ޑްރަގް ވިޔަފާރިކޮށް، މަނީ ލޯންޑަރކުރަމުންދިޔަ ބޮޑު ނެޓްވޯކެއް އަތުލައިގެންފި

މަސްވެތުވާތަކެތީގެ ވިޔަފާރި ފުޅާ ދާއިރާއެއްގައިކޮށް މަނީލޯންޑަރކުރުމުގައި އިސްކޮށް އުޅުނު ނެޓްވޯކެއް ފުވައްމުލަކު ސިޓީން އަތުލައިގެންފިއެވެ. މި ނެޓްވޯކް އަތުލައިގަނެގައިވަމނީ މަސްތުވާތަކެއްޗާއި ދެކޮޅަށް ފުވައްމުލަކު ސިޓީގައި ފުލުހުން ހިންގި "އޮޕަރޭޝަން ވެށި ރައްކާ"ގެ ތެރެއިންނެވެ.

ދިވެހި ފުލުހުންގެ ޚިދުމަތުން ކުރިއަށްގެންދާ ޖޮއިންޓް އޮޕަރޭޝަނުގައި މިހާތަނަށް 4،408 ތަން ބަލައި ފާސްކޮށް، 1،147 މީހުން ހުއްޓުވައި ސުވާލުކޮށް ފާސްކޮށްފައިވާކަމަށް ފުލުހުން ވިދާޅުވެއެވެ. މި އޮޕަރޭޝަނުގައި ޖުމްލަ 58 މީހުން ހައްޔަރުކޮށް އެ މީހުންނަށް ތުހުމަތު ކުރެވޭ 75 މައްސަލައެއް ތަހުގީގުކޮށްފައިވާއިރު އޭގެ ތެރެއިން 65 މައްސަލައެއްގައި ދައުވާ ކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާކަމަށްވެސް ފުލުހުން ވިދާޅުވިއެވެ.

ފުލުހުން ވިދާޅުވީ މި އޮޕަރޭޝަނުގައި މިހާތަނަށް ކުރެވުނު މަސައްކަތުން ފުވައްމުލަކުގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް މަނީ ލޯންޑަރ ކުރުމުގައި އިސްކޮށް ހަރަކާތްތެރިވާކަމަށް ތުހުމަތުވާ ފަރާތްތަކާއި އެ މީހުންނަށް އެހީވާ ފަރާތްތައް ދެނެގަނެވިފައިވާ ކަމަށެވެ. އެގޮތުން، ނެޓްވޯކް ހަދައިގެން މަސްތުވާތަކެތީގެ ވިޔަފާރިކޮށް މަނީލޯންޑަރ ކުރުމުގައި އިސްކޮށް ހަރަކާތްތެރިވާކަމަށް ތުހުމަތުކުރެވޭ ދެ މީހަކު ހައްޔަރުކޮށްފައިވާކަމަށް ވިދާޅުވެއެވެ.

މި މައްސަލައިގައި ހައްޔަރުކޮށްފައިވަނީ ފުވައްމުލައް، ދޫޑިގަން/ ކަރަންކާވިލާ އުމުރުން 34 އަހަރުގެ އަހުމަދު ނިއުޝާދުއާއި ފުވައްމުލައް ދޫޑިގަން/ ޒަމާނީގެ، އުމުރުން 29އަހަރުގެ ހަސަން ޢާޒިމެވެ. މި ދެ މީހުންވެސް ކޯޓު އަމުރެއްގެ ދަށުން މި މަހުގެ 9ވަނަ ދުވަހު ހައްޔަރުކޮށްފައިވާކަމަށާއި، ފާއިތުވި ފަސް އަހަރު ދުވަހުގެ ތެރޭގައި ނިއުޝާދުގެ ބޭންކް އެކައުންޓް މެދުވެރިކޮށް 21 މިލިޔަނަށްވުރެ ގިނަ ރުފިޔާގެ މުއާމަލާތް ކޮށްފައިވާކަމަށް ފުލުހުން ވިދާޅުވެއެވެ.

މީގެ އިތުރުން ފާއިތުވި 2 އަހަރު ތެރޭގައި ހަސަން ޢާޒިމްގެ ބޭންކް އެކައުންޓް މެދުވެރިކޮށް 7 މިލިޔަނަށްވުރެ ގިނަ ރުފިޔާގެ މުއާމަލާތް ކޮށްފައިވާކަމަށްވެސް ފުލުހުން ވިދާޅުވިއެވެ.

މި މައްސަލައާ ގުޅިގެން 21 މީހަކާއި 2 ކުންފުންޏެއްގެ އެކައުންޓުތައް ކޯޓު އަމުރެއްގެ ދަށުން ހިފަހައްޓައި އެ ފަރާތްތަކަށް ތުހުމަތުކުރެވޭ މަނީ ލޯންޑަރިންގެ މައްސަލަ ބަލަމުންދާ ކަމަށްވެސް ފުލުހުންގެ ޚިދުމަތުން ވިދާޅުވިއެވެ.