އެމްޕީއެލް ފްލެޓްތައް އެއްކޮށް ނިންމާ އަންނަމަހު ދިރިއުޅެން ފެށޭނެ: ޝާހިދު

މޯލްޑިވްސް ޕޯޓްސް ލިމިޓެޑް، އެމް.ޕީ.އެލްއިން ހުޅުމާލޭ ފޭސް 2 ގައި ޢިމާރާތްކުރާ ފްލެޓްތަކުގެ މަސައްކަތް އަންނަމަހުގެ ނިޔަލަށް އެއްކޮށް ނިންމާ، އެތަންތަނުގައި މުވައްޒަފުންނަށް ދިރިއުޅެވެން ފެށޭނެކަމަށް އެކުންފުނީގެ ސީ.އީ.އޯ ޝާހިދު ޢަލީ ވިދާޅުވެއްޖެއެވެ.

އެމް.ޕީ.އެލްގެ ހައުސިންގ ސްކީމުގެ ދަށުން ހުޅުމާލޭ ދެވަނަ ފިޔަވަހީގައި 15 ފަންގިފިލާގެ 3 ޓަވަރު އަންނަނީ ތަރައްޤީކުރަމުންނެވެ. މިޓަވަރުތައް ތަރައްޤީކުރުމުގެ މަސައްކަތް އެކުންފުނިން ފަށާފައިވަނީ 2018 ވަނަ އަހަރުގެ ތެރޭގައެވެ.

މި ފްލެޓްތަކުގެ މަސައްކަތް ގޮސްފައިވާ ހިސާބާއި ގުޅޭގޮތުން ވާހަކަދައްކަވަމުން އެކުންފުނީގެ ސީ.އީ.އޯ ޝާހިދު ޢަލީ ވިދާޅުވީ، ކަބަޑް ސެޓް ޖެހުމާއި ޔުނިޓްތަކުގެ އެތެރޭގައި ކުރަންޖެހޭ ބައެއް މަސައްކަތްތައް ކުރުމަށް މިމަހު ފަހުކޮޅު ޔުނިޓްތައް މުވައްޒަފުންނާއި ޙަވާލުކުރުމުގެ މަސައްކަތް ކުރަމުންދާކަމަށެވެ. އަދި އަންނަ މަހުގެ ނިޔަލަށް ހުރިހާ މަސައްކަތެއް ނިންމާ އެތަންތަނުގައި މުވައްޒަފުންނަށް ދިރިއުޅެވޭވަރު ވާނެކަމަށް ޝާހިދު ވިދާޅުވިއެވެ.

"ހުރިހާ މަސައްކަތެއް އޯގަސްޓްމަހުގެ ފަހުކޮޅު ނުވަތަ އޯގަސްޓްމަހުގެ ނިޔަލަށް ނިންމާލެވޭނެކަމަށް ކޮންޓްރެކްޓަރުން ބުނަނީ. އެހެންވީމަ އޯގަސްޓްމަހަށްފަހު މުވައްޒަފުންނަށް އެ ފްލެޓްތަކުގައި އިރާދަކުރެއްވިއްޔާ ދިރިއުޅެން ފެށޭނެ" ޝާހިދު ވިދާޅުވިއެވެ.

މި 3 ޓަވަރުގައިވެސް މިހާރު ކުރަމުންދަނީ ލިފްޓް ހަރުކުރުމާއި، ކަރަންޓާއި ފެނުގެ ކަނެކްޝަންތައް ގުޅައި، އެޕާޓްމަންޓްތަކުގެ ފިނިޝިންގ މަސައްކަތްތަކެވެ. މި ޔުނިޓްތަކަށް ފައިސާ ދެއްކުމުގައިވެސް މުވައްޒަފުންނަށް ލުއިފަސޭހަގޮތްތަކެއް އެމް.ޕީ.އެލްއިން ފަހިކޮށްދީފައިވާއިރު، މިއަހަރުގެ ނިޔަލަށް މި ޔުނިޓްތަކުން ކުލި ނުނެގުމަށްވެސް އެކުންފުނިން ވަނީ ނިންމާފައެވެ.

ސަރުކާރު ކުންފުނިތަކުގެ މުވައްޒަފުންނަށް ޚާއްސަކޮށްގެން ފެށި ބޯހިޔާވަހިކަމުގެ މަޝްރޫޢުގެ ތެރެއިން އެމް.ޕީ.އެލްއިން ޢިމާރާތްކުރާ 3 ޓަވަރުގައި ޖުމްލަ 534 ޔުނިޓް ހިމެނެއެވެ. އޭގެ ތެރޭގައި އެއް ކޮޓަރީގެ 204 ޔުނިޓާއި، 3 ކޮޓަރީގެ 330 ޔުނިޓް ހިމެނެއެވެ.