ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމަ ހުއްޓުމަކަށް ގެނައުމާ ގުޅޭ ގޮތުން މަޝްވަރާ ކުރެއްވުމަށް ޗައިނާގެ ޚާއްޞަ މަންދޫބެއް ޔޫކްރެއިނަށް ފޮނުވަން ޗައިނާގެ ރައީސް ޝީ ޖިންޕިންގް ނިންމަވައިފިއެވެ. އޭނާގެ ޚާއްޞަ މަންދޫބެއްގެ ގޮތުން ޔޫކްރެއިނަށް ވަޑައިގަންނަވާނީ ޚާރިޖީ ދާއިރާގެ މާހިރެއް ކަމުގައިވާ ލީ ހުއީއެވެ. 2009 ވަނަ އަހަރުން ފެށިގެން 2019 ވަނަ އަހަރާ ދެމެދު އޭނާ ހުންނެވީ ޗައިނާއިން ރަޝިޔާއަށް ކަނޑައަޅާފައި ހުންނެވި ސަފީރުގެ މަގާމުގައެވެ.
ލީއާ އެކު ޗައިނާގެ ޚާރިޖިއްޔާގެ އިސް ވަފުދެއް ޔޫކްރެއިނަށް ދަތުރުކުރާނެއެވެ. އަދި، އެއަށްފަހު ރަޝިޔާއަށް ޒިޔާރަތްކޮށް، ރަޝިޔާގެ ރައީސް ވްލަޑިމިޔަރ ޕުޓިންއާ އޭނާގެ ސަރުކާރުގެ އިސްވެރިންނާ ބައްދަލުކުރާނެއެވެ. ވިލާތުގެ ބައެއް ޤައުމުތަކަށް ވެސް ލީ ވަޑައިގަންނަވައި، ހަނގުރާމަ ހުއްޓުވަން ކުރެވިދާނެ ކަންކަމާ ގުޅޭ ގޮތުން އެ ޤައުމުތަކުގެ އިސްވެރިންނާ މަޝްވަރާ ކުރައްވާނެ ކަމުގައި ޗައިނާއިން ބުނެއެވެ.
ރަޝިޔާ ސިފައިން ޔޫކްރެއިނަށް ފޮނުވައިގެން ޕުޓިން ހަނގުރާމަ ފައްޓަވާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ލީއަކީ، މި ހަނގުރާމަ ފެށި ފަހުން ޔޫކްރެއިނަށް ދަތުރުފުޅެއް ކުރައްވާ ޗައިނާގެ ފުރަތަމަ އިސްވެރިޔާއެވެ. ޗައިނާގެ ޚާރިޖިއްޔާގެ އިސްވެރިއަކު ޔޫކްރެއިނަށް ފޮނުވާނެ ކަން ޝީ ފުރަތަމަ އިޢުލާނު ކުރައްވާފައި ވަނީ ޔޫކްރެއިނުގެ ރައީސް ވޮލޮޑޮމީރް ޒެލެންސްކީއާ އެކު ފޯނުން ވާހަކަފުޅު ދައްކަވަމުންނެވެ. އެއީ ހުސްވި އޭޕްރިލް މަހުއެވެ.
ރަޝިޔާ-ޔޫކްރެއިން ހަނގުރާމަ ނިމުމަކަށް ގެންނަން މެދުވެރިއެއްގެ ދައުރު އަދާކުރަން ޗައިނާއިން ވަނީ އިސްނަގާފައެވެ. މި ހަނގުރާމައާ ގުޅޭ ގޮތުން ޗައިނާއިން ގެންގުޅެނީ މެދުމިނުގެ ވިސްނުމެއް ކަމުގައި އެ ޤައުމުން ބުނެއެވެ. ނަމަވެސް، ޗައިނާއިން ރަޝިޔާއާ އެކު އެކި ދާއިރާތަކުން ގާތް ގުޅުމެއް ބާއްވާތީ އެ ޤައުމަށް ވަނީ ފާޑުކިޔުންތައް އަމާޒުވެފައެވެ. މޭ މަހު ފޯނުން ގުޅުއްވައި ޒެލެންސްކީއާ ޝީއާ ދެމެދު ބާއްވާފައިވާ މަޝްވަރާތަކަކީ، ހަނގުރާމަ ފެށި ފަހުން ދެ ބޭފުޅުން ވާހަކަފުޅު ދެއްކެވި ފުރަތަމަ ފަހަރެވެ.
ޗައިނާގެ ޚާރިޖީ ވުޒާރާގެ ތަރުޖަމާނު ވޮންގް ވެންބިން ވިދާޅުވީ ޔޫކްރެއިނާއި ރަޝިޔާގެ އިތުރުން ލީގެ ދަތުރުފުޅުގައި އޭނާ ޕޮލެންޑާއި ފަރަންސޭސިވިލާތާއި ޖަރުމަނުވިލާތަށް ވަޑައިގަންނަވާނެ ކަމުގައެވެ. "ޗައިނާއަކީ ސުލްޙަ ކުރިއަރުވަން މަސައްކަތް ކުރާ ޤައުމެއް. މަޝްވަރާކޮށްގެން މައްސަލަތައް ހައްލުކުރަން އިސްކަންދޭ ޤައުމެއް. ލީގެ ދަތުރުފުޅުން ރަމްޒުކޮށްދެނީ އެ ކަންކަން،" ވޮންގް ވިދާޅުވިއެވެ.
ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެންނަން ޗައިނާއިން ބިނާކުރަނިވި ދައުރެއް އަދާ ކުރުމުގައި ދެމިއޮންނާނެ ކަމަށާއި، ރަޝިޔާއާއި ޔޫކްރެއިނާ ދެމެދު ސުލްޙައިގެ މަޝްވަރާތަކެއް ފެށުމަށް ޗައިނާއިން މަސައްކަތް ކުރަމުންދާނެ ކަމުގައި ވެސް ވޮންގް ވިދާޅުވިއެވެ.
ހަނގުރާމައިގެ އެންމެ ފުރަތަމަ ދުވަހުން ފެށިގެން ވެސް ޙަމަލާތައް ހުއްޓައިލަން ޗައިނާއިން ވަކާލާތު ކުރަމުން ގޮސްފައިވާނެ ކަމުގައި އެ ޤައުމުގެ ޚާރިޖީ ވަޒީރު ޗިން ގަންގް ވެސް ވަނީ ވިދާޅުވެފައެވެ. ހަނގުރާމަ ނިމުމަކަށް ގެނެސް ދެ ޤައުމުގެ ދެމެދުގައި ސުލްޙަ ގާއިމުކުރުމަށް ޗައިނާއިން ވަނީ ހުށަހެޅުމެއް ވެސް ހުށަހަޅާފައެވެ. އެއީ ފެބުރުވަރީ މަހުއެވެ. މި ހުށަހެޅުމާ މެދު ޗައިނާއިން މިހާތަނަށް މަޝްވަރާކޮށްފައި ވަނީ ރަޝިޔާއާ އެކު އެކަންޏެވެ. ލީގެ ދަތުރުފުޅުގައި ޔޫކްރެއިނުގެ ރައީސާ އެކު މި ކަމާ މެދު މަޝްވަރާ ކުރާނެ ކަމަށް ބެލެވެއެވެ.
ޗައިނާގެ ވަފްދުގެ އިސްވެރިއެއްގެ ގޮތުގައި ލީ ހަމަޖެއްސުމުން ބައެއް ފަރާތްތަކުން ވަނީ ކަންބޮޑުވެފައެވެ. އެއް ސަބަބަކީ، ޗައިނާއިން ރަޝިޔާއަށް ކަނޑައަޅާފައި ހުންނެވި ސަފީރުގެ ހައިސިއްޔަތުން އޭނާ ޕުޓިންއާ އެކު ބާއްވަވާފައިވާ ގާތް ގުޅުމެވެ. ލީއަކީ ވަރަށް ގާތް ރަޙުމަތްތެރިއެއްގެ ގޮތުގައި ޕުޓިން ވެސް ދެކެވަޑައިގަންނަވައެވެ. އަދި، ޕުޓިން ވަނީ ލީއަށް "އޯޑަރ އޮފް ފްރެންޑްޝިޕް މެޑަލް" ވެސް އަރުވާފައެވެ.