މިޔަންމާގެ އަސްކަރިއްޔާއިން އެ ޤައުމުގެ ރައްޔިތުންނާ ދެކޮޅަށް ހިންގަމުންދާ ލޭއޮހޮރުވުންތައް ހުއްޓުވަން ދެކުނުއިރުމަތީ އޭޝިޔާގެ ޤައުމުތަކުން ކުރަމުންދާ މަސައްކަތްތަކުގައި މާ ބޮޑު ކުރިއެރުމެއް ލިބިފައި ނުވާ ކަމަށް އިންޑޮނީޝިޔާގެ ރައީސް ޖޯކޯ ވިޑޯޑޯ ވިދާޅުވެއްޖެއެވެ. އިންޑޮނީޝިޔާގެ ފްލޮރޭސްގައި ބޭއްވި ދެކުނުއިރުމަތީ އޭޝިޔާގެ ޤައުމުތަކުގެ ގުޅުން (އާސިޔާން)ގެ ބައްދަލުވުމުގައި މި ކަމާ ގުޅޭ ގޮތުން ފުޅާ ދާއިރާއެއްގައި މަޝްވަރާކޮށްފައިވެއެވެ.
މިޔަންމާގެ އަސްކަރީ ސަރުކާރާ ދެކޮޅު ރައްޔިތުންނާ ދެކޮޅަށް އެ ޤައުމުގެ އަސްކަރިއްޔާއިން ހިންގަމުންދާ ލޭއޮހޮރުވުންތައް ހުއްޓުވައި، އެ ޤައުމުގައި ސުލްޙަ ގާއިމުކުރަން އާސިޔާންގެ މެންބަރު ޤައުމުތަކުން ވަނީ ރޭވުމަށް އެކުލަވައިލާފައެވެ. މީގެ ދެ އަހަރު ކުރިން އެކުލަވައިލާފައިވާ މި ހުށަހެޅުމަށް މިޔަންމާގެ އަސްކަރީ ސަރުކާރުން އެއްބަސްވި ނަމަވެސް، ސުލްޙައިގެ ޕްލޭން ތަންފީޒު ކުރުމުގައި އެއްވެސް ކުރިއެރުމެއް ލިބިފައެއް ނެތެވެ. އަދި، މިޔަންމާގައި ހިންގަމުންދާ ލޭއޮހޮރުވުންތައް ހުއްޓުވަން އާސިޔާން ވަނީ ނުކުޅެދިފައެވެ.
މިޔަންމާގެ އަސްކަރިއްޔާއިން އެ ޤައުމުގެ އިންތިޚާބީ ސަރުކާރު ވައްޓައިލާ، ބޮޑުވަޒީރު އޮންގް ސަން ސޫ ކީ ވެރިކަމުން ދުރުކޮށްފައި ވަނީ 2021 ވަނަ އަހަރުގެ ފެބުރުވަރީ މަހުއެވެ. އެ ކަމާ ގުޅިގެން ފެށި ހަމަނުޖެހުންތަކުގައި ސޫ ކީއަށް ތާޢީދުކުރާ އެތަކެއް ހާސް ބަޔަކު މަރުވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
"މިޔަންމާގެ އަސްކަރިއްޔާއިން ހިންގަމުންދާ ލޭއޮހޮރުވުންތައް ހުއްޓުވަން އާސިޔާނުން ކުރަމުންދާ މަސައްކަތްތަކަށް އެއްވެސް ކުރިއެރުމެއް ލިބިފައި ނުވާ ކަން ގަބޫލުކުރަން. އެ ހަމަނުޖެހުންތަކުގެ ސަބަބުން އެއްވެސް ޤައުމަކަށް ކުރާނެ ފައިދާއެއް ނެތް. އެ ހަމަނުހެންތަކާއި ލޭއޮހޮރުވުންތައް ހުއްޓައިލަން ޖެހޭ،" ވިޑޯޑޯ ވިދާޅުވިއެވެ. މި މައްސަލައިގައި އާސިޔާނަށް ލިބެމުންދާ ނާކާމިޔާބީތަކާ ގުޅިގެން އެ އިއްތިހާދުގެ ކުރިމަގާ މެދު ވެސް މިހާރު ވަނީ ސުވާލު އުފެދިފައެވެ.
މިޔަންމާގައި ސުލްޙަ ގާއިމުކުރަން ކުރަމުންދާ މަސައްކަތްތަކުގައި ދެމިހުރުމަކީ އާސިޔާނަށް އޮތް ހަމައެކަނި މަގު ކަމުގައި ވިދޯދޯ ދެކިވަޑައިގަންނަވައެވެ. އަދި، އެ ގޮތުގައި ދެމި ނުތިބެވޭ ނަމަ، އާސިޔާން ރޫޅުމަކީ އެކަށީގެންވާ ކަމެއް ކަމުގައި ވެސް އޭނާ ވިދާޅުވިއެވެ. "އެއީ އާސިޔާންގެ އެއްވެސް މެންބަރު ޤައުމަކުން ދެކެން ބޭނުންވާނެ ދުވަހެއް ނޫން،" ވިޑޯޑޯ ވިދާޅުވިއެވެ. ނަމަވެސް، މި މައްސަލަ ހައްލުކުރާނެ ގޮތަކާ މެދު އެ ޤައުމުތަކުގެ މެދުގައި ވަނީ ޚިޔާލުތަފާތުވުން އުފެދިފައެވެ.
މި ކަމާ މެދު މަޝްވަރާ ކުރަން ކުރަމުންދާ މަސައްކަތްތަކުގައި މިޔަންމާގެ އަސްކަރީ ސަރުކާރު ބައިވެރި ކުރުމަށް އާސިޔާންގެ ބައެއް މެންބަރު ޤައުމުތަކުން ބޭނުންވެއެވެ. ނަމަވެސް، އެ އިއްތިހާދުގެ ހުރިހާ މެންބަރު ޤައުމަކުން މި ކަމަށް ތާޢީދެއް ނުކުރެއެވެ. މި މައްސަލައާ ގުޅިގެން، ސަރަޙައްދީ އެހެން މައްސަލަތަކަށް އިސްކަން ދިނުމަށް ވެސް އާސިޔާނަށް ހުރަސްއެޅިފައިވާ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
މިޔަންމާގައި ހިންގަމުންދާ ލޭއޮހޮރުވުންތަކާ ގުޅިގެން 10 މެންބަރު ޤައުމުގެ މައްޗަށް އެކުލެވިގެންވާ އާސިޔާނުން ވަނީ މިޔަންމާގެ އަސްކަރީ ސަރުކާރު އެކަހެރިކޮށްފައެވެ. އަދި، ސަރުކާރާ ދެކޮޅު ފަރާތްތަކާ ދެކޮޅަށް އަސްކަރިއްޔާއިން ހިންގަމުންދާ ލޭއޮހޮރުވުންތައް ހުއްޓައިލާފައެއް ނުވެއެވެ. ސަރުކާރާ ދެކޮޅު ފަރާތްތަކުގެ ކޭމްޕަކަށް އެ ޤައުމުގެ އަސްކަރިއްޔާއިން ދާދިފަހުން ދިން ނުރައްކާތެރި ވައިގެ ޙަމަލާތަކެއްގައި 170 އަށްވުރެ ގިނަ މީހުން ވަނީ މަރައިލާފައެވެ. އޭގެ ތެރޭގައި ގިނަ ޢަދަދެއްގެ ކުޑަކުދިން ވެސް ހިމެނެއެވެ.