އެމެރިކާއަށް ދުވަހަކު ވެސް މަޢާފެއް ނުކުރައްވާނެ ކަމުގައި ވިދާޅުވެ، ރަޝިޔާގެ ޚާރިޖީ ވަޒީރު ސަރްގޭ ލެވްރޮފް އެމެރިކާއަށް ވަރަށް ބޮޑަށް ފާޑުވިދާޅުވެއްޖެއެވެ. އޭނާ ވޮޝިންގްޓަނަށް މަޢާފު ނުކުރާނެ ކަމަށް ވިދާޅުވެފައި ވަނީ، އ.ދގެ ބައްދަލުވުމެއްގައި ބައިވެރިވެވަޑައިގަތުމަށް އޭނާ ނިއު ޔޯކަށް ކުރައްވަން ހަމަޖެހިފައި އޮތް ދަތުރުފުޅެއްގެ ވަފުދުގައި ހިމެނޭ ރަޝިޔާގެ ނޫސްވެރިންތަކަކަށް ވިސާ ދިނުމަށް ވޮޝިންގްޓަނުން ދެކޮޅު ހެދުމުންނެވެ.
"ވޮޝިންޓަނުން އެ ކުރި ކަންތައް އަޅުގަނޑުމެން ދުވަހަކު ވެސް ހަނދާނެއް ނުތެނޭނެ. އަދި، އެ ކަމަށް ދުވަހަކު ވެސް މަޢާފެއް ނުކުރާނަން،" އެމެރިކާއަށް ފާޑުވިދާޅުވެ ވާހަކަފުޅު ދައްކަވަމުން ލެވްރޮފް ވިދާޅުވިއެވެ. އަދި، އެމެރިކާއިން ވަރަށް ބޮޑަށް ބިރުގަނެފައިވާ ކަމުގައި ވެސް ލެވްރޮފް ވިދާޅުވިއެވެ. އަދި، އެއީ ނޫސްވެރިން ކަން ވެސް ކަށަވަރު ކުރެވޭނެ ގޮތެއް ނެތެވެ.
އ.ދގެ ސަލާމަތީ މަޖިލީހުގެ ރިޔާސަތު މި ވަގުތު ބަލަހައްޓަމުން ދަނީ ރަޝިޔާއިންނެވެ. ލެވްރޮފް ނިއު ޔޯކަށް ވަޑައިގަންނަވަން ހަމަޖެހިފައި އޮތީ ސަލާމަތީ މަޖިލީހުގެ ބައްދަލުވުންތަކެއްގެ ރިޔާސަތު ބަލަހައްޓަވާށެވެ. އޭނާއާ އެކު ދަތުރުކުރާ ވަފުދުގައި ހިމަނާފައި ވަނީ ކިތައް ނޫސްވެރިންނަށް ސާފެއް ނޫނެވެ.
"އެމެރިކާއަކީ އެންމެ ބާރުގަދަ، އެންމެ ހަމަޖެހޭ، އެންމެ މިނިވަން ޤައުމު ކަމަށް އަމިއްލައަށް ދަޢުވާ ކުރާ ޤައުމު. ނަމަވެސް، އެމެރިކާއިން އެ ކުރީ ކުކުޅެއް ކުރާނެ ފަދަ އަމަލެއް. އެ ކުރީ ވަރަށް ނާތަހުޒީބު އަމަލެއް. އެމެރިކާއަކީ ޚިޔާލު ފާޅުކުރުމުގެ މިނިވަންކަމާއި މަޢުލޫމާތު ހޯދުމުގެ މިނިވަންކަން ހައްދެއް އަދި އިމެއް ނެތި ދޫކޮށްލާފައިވާ ކަމަށް ބުނެ ވަކާލާތުކުރާ ޤައުމު. ނަމަވެސް، އެ ކުރީ ވަރަށް ދަށުދަރަޖައިގެ އަމަލެއް،" ލެވްރޮފް ވިދާޅުވިއެވެ.
އެމެރިކާއާއި ރަޝިޔާއާ ދެމެދު މި ވަގުތު އުފެދިފައިވާ އެންމެ ބޮޑު ނުތަނަސްކަމަކީ ޔޫކްރެއިނަށް އަރައި ރަޝިޔާއިން ކުރަމުންދާ ހަނގުރާމައާ ގުޅިގެން އުފެދިފައިވާ މައްސަލައެވެ. އެ ހަނގުރާމައިގައި އެމެރިކާއިން ދަނީ ޔޫކްރެއިނަށް ހަތިޔާރާއި އަސްކަރީ އެހީގެ އިތުރުން މާލީ ގޮތުން ވެސް އެހީތެރިކަން ފޯރުކޮށްދެމުންނެވެ. ޔޫކްރެއިނަށް މިހާތަނަށް އެންމެ ބޮޑު ޢަދަދެއްގެ އެހީތެރިކަމެއް ފޯރުކޮށްދީފައި ވަނީ ވެސް އެމެރިކާއިންނެވެ. މީގެ އިތުރުން، ރަޝިޔާއިން ޗައިނާއާ ގުޅުން ބަދަހިކުރުމަކީ ވެސް އެމެރިކާ ރުހޭ ކަމެއް ނޫނެވެ.