ކޯލްޑް ސްޓޯރޭޖް ފެސިލިޓީއަކާއެކު ކަނދޮޅުދޫގައި މަސްކިރޭނެ އިންތިޒާމް ޤާއިމުކޮށްދޭނަން: މުޢިއްޒު

ރ. ކަނދޮޅުދޫގައި ރަނގަޅު ފެންވަރުގެ ކޯލްޑް ސްޓޯރޭޖަކާއެކު މަސްކިރުވޭނެ އިންތިޒާމް ޤާއިމުކޮށްދެއްވާނެކަމަށް ޕީ.ޕީ.އެމް ޕީ.އެން.ސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ކުރިއަށްއޮތް ރިޔާސީ އިންތިޚާބަށް ކެމްޕޭން ކުރެއްވުމަށް އަތޮޅުތަކަށް ކުރައްވާ ދަތުރުފުޅުގެ ތެރެއިން ރ. ދުވާފަރުގައި ބޭއްވި ޖަލްސާގައި ވާހަކަފުޅުދައްކަވަމުން ޕީ.ޕީއެމް ޕީ.އެން.ސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ވިދާޅުވީ، ކަނދޮޅުދޫއަކީ ދުވާފަރުގެ އިތުރުން މުޅި ރ. އަތޮޅަށްވެސް އިޤްތިޞާދީ ވަރަށް މުހިންމު ބޭނުމެއް ހިފިދާނެ ރަށެއްކަމަށެވެ. ދުވާފަރަކީ ފާނައިގެ މަސްވެރިކަން ކުރާ ރަށަކަށްވެފައި، އެ ސަރަހައްދުގައި މަސްވެރިކަން އިތުރަށް ތަރައްޤީކޮށް ކުރިއެރުވުމުގައި ކަނދޮޅުދޫގެ ބޭނުން ހިފިދާނެކަމަށެވެ.

ޑރ. މުޢިއްޒު ވިދާޅުވީ، އެމަނިކުފާނު އިންތިޚާބުވެވެޑައިގެންފިނަމަ، ކަނދޮޅުދޫގައި ރަނގަޅު ފެންވަރުގެ ކޯލްޑް ސްޓޯރޭޖަކާއެކު މަސްކިރުވޭނެ އިންތިޒާމް ޤާއިމުކޮށްދެއްވާނެކަމަށެވެ.

"ކަނދޮޅުދޫއަކީ މަސްކިރޭނެ ރަނގަޅު ފެސިލިޓީއެއް ޤާއިމުކުރެވިފައި ހުންނަ ރަނގަޅު ފެންވަރުގެ ކޯލްޑް ސްޓޯރޭޖް ނިޒާމެއް ޤާއިމުކޮށްފައި ހުރި ތަނަކަށް އިރާދަކުރެއްވިއްޔާ އަޅުގަނޑުމެން ހަދައިދޭނަން. އަދި ފާނައިގެ ޚާއްސަ ސްޓޯރޭޖާއެކީގައި ކޯލްޑް ސްޓޯރޭޖް ޤާއިމުކޮށްދެއްވާނަން. މިރަށަށް، މި އަތޮޅުގެ އެހެން ރަށްތަކަށް، މި ސަރަޙައްދުގެ ރަށްތަކަށް އިރާދަކުރެއްވިއްޔާ މަސްކިރޭނެ ނިޒާމު ކޯލްޑް ސްޓޯރޭޖް ނިޒާމު އެތަނުގައި ހަމަޖެހުނީމަ، ސަރަޙައްދީގޮތެއްގައި ރާއްޖެ ބަހާލެވޭއިރުގައި މި ސަރަހައްދަށް ލިބިގެންދާނެ. މި ސަރަހައްދުގެ ބޭނުން ހިފާ ހުރިހާ މަސްވެރިންނަށް ލިބިގެންދާނެ" ޑރ. މުޢިއްޒު ވިދާޅުވިއެވެ.

މި ޖަލްސާގައި ޑރ. މުޢިއްޒު ވަނީ ދުވާފަރުގެ ތަރައްޤީއާއި ކުރިއެރުމަށް އެމަނިކުފާނު ގެންގުޅުއްވާ ތަޞައްވުރާއި ކޮށްދެއްވާނެ ކަންކަން ހާމަކުރައްވާފައެވެ.

އެގޮތުން ދުވާފަރަށް ފަހުން އިތުރުކުރި ބިމުގެ މަގުތައް ހަދާ، ފެނާއި ނަރުދަމާ ޤާއިމުކޮށް އެ ބިމުގައި ރައްޔިތުން އެދޭގޮތަށް ބޯހިޔާވަހިކަމަށް ފްލެޓް ނުވަތަ ރޯހައުސް ތަރައްޤީކޮށްދެއްވާނެކަމަށް ވިދާޅުވިއެވެ. އަދި ސިނާޢީ އެކި ފުރުޞަތުތަކާއި ޢާމްދަނީ ހޯދޭނެ ގިނަ ވަޞީލަތްތަކެއް ޤާއިމުކޮށްދެއްވާނެކަމަށް ވިދާޅުވިއެވެ.

ހަމައެހެންމެ ސްކޫލަށް ބޭނުންވާ އިތުރު ވަޞީލަތްތައް ހަމަކޮށްދިނުމާއި، ޔުނިވަރސިޓީގެ ކެމްޕަހަކާއި ދަނާލެއް ތަރައްޤީކޮށްދިނުމުގެ އިތުރުން މިހާރު ހުރި ހެލްތު ސެންޓަރު މިނީ ހޮސްޕިޓަލެއްގެ ފެންވަރަށް ތަރައްޤީކޮށްދެއްވާނެކަމަށްވެސް ޑރ. މުޢިއްޒު ވިދާޅުވިއެވެ.

ޑރ. މުޢިއްޒު ވިދާޅުވީ، ރަށްރަށުގައި ކަންކަން ކޮށްދެއްވާނެކަމަށް ވަޢުދުވެވަޑައިގަންނަވަނީ ރާއްޖޭގެ އިޤްތިޞާދީ ޙާލަތާއި ދަރަނީގެ ޙާލަތުވެސް އެނގިތިބެ، އެކަންކަން މެނޭޖްކުރެވޭނެގޮތްތައް ހޯއްދަވައިގެންކަމަށެވެ. އަދި އިޤްތިޞާދު ހަމަމަގަށް އަޅުވާ، ޤައުމު ތަރައްޤީކުރާނެގޮތް އެނގިވަޑައިގަންނަވާކަމަށްވެސް ވިދާޅުވިއެވެ.