މާލީގައި ދިން ޓެރެރިސްޓް ޙަމަލާތަކެއްގައި 13 މީހުން މަރައިލައިފިއެވެ. އެ ޤައުމުގެ މެދުތެރޭގައިވާ މޮޕްޓީ ސަރަޙައްދުގައި އޮންނަ ސެވާރޭ ވައިގެ ބަނދަރަށް އަމާޒުކޮށް ދިން ޙަމަލާތަކުގައި މަރުވި މީހުންގެ ތެރޭގައި ސިފައިންގެ ތިން މީހުން ހިމެނެއެވެ. ދެން މަރުވެފައި ވަނީ ޢާންމުންނެވެ. ގިނަ ޢަދަދެއްގެ ކާރުބޮންތަކެއް ގޮއްވައިލައިގެން ދިން މި ޙަމަލާތަކުގައި 61 މީހުން ޒަޚަމުވެފައިވާ ކަމުގައި މާލީގެ ސަރުކާރުން ބުނެއެވެ.
ބޮމުގެ ޙަމަލާތައް އަމާޒުކޮށްފައިވާ ސަރަޙައްދަކީ މާލީގެ އަސްކަރިއްޔާގެ ތަމްރީނުދޭ މަރުކަޒެއް އޮންނަ ސަރަޙައްދެކެވެ. މި ޙަމަލާތަކުގައި އެ ސަރަޙައްދުގައި ހުންނަ ޢާންމުންގެ ގެދޮރަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
ބޮމު ޙަމަލާތަކަށް ފަހު ހަތިޔާރުއެޅި ޖަމާޢަތެއްގެ މީހުން ވަނީ ވައިގެ ބަނދަރު ހިފަން މަސައްކަތް ކޮށްފައެވެ. އަދި، މާލީގެ އަސްކަރިއްޔާއާއި ހަތިޔާރު އެޅި މީހުންނާ ދެމެދު ހިނގި ޙަމަލާ ބަދަލުކުރުންތަކުގައި ހަނގުރާމަވެރިންގެ 28 މީހުން މަރުވެފައިވާ ކަމުގައި ވެސް އެ ޤައުމުގެ ސަރުކާރުން ބުނެއެވެ.
ދެ ފަރާތުގެ ދެމެދުގައި ކުރިއަށްދިޔަ ޙަމަލާ ބަދަލުކުރުންތަކުގައި މާލީގައި ތިބޭ އ.ދގެ ސުލްޙަ ބަލަހައްޓާ ފައުޖުގެ ސިފައިން ވެސް ބައިވެރިވެފައިވާ ކަމުގައި މަންޒަރު ފެނުނު މީހުން ބުނެއެވެ. ޙަމަލާ ބަދަލުކުރުންތަކުގައި ބައިވެރިވެފައި ވަނީ މާލީގައި ހަރަކާތްތެރިވާ އ.ދގެ ފައުޖު (މިނުސްމާ)ގައި ހިމެނޭ ސެނެގޯލްގެ ސިފައިންނެވެ. މިނުސްމާގެ މަރުކަޒު އޮންނަނީ ޙަމަލާ ދީފައިވާ ވައިގެ ބަނދަރާއި އަސްކަރީ މަރުކަޒާ ދެމެދުގައެވެ.
މިނުސްމާއިން ވަނީ އޭޕްރިލް 22 ވަނަ ދުވަހު ދީފައިވާ ޙަމަލާތަކުގައި ޢާންމުންގެ ގިނަ ޢަދަދެއްގެ ބަޔަކު މަރުވެފައިވާ ކަން ފާހަގަކޮށް، ޙަމަލާތައް އެންމެ ހަރުކަށި އިބާރާތުން ކުށްވެރިކޮށްފައެވެ. އަދި، މާލީގައި ސުލްޙަމަސަލަސްކަން ދެމެހެއްޓުމަށް މިނުސްމާއިން އެ ޤައުމުގެ އަސްކަރިއްޔާއަށް އެހީތެރިކަން ފޯރުކޮށްދެމުންދާނެ ކަމުގައި ވެސް އެ އިދާރާއިން ބުންޏެވެ.
މަސްރަޙު ދިރާސާކުރާ ފަރާތްތަކުން ބުނާ ގޮތުގައި ޙަމަލާދީފައިވާ އަސްކަރީ މަރުކަޒާއި ވައިގެ ބަނދަރަކީ ރަޝިޔާގެ އެހީތެރިކަމާ އެކު ހިންގާ ތަންތަނެވެ. އަދި، އެ ތަނުގައި ހުރި މަތިންދާބޯޓުތަކަކީ ރަޝިޔާއިން ފޯރުކޮށްދީފައިވާ ތަކެތި ކަމަށާއި، މާލީގެ ސިފައިން ތަމްރީނު ކުރުމަށް ރަޝިޔާގެ ވެގްނަރ ގުރޫޕުގެ ކުލީ ސިފައިން ހަރަކާތްތެރިވަމުންދާ ކަމުގައި ވެސް އެ ފަރާތްތަކުން ބުނެއެވެ. މާލީގެ އަސްކަރިއްޔާއިން ރަޝިޔާއާ އެކު މަސައްކަތް ކުރަން ފަށާފައި ވަނީ 2022 ވަނަ އަހަރުއެވެ.
އޭޕްރިލް 22 ވަނަ ދުވަހު މާލީގެ އަސްކަރިއްޔާއިން ވަނީ މޫރްދިޔާއާއި ބޯނީގައި ގާއިމުކޮށްފައިވާ ހަތިޔާރު އެޅި ޖަމާޢަތެއްގެ މަރުކަޒުތަކަކަށް ވެސް ހަމަލާދީފައެވެ. ބޯނީއަކީ ވެސް މޮޕްޓީ ސަރަޙައްދުގައި އޮންނަ ރަށެކެވެ. އަދި، މޫރްދިޔާއަކީ ކޫލިކޮރޯ ސަރަޙައްދުގެ ރަށެކެވެ. އެ ޙަމަލާތަކުގައި ހަނގުރާމަވެރިންގެ 60 އަށްވުރެ ގިނަ މީހުން މަރުވެފައިވާ ކަމުގައި އެ ޤައުމުގެ ސަރުކާރުން ބުނެއެވެ.
މި އޮޕަރޭޝަންތައް ހިންގާފައި ވަނީ ނާރާގައި ދަތުރުކުރަމުންދިޔަ އަސްކަރީ ގާފިލާއަކަށް ހަތިޔާރު އެޅި ގުރޫޕުން ޙަމަލާދިނުމާ ގުޅިގެންނެވެ. އެ ޙަމަލާތަކުގައި މާލީގެ އިންތިގާލީ ރައީސްގެ ޗީފް އޮފް ސްޓާފާއި ސަރުކާރުގެ އިސް ދެ މީހަކު މަރުވެފައިވާ ކަމުގައި ވެސް އެ ޤައުމުގެ ސަރުކާރުން ބުނެއެވެ. މި ހަމަލާތަކުގެ ފަހަތުގައި ވަނީ އަލް-ޤައިދާއާ ގުޅުން އޮންނަ ޖަމާޢަތް އަލް-އިސްލާމް ވަލް މުސްލިމީން (ޖޭ.އެން.އައި.އެމް) ކަމުގައި އެ ޤައުމުގެ ސަރުކާރުން ތުހުމަތު ކުރެއެވެ.