ސްވިޒަލޭންޑްގެ ވިންގް، ޒެރްދާން ޝަކީރީ ގައުމީ ޓީމަށް ކުޅުން ހުއްޓާލައިފިއެވެ.
ކުރީން ބަޔާން މިއުނިކާއި، ލިވަޕޫލަށް ކުޅެފައިވާ މިހާރު އުމުރުން 32 އަހަރުގެ ޝަކީރީ ގައުމީ ޓީމަށް ކުޅުން ހުއްޓާލިކަން އިޢްލާންކުރީ ހޯމަ ދުވަހު އިންސްޓަގްރާމްގައި ކުރި ޕޯސްޓެއްގައެވެ.
"ސްވިޒަލޭންޑް އާއެކު ހަތް މުބާރާތް، ގިނަ ލަނޑުތަކެއް ޖަހައި 14 އަހަރު ހޭދަކުރުމަކީ ހަނދާނުން ފޮހެނުލެވޭނެ ވަގުތުތަކެއް،"
"މިއީ ގައުމީ ޓީމަށް ކުޅުން ހުއްޓާލަންވީ ވަގުތު." އިންސްޓަގްރާމްގައި ޝަކީރީ ލިޔެފައިވެއެވެ.
ފާހަގަކޮށްލެވޭ ހަނދާންތައް އަބަދުވެސް ދެމިހުންނާނެ ކަމަށާއި، އެންމެންނަށް ވަރަށް ބޮޑަށް ޝުކުރު އަދާކުރާ ކަމަށް ޝަކީރީގެ ޕޯސްޓް ނިންމާލަމުން ލިޔެފައިވެއެވެ.
މިދިޔަ 14 އަހަރު ދުވަހުގެ ތެރޭގައި ޝަކީރީ ވަނީ ސްވިޒަލޭންޑްގެ ގައުމީ ޓީމަށް ކުޅެދިން 125 މެޗުގައި 32 ލަނޑުޖަހައިފައެވެ. އަދި މި މުއްދަތުގެ ތެރޭގައި ޝަކީރީ ވަނީ ގައުމީ ޓީމާއެކު 2010 އިން ފެށިގެން ޔޫރޯ 2024 އާ ދެމެދު ބޮޑު ހަތް މުބާރާތެއްގައި ކުޅެފައެވެ. އޭނާ އަކީ މި ޝަރަފު ލިބިގެންވާ ހަމައެކަނި ސްވިޒަލޭންޑްގެ ކުޅުންތެރިޔާ އެވެ.
ޝަކީރީގެ ކްލަބު ކެރިއަރުގައި ސްވިޒަލޭންޑްގެ ލީގާއި ޖަރުމަނު ލީގު ޗެމްޕިއަންކަން، އެފްސީ ބަސެލް އާއި ބަޔާން އާއެކު ތިން ފަހަރު ކާމިޔާބުކުރިއިރު ލިވަޕޫލާއެކު ޕްރިމިއާ ލީގު އެއްފަހަރު ކާމިޔާބުކޮށްފައިވެއެވެ. 2022 ވަނަ އަހަރުން ފެށިގެން މިހާރު ކުޅެމުން އަންނަނީ އެމެރިކާގެ މޭޖާލީގު ސޮކާގެ ޗިކާގޯ ފަޔާ އަށެވެ.
ނިމިދިޔަ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލަށް ސްވިޒަލޭންޑް ދަތުރުކުރިއިރު، ޝަކީރީ ވަނީ ދެ މެޗުގައި ކުޅެފައެވެ.