ފަލަސްޠީނުގެ 33 މީހުން ޝަހީދުކޮށްލުމަށް ފަހު، ޔަހޫދީ އިސްރާޢީލުން މެދުކެނޑުމެއް ނެތި ޣައްޒާއަށް ދެމުންދިޔަ ނުރައްކާތެރި ޙަމަލާތަކާއި ލޭއޮހޮރުވުންތައް ހުއްޓައިލައިފިއެވެ. މޭ 9 ވަނަ ދުވަހުން ފެށިގެން ޔަހޫދީ ޖައްބާރު އިސްރާޢީލުގެ އަސްކަރިއްޔާއާއި ފަލަސްޠީނުގެ މިނިވަންކަމަށް ޖިހާދުކުރަމުންދާ ޖަމާޢަތެއް ކަމުގައިވާ އިސްލާމިކް ޖިހާދު (ޕީ.އައި.ޖޭ)އާ ދެމެދު ދިޔައީ ޙަމަލާ ބަދަލު ކުރަމުންނެވެ. އިސްރާޢީލުގެ އަސްކަރީ މަތިންދާބޯޓުތަކުން މެދުކެނޑުމެއް ނެތި ޣައްޒާއަށް ބޮން އަޅަމުން ގޮސްފައިވާއިރު، ޕީ.އައި.ޖޭން ވަނީ އިސްރާޢީލުގެ ރަށްތަކަށް ވަރުގަދަ ރޮކެޓް ޙަމަލާތަކެއް ދީފައެވެ.
ޙަމަލާ ބަދަލުކުރުންތައް ހުއްޓުމަކަށް ގެނެސްފައި ވަނީ މިޞްރުން މެދުވެރިއެއްގެ ދައުރު އަދާކޮށްގެންނެވެ. މިޞްރުގައި ބޭއްވި މަޝްވަރާތަކަށް ފަހު ޔަހޫދީ އިސްރާޢީލާއި ޕީ.އައި.ޖޭން ވެސް ވަނީ ޙަމަލާތައް ހުއްޓައިލުމަށް އެއްބަސްވެފައެވެ. ޔަހޫދީ ޓެރެރިސްޓު އިސްރާޢީލާއި ޕީ.އައި.ޖޭއާ ދެމެދު އެންމެ ފަހުން މި ފަދަ ގޮތަކަށް ޙަމަލާ ބަދަލުކޮށްފައި ވަނީ 2021 ވަނަ އަހަރެވެ.
މިޞްރުން ނެރުނު ބަޔާނެއްގައި ބުނެފައި ވަނީ އިސްރާޢީލާއި ފަލަސްޠީނުގެ މުޖާހިދުންގެ ޖަމާޢަތްތަކުން ޙަމަލާ ބަދަލުކުރުން ހުއްޓައިލަން އެއްބަސްވެފައިވާ ކަމުގައެވެ. އަދި، ޢާންމުންނަށް ޙަމަލާދިނުމާއި، އެ މީހުންގެ ގެދޮރަށް ޙަމަލާދިނުން ހުއްޓައިލަން އެއްބަސްވާ ކަމުގައެވެ.
ޙަމަލާ ބަދަލުކުރުން ހުއްޓައިލުމާ އެކު، ކުރިން ފަޅުކޮށް އޮތް ޣައްޒާގެ މަގުތައް ވަނީ ފުރައިލާފައެވެ. ބައެއް މީހުން އެ ކަމާ މެދު އުފާ ފާޅުކޮށްފައިވާއިރު، އަނެއް ބަޔަކު ވަނީ ޔަހޫދީންގެ ޓެރެރިސްޓު ޙަމަލާތަކުގައި ޝަހީދުކޮށްލާފައިވާ މީހުންގެ ޢާއިލާތަކަށް ޒިޔާރަތްކޮށް ތަޢުޒިޔާ ކިޔާފައެވެ. ޔަހޫދީންގެ ޙަމަލާތަކުގައި ޝަހީދުކޮށްލާފައިވާ މީހުންގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނެއެވެ.
ޔަހޫދީ އިސްރާޢީލުން ޣައްޒާގައި ހިންގަމުންދިޔަ ލޭއޮހޮރުވުންތައް ހުއްޓައިލުމުން އެމެރިކާއިން ވަނީ އެ ކަމަށް މަރުޙަބާ ކިޔާފައެވެ. އަދި، ވައިޓް ހައުސްގެ ތަރުޖަމާނު ކެރިން ޜޯން-ޕިޔަރ ވަނީ މި ކަމުގައި މިޞްރާއި ޤަޠަރުން އަދާކޮށްފައިވާ ދައުރު ފާހަގަކޮށް މިޞްރުގެ ރައީސް ޢަބްދުލް ފައްތާޙް އަލް-ސީސީއާއި ޤަޠަރުގެ އަމީރު ޝައިޚް ތަމީމް ބިން ޙަމަދް އަލް-ޘާނީއަށް ޝުކުރު އަދާކުރައްވާފައެވެ.
ހަމަނުޖެހުންތައް ހުއްޓައިލުމަށްވި އެއްބަސްވުމުގެ ވަގުތު ޖެހުމުގެ ކުޑަ ވަގުތުކޮޅެއް ކުރިން ވެސް ދެ ފަރާތުން ވަނީ ވަރުގަދަ ޙަމަލާތަކެއް ބަދަލުކޮށްފައެވެ. ޔަހޫދީ އިސްރާޢީލުގެ ލޭއޮހޮރުވުންތައް ފަށާފައި ވަނީ މޭ 9 ވަނަ ދުވަހުއެވެ. އެ ދުވަހު ޔަހޫދީ ޓެރެރިސްޓު އަސްކަރިއްޔާއިން ވަނީ ޕީ.އައި.ޖޭގެ އިސް ތިން މެންބަރުންނާއި އެ މީހުންގެ ޢާއިލާތައް ޝަހީދުކޮށްލާފައެވެ. އިސްރާޢީލުގެ ވައިގެ އުދުވާންތަކުގެ ބަދަލުހިފުމުގެ ގޮތުން ޕީ.އައި.ޖޭން ވަނީ އިސްރާޢީލުގެ ރަށްތަކަށް އަމާޒުކޮށް 1,000 އަށްވުރެ ގިނަ ރޮކެޓް ޙަމަލާދީފައެވެ. މި ޙަމަލާތަކުގައި ޔަހޫދީންގެ ދެ މީހުން ވަނީ މަރައިލާފައެވެ.