާރިޗު މަހު ސުތަތައުސާގެ އެހެން މައިނެއްގައި ހިނގި މި ފަދަ ހާދިސާއެއްގައި 21 މީހުން ވަނީ މަރުވެފައެވެ.