ސޫދާންގެ އަސްކަރިއްޔާއާއި ހަތިޔާރުއެޅި ރެޕިޑް ސަޕޯޓް ފޯރސަސް (އާރް.އެސް.އެފް)ގެ ފައުޖުތަކާ ދެމެދު ފަށާފައިވާ ހަނގުރާމައާ ގުޅިގެން އެ ޤައުމުގައި މަސައްކަތްކުރާ ބޭރު ޤައުމުތަކުގެ މީހުން ސަލާމަތް ކުރުމުގެ މަސައްކަތް ފަށައިފިއެވެ. އަސްކަރިއްޔާއާއި އާރް.އެސް.އެފާ ދެމެދު ތިން ދުވަހުގެ މުއްދަތަކަށް ޙަމަލާ ބަދަލުކުރުން ހުއްޓައިލުމަށް އެއްބަސްވެފައިވީ ނަމަވެސް، ވެރިރަށް ޚަރްތޫމުގައި ޙަމަލާ ބަދަލުކުރުންތަކަށް ހުއްޓުމެއް އައިސްފައެއް ނުވެއެވެ.
ސޫދާންގެ އަސްކަރިއްޔާއިން ބުނީ އެ ޤައުމުގައި ދިރިއުޅޭ އަދި މަސައްކަތް ކުރާ ބޭރު ޤައުމުތަކުގެ މީހުން ސަލާމަތްކުރުމުގެ ހުއްދަ ދީފައިވާނެ ކަމުގައެވެ. އަދި އެ ކަމަށް މަގުފަހިކޮށްދޭނެ ކަމުގައެވެ. އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރްހާން މި ކަން ހާމަކުރައްވާފައި ވަނީ، އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯ ވެސް އެ ފުރުޞަތު ދޭނެ ކަމަށް ބުނެފައިވާ ދަނޑިވަޅެއްގައެވެ. އަދި، ބޭރު މީހުން ސަލާމަތް ކުރުމަށް އެ ޤައުމުގެ ވައިގެ ބަނދަރުތައް ހުޅުވައިލާނެ ކަމަށް އާރް.އެސް.އެފުން ވަނީ ބުނެފައެވެ.
ސޫދާނުގައި ތިބި އެމެރިކާއާއި، އިނގިރޭސިވިލާތާއި، ފަރަންސޭސިވިލާތުގެ އިތުރުން ޗައިނާގެ ޚާރިޖިއްޔާގެ މުވައްޒަފުން އެ ޤައުމުން ބޭލުމުގެ މަސައްކަތް މިހާރު ވަނީ ފަށާފައެވެ. އެ މީހުން ދަތުރުކުރާނީ ވައިގެ މަގުންނެވެ. އަދި، ސަޢޫދީ ޢަރަބިއްޔާއާއި އުރުދުންގެ ޚާރިޖިއްޔާގެ މުވައްޒަފުން މިއަދު ވަނީ ކަނޑުމަގުން ފުރާފައެވެ.
ޚަރްތޫމްގެ އިތުރުން އެ ރަށާ އިންވެގެން އޮންނަ އޮމްދުރްމަނާއި ބަހްރީގައި ވެސް އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ދަނީ ހަމަލާތައް ބަދަލުކުރަމުންނެވެ. އެ ތިން ރަށުގައިވާ އާރް.އެސް.އެފްގެ އަމާޒުތަކަށް އަސްކަރީ މަތިންދާބޯޓުތަކުން ދަނީ ވަރުގަދަ ވައިގެ ޙަމަލާތަކެއް ވެސް ދެމުންނެވެ. ޙަމަލާތަކުގައި ޚަރްތޫމްގެ މައި ވައިގެ ބަނދަރަށް ބޮޑެތި ގެއްލުންތަކެއް ލިބިފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ހުޅަނގުގައިވާ ދާރްފޫރުގައި ވެސް ދެ ފަރާތުން ދަނީ ހަނގުރާމަ ކުރަމުންނެވެ.
ޙަމަލާ ބަދަލުކުރުންތައް ތިން ދުވަހުގެ މުއްދަތަށް މެދުކަނޑައިލަން ދެ ފަރާތުން އެއްބަސްވެ، އިޢުލާނުކޮށްފައި ވަނީ ފިޠުރު ޢީދާ ދިމާކޮށެވެ. ނަމަވެސް، ޢީދު ނަމާދު ކުރިއަށްދިޔަ ވަގުތުގައި ވެސް ދެ ފަރާތުން ދިޔައީ ޙަމަލާތައް ބަދަލު ކުރަމުންނެވެ. ސޫދާނުގައި ދާޚިލީ ހަނގުރާމަ ފެށުނީ އާރް.އެސް.އެފްގެ ފައުޖުތަކުން ޚަރްތޫމަށް އަރައި ރިޔާސީ ގަނޑުވަރާއި އަސްކަރިއްޔާގެ އިސްވެރިޔާގެ ގެކޮޅު ހިސާރުކުރަން މަސައްކަތް ފެށުމުންނެވެ. އާރް.އެސް.އެފްގެ ފައުޖުތަކުން ވެރިރަށް ޚަރްތޫމަށް އަރާފައި ވަނީ އޭޕްރިލް މަހުގެ 15 ވަނަ ދުވަހުއެވެ.
ސޫދާނުގައި ފަށާފައިވާ ދާޚިލީ ހަމަނުޖެހުންތަކާ ގުޅިގެން އެ ޤައުމުގައި މަދަނީ ސަރުކާރެއް އެކުލަވައިލުމަށް ކުރަމުންދާ މަސައްކަތްތަކަށް މި ވަނީ ހުރަސްއެޅިފައެވެ. ސޫދާނުގައި މި ވަގުތު ވެރިކަން ކުރަނީ އަސްކަރިއްޔާއާއި އާރް.އެސް.އެފްގެ އިތުރުން ސިޔާސީ ޕާޓީތަކުން ގުޅިގެން އެކުލަވައިލާފައިވާ އިންތިގާލީ ކައުންސިލަކުންނެވެ. އެ ކައުންސިލުގައި އެންމެ އިސް ދައުރެއް އަދާކުރައްވަނީ ޖެނެރަލް އަލް-ބުރްހާނެވެ. އަދި، އޭނާގެ ދަށުން ހުންނަވަނީ އާރް.އެސް.އެފްގެ އިސްވެރިޔާ ޖެނެރަލް ދަގަލޯއެވެ.
ސޫދާނުގައި ހިނގަމުންދާ ދާޚިލީ ހަމަނުޖެހުމުގެ ސަބަބުން އެ ޤައުމަށް ވަނީ އިންސާނީ މުސީބާތެއް ކުރިމަތިވެފައެވެ. އެ ޤައުމުގެ އާބާދީގެ ބޮޑު ބައެއް ދިރިއުޅެމުން ދަނީ ބަނޑުހައިހޫނު ކަމުގައެވެ. އ.ދގެ ކާބޯތަކެއްޗާ ބެހޭ ޕުރޮގުރާމުން ސޫދާނުގައި ހިންގަމުންދާ އޮޕަރޭޝަންގައި ހަރަކާތްތެރިވާ ތިން މުވައްޒަފުން މަރައިލުމާ ގުޅިގެން، އެ ޕުރޮގުރާމް ވެސް ވަނީ ހުއްޓިފައެވެ. އަދި، ހުސްވި ހަފުތާގައި ފެށި ދާޚިލީ ހަނގުރާމައާ ގުޅިގެން 20,000 އަށްވުރެ ގިނަ ރައްޔިތުން މިހާރު ވެސް އަވައްޓެރި ޗާޑަށް ހިޖުރަކޮށްފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ) އިން ބުނެއެވެ.
ސޫދާނުގައި އިންތިގާލީ ކައުންސިލެއް އުފައްދާފައި ވަނީ ކުރީގެ ރައީސް އުމަރު އަލް-ބަޝީރުގެ ސަރުކާރު ވައްޓައިލުމަށް ފަހުއެވެ. އެއީ، މީގެ ހަތަރު އަހަރު ކުރިންނެވެ. އޭގެ ފަހުން ސޫދާނުގައި އަސްކަރީ ބަޣާވާތެއް ވެސް ކޮށްފައިވެއެވެ. މަދަނީ ސަރުކާރެއް އެކުލަވައިލުމަށް ކުރަމުންދާ މަސައްކަތަށް އާރް.އެސް.އެފުން ހުރަސްއަޅަމުންދާ ކަމުގައި އަސްކަރިއްޔާއިން ތުހުމަތު ކުރެއެވެ.