ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި ހަމަނުޖެހުންތަކުގެ އިތުރުން ޤުދުރަތީ ކާރިސާތަކާ ގުޅިގެން ރެފިއުޖީންނަށް ވެފައިވާ މީހުންގެ ޢަދަދު ހުސްވި 2022 ވަނަ އަހަރު 71 މިލިޔަނަށް އަރާފައިވާ ކަމުގައި މަސްރަޙު ދިރާސާކުރާ ފަރާތްތަކުން ނެރުނު ރިޕޯޓެއްގައި ހާމަކޮށްފިއެވެ. މި ކަން ހާމަކޮށްފައި ވަނީ އިންޓަރނަލް ޑިސްޕްލޭސްމެންޓް މޮނިޓަރިންގ ސެންޓަރ (އައި.ޑީ.އެމް.ސީ)އާއި ނޯވޭގެ ރެފިޔުޖީ ކައުންސިލް (އެން.އާރް.ސީ)އިން ޢާންމުކޮށްފައިވާ ރިޕޯޓެއްގައެވެ.
2022 ވަނަ އަހަރަކީ މޫސުމީ ބަދަލުތަކާ ގުޅިގެން ދުނިޔޭގެ އެކި ކަންކޮޅުތަކަށް ނުރައްކާތެރި ޤުދުރަތީ ކާރިސާތަކާ ކުރިމަތިވި އަހަރެވެ. އަދި، ގިނަ ޤައުމުތަކެއްގައި ހިނގަމުންދާ ހަމަނުޖެހުންތަކުގައި އެތަކެއް މިލިޔަން ބަޔަކު ހާލުގައި ޖެހުނު އަހަރެކެވެ. މިއާއެކު، އަމިއްލަ ގެދޮރާއި ވަޒަން ދޫކޮށް އަމިއްލަ ޤައުމުގައިވާ ރައްކާތެރި އެހެން ހިސާބުތަކަށް ދަތުރުކުރަން އެތަކެއް މިލިޔަން މީހުންނަކަށް މަޖުބޫރުވިއެވެ.
އައި.ޑީ.އެމް.ސީން ބުނީ، އެ މަރުކަޒުގައި ރެފިއުޖީންގެ ގޮތުގައި ރަޖިސްޓަރީ ކޮށްފައިވާ މީހުންގެ ޢަދަދު 71.1 މިލިޔަނަށް އަރާ ކަމުގައެވެ. އެއީ، އޭގެ ކުރީ އަހަރާ އަޅައިބަލާއިރު 20 އިންސައްތަ އިތުރު ޢަދަދެކެވެ. ރަޝިޔާއިން ޔޫކްރެއިނަށް އަރައި ފަށާފައިވާ ހަނގުރާމައާއި ޕާކިސްތާނުގައި ފެންބޮޑުވުމާ ގުޅިގެން ރެފިއުޖީންގެ ޢަދަދު އެތަކެއް ގުނައަކުން އިތުރުވެފައިވާ ކަމުގައި އެ މަރުކަޒުން ބުނެއެވެ.
2022 ވަނަ އަހަރު އަމިއްލަ ގެދޮރާއި ވަޒަން ދޫކޮށް އަމިއްލަ ޤައުމުގައި ރައްކާތެރި ހިސާބުތަކަށް ބަދަލުވާން މަޖުބޫރިވި މީހުންގެ ޢަދަދު 60.9 މިލިޔަނަށް އަރާ ކަމުގައި އައި.ޑީ.އެމް.ސީން ބުންޏެވެ. މީގެ ތެރެއިން ބައެއް މީހުން އެއް ފަހަރަށް ވުރެ ގިނަ ފަހަރު، ރައްކާތެރި ހިސާބުތަކަށް ދަތުރުކުރަން ޖެހުނު ކަމުގައި އެ މަރުކަޒުން ބުނެއެވެ. މިއީ، 2021 ވަނަ އަހަރާ އަޅައިބަލާއިރު 60 އިންސައްތަ އިތުރު ޢަދަދެކެވެ.
"ރަޝިޔާ-ޔޫކްރެއިން ހަނގުރާމައާއި ޕާކިސްތާނަށް ކުރިމަތިވި ފެންބޮޑުވުމާ ގުޅިގެން އަމިއްލަ ގެދޮރާއި ވަޒަން ދޫކޮށް ގިނަ ޢަދަދެއްގެ ބަޔަކު ރައްކާތެރި ހިސާބުތަކަށް ދަތުރުކުރަން މަޖުބޫރުވި. މީގެ އިތުރުން އެމެރިކާ ބައްރާއި ޕެސިފިކް ސަރަޙައްދުގައި ރެފިއުޖީންނަށްވި މީހުންގެ ޢަދަދުތައް ވެސް ވަނީ އިތުރުވެފައި،" އައި.ޑީ.އެމް.ސީގެ އިސްވެރިޔާ އެލެގްޒެންޑްރާ ބިލާކް ވިދާޅުވިއެވެ.
ހުސްވި އަހަރު އެކި ޤައުމުތަކުގައި ހިނގަމުންދާ ހަމަނުޖެހުންތަކާ ގުޅިގެން ރެފިއުޖީންނަށްވި މީހުންގެ ޢަދަދު 28.3 މިލިޔަނަށް އަރާ ކަމަށާއި، އެއީ އޭގެ ކުރީ އަހަރާ އަޅައިބަލާއިރު ދެ ގުނަ އިތުރު ޢަދަދެއް ކަމުގައި ވެސް ބިލާކް ވިދާޅުވިއެވެ. މީގެ ތެރެއިން 17 މިލިޔަން މީހުންނަކީ ރަޝިޔާ-ޔޫކްރެއިން ހަނގުރާމައިގެ ސަބަބުން ރައްކާތެރި ހިސާބުތަކަށް ދަތުރުކުރަން ޖެހުނު މީހުންނެވެ. އަދި، ޕާކިސްތާނަށް ކުރިމަތިވި ފެންބޮޑުވުމުގައި އަށް މިލިޔަން މީހުންނަކީ އަމިއްލަ ގެދޮރާއި ވަޒަން ދޫކޮށް ރައްކާތެރި ހިސާބުތަކަށް ބަދަލުވާން ޖެހިފައެވެ.
އެފްރިކާ ބައްރަށް ބަލައިލާއިރު، އެ ބައްރުގެ އެކި ކަންކޮޅުތަކުގައި 16.5 މިލިޔަން މީހުން ވަނީ ރެފިއުޖީންނަށް ވެފައެވެ. އޭގެ ތެރޭގައި އެންމެ ގިނައީ ޑިމޮކްރެޓިކް ރިޕަބްލިކް އޮފް ކޮންގޯއާއި އިތިއޯޕިޔާގައި ހިނގަމުންދާ ހަމަނުޖެހުންތަކުގެ ސަބަބުން ރެފިއުޖީންގެ ހާލަތް ކުރިމަތިވި މީހުންނެވެ. އަދި، މި ޢަދަދުތައް މި އަހަރުގެ ތެރޭގައި އެތަކެއް ގުނައެއް އިތުރުވާނެ ކަމަށް ބެލެވޭ ކަމުގައި ބިލާކް ވިދާޅުވިއެވެ.
އޭޕްރިލް 15 ވަނަ ދުވަހު ސޫދާންގައި އެ ޤައުމުގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ވަނީ ޙަމަލާ ބަދަލުކުރަން ފަށާފައެވެ. ސޫދާންގެ ދާޚިލީ މަސްރަޙު ހޫނުވެ، އެ ޤައުމުގައި ރައްކާތެރި ހިސާބުތަކަށް ބަދަލުވެފައިވާ މީހުންގެ ޢަދަދު މިހާރު ވެސް ވަނީ 700,000 އަށް އަރާފައެވެ. އަދި، 150,000 އަށްވުރެ ގިނަ މީހުން ވަނީ އެ ޤައުމު ދޫކޮށް އަވައްޓެރި ޤައުމުތަކަށް ހިޖުރަކޮށްފައެވެ.
ދުނިޔޭގެ އެކި ކަންކޮޅުތަކުގައި މި ވަގުތު ތިބި ރެފިއުޖީން ނުވަތަ އިންޓަރނަލީ ޑިސްޕްލޭސްޑް ޕަރސަންސް (އައި.ޑީ.ޕީ)ގެ ތެރެއިން ހަތަރު ބައިކުޅަ ތިންބައި މީހުން ތިބީ އެންމެ 10 ޤައުމުގައެވެ. އެއީ، ސޫރިޔާ، އަފްޣާނިސްތާން، ކޮންގޯ، ޔޫކްރެއިން، ކޮލަމްބިޔާ، އިތިއޯޕިޔާ، ޔަމަން، ނައިޖީރިޔާ، ސޮމާލިޔާ އަދި ސޫދާނެވެ. އެ ޤައުމުތަކުގައި ރެފިއުޖީން ދިރިއުޅެމުން ދަނީ ވަރަށް ނިކަމެތި ހާލުގައި ކަން ވެސް ފާހަގަކޮށްލަން ޖެހެއެވެ.