2024: އިންސާނީ އެހީގެ ގޮތުގައި ހޯދަން ބޭނުންވި ޢަދަދު ނުހޯދުނު

ބުނެލަން ފަސޭހަ، ނަމަވެސް ހިތާމަވެރި ހަޤީޤަތަކީ ދުނިޔޭގެ އެކި ކަންކޮޅުތަކުގައި ބޯފެނާއި ކާބޯތަކެތިން މަހުރޫމުވެ، ބަނޑަށްޖެހެމުންދާ މީހުންގެ ޢަދަދު އެއް ދުވަހުން އަނެއް ދުވަހަށް ދަނީ އިތުރުވަމުންނެވެ. ނަމަވެސް އެ މީހުންނަށް އެހީ ފޯރުކޮށްދޭން ތިބި މުއްސަނދި ބޮޑެތި ޤައުމުތަކުން، އެހީގެ ގޮތުގައި ދެމުންދާ ފައިސާގެ ޢަދަދު ދަނީ އެއާ ދިމާ އިދިކޮޅަށް، މަދުވަމުންނެވެ. މިއާ އެކު މި ފެށުނު 2025ވަނަ އަހަރު ވެސް، ބަނޑަށްޖެހި އެހީއަށް ބޭނުންވެފައި ތިބި މީހުންގެ ތެރެއިން އެހީ ފޯރުކޮށްދެވޭނީ އެންމެ 60 އިންސައްތަ މީހުންނަށް ކަމަށް އދން ވަނީ ބުނެފައެވެ. އެ ޖަމްޢިއްޔާއިން ފާހަގަކުރާ ގޮތުގައި 2025 ވަނަ އަހަރު، ބަނޑަށްޖެހިފައިވާ 117 މިލިއަނަށްވުރެ ގިނަ މީހުންނަށް އެހީއެއް ނުލިބޭނެއެވެ.

މި ނިމުނު އަހަރު ވެސް އދން ނިންމާލާފައި ވަނީ ބޭނުންވި ވަރަށް އެހީ ނުލިބިއެވެ. އެހީގެ ގޮތުގައި 49.6 ބިލިއަން އެމެރިކާ ޑޮލަރު ހޯދަން ބޭނުންވި ނަމަވެސް، އަހަރު ނިމުނުއިރު ހޯދިފައި ވަނީ އޭގެ އެންމެ %46އެވެ. މިއީ އެ އެހީގެ ގޮތުގައި ހޯދަން ބޭނުންވި ޢަދަދުގެ ދެބައިކުޅަ އެއްބަޔަށްވުރެ މަދު ޢަދަދެއް ލިބުނު ދެވަނަ އަހަރެވެ. 2023 ވަނަ އަހަރުވެސް އދން އެހީ ހޯދަން ބޭނުވި ޢަދަދުގެ ދެބައިކުޅަ އެއްބައި ވެސް ނުލިބެއެވެ. މިއާއެކު އދއަށް ވަނީ އެހީ ފޯރުކޮށްދިނުމުގައި ބޮޑެތި ގޮންޖެހުންތަކާ ކުރިމަތިލައި، އަޅަން ބޭނުން ނުވާ ފިޔަވަޅުތައް އަޅަން މަޖުބޫރުވެފައެވެ. ފޯރުކޮށްދެވޭ ކާބޯތަކެތީގެ ޢަދަދު މަދުކޮށް، އެހީ ފޯރުކޮށްދޭ މީހުންގެ ޢަދަދު މަދުކުރަން ވަނީ މަޖުބޫރުވެފައެވެ.

އދއަށް އަޅަން މަޖުބޫރުވި މި ފިޔަވަޅުތަކާއެކު ސޫރިޔާ ފަދަ ޤައުމުތަކުން މިހާރު ދަނީ މީގެ ނޭދެވޭ އަސަރުތައް ފެންނަމުންނެވެ. އެހީ ލިބޭނެ އަދަދަށް ބަލައި، އެ ޤައުމަށް އެހީ ފޯރުކޮށް ދެމުންދިޔަ ދުނިޔޭގެ ކާބޯތަކެއްޗާ ބެހޭ ޖަމްޢިއްޔާއިން ވަނީ ކުރިން، އަހަރެއްގެ މައްޗަށް 6 މިލިއަން މީހުންނަށް ފޯރުކޮށްދެމުންދިޔަ އެހީ 1 މިލިއަަނަށް މަދު ކޮށްފައެވެ. މިއީ ބަނޑުހައިހޫނުކަން ތަހައްމަލުކުރާ މީހުންނަށް އެހީ ފޯރުކޮށް ނުދީ ބަނޑަށްޖެހި، ހާންތިވެފައި ތިބި މީހުންނަށް ފޯރުކޮށްދިނުން ކަމަށް ޑަބްލިއުއެފްޕީން ފާހަގަކުރެއެވެ. ދުނިޔޭގެ މިހާރުގެ ޙާލަތައް ބަލައި، މި ކަމަށް އަވަސް ޙައްލެއް ލިބޭނެ ކަމުގެ އުއްމީދެއް ވެސް ނެތެވެ.

ބޭނުންވާ އެހީ އާއި ފަންޑުގެ ފަރަގު

ދުނިޔޭގެ އެކި ކަންކޮޅުތަކުގައި ހިނގަމުންދާ ހަނގުރާމަތަކާއި، މޫސުމީ ނޭދެވޭ ކާރިސާތަކާއި ބާޒާރުގައި ތަކެތީގެ އަގު އުފުލުމުގެ ސަބަބުން އިންސާނީ އެހީއަށް ބޭނުންވާ މީހުންގެ ޢަދަދު ދަނީ އިތުރުވަމުންނެވެ. މިއާއެކު އެ އެހީ ފޯރުކޮށްދިނުމަށް އދއަށް ލިބޭ ފައިސާއާއި އެހީ ބޭނުންވާ މީހުންނާ ދެމެދު އޮތް ފަރަގު ވަނީ ބޮޑުވާން ފަށާފައެވެ. އަދި ވަކި ވަކި ޤައުމުތަކުގެ އިޤްތިޞާދާއި އެ ޤައުމުތަކުގެ ސިޔާސީ މަސްރަހަށް އަންނަމުންދާ ބަދަލުތަކާއެކު، އިންސާނީ އެހީގެ ގޮތުގައި އެގައުމުތަކުން ފޯރުކޮށްދޭ އެހީގެ ޢަދަދުތަކަށް ދަނީ ބަދަލު އަންނަމުންނެވެ.

އދއަށް އިންސާނީ އެހީގެ ގޮތުގައި ބޭނުންކުރުމަށް އެންމެ ބޮޑު އެހީއެއް ފޯރުކޮށްދޭ އެއް ގައުމަކީ ޖަރުމަނުވިލާތެވެ. ނަމަވެސް އެ ޤައުމުން ފޯރުކޮށްދޭ އެހީގެ ޢަދަދު ވެސް ދަނީ އެއް އަހަރުން އަނެއް އަހަރަށް މަދުވަމުންނެވެ. އެގޮތުން، 2023 ވަނަ އަހަރު އެ ޤައުމުން ފޯރުކޮށްދިން އެހީގެ ޢަދަދުން 500 މިލިއަން ޑޮލަރު، 2024 ވަނަ އަހަރު ވަނީ އުނިކޮށްފައެވެ. އަދި 2025 ވަނަ އަހަރު، ފޯރުކޮށްދޭ އެހީން 1 ބިލިޔަން ޑޮލަރު އުނިކުރަން އެ ޤައުމުގެ ވަޒީރުންގެ މަޖިލީހަށް މިހާރު ވަނީ ހުށަހަޅާފައެވެ.

އެމެރިކާގެ އިންތިހާބީ ރައީސް ޑޮނާލްޑް ޓްރަމްޕް ވެރިކަމާ ހަވާލުވެވަޑައި ގަތުމުން، އެ ޤައުމުން އިންސާނީ އެހީގެ ގޮތުގައި ފޯރުކޮށްދެމުންދާ ޢަދަދަށް އަންނާނެ ބަދަލުތަކަށް އިންސާނީ އެހީ ފޯރުކޮށްދޭ ޖަމާޢަތްތަކުން މިހާރު ތިބީ ބަލަބަލައެވެ. ޓްރަމްޕް ވެރިކަމަށް ވަޑައިގެން، އިންސާނީ އެހީ ފޯރުކޮށްދިނުމަށް ގެންގުޅުއްވާނެ ސިޔާސަތުތައް އަދި ހާމަ ނުކުރެއްވި ނަމަވެސް، އެމެރިކާއިން އެހީގެ ގޮތުގައި ކުރަމުން އަންނަ ހޭދަތައް މަދުކުރުމަށް ނިންމާފައިވާކަން ވަނީ ހާމަކޮށްފައެވެ. އަދި މި ޢަދަދުތައް ކުޑަ ކުރެވޭނެ ކަމަށް ޓްރަމްޕްގެ މުޝީރުން ވަނީ ބުނެފައެވެ.

އެމެރިކާއަކީ އިންސާނީ އެހީގެ އެންމެ ބޮޑު އިންސައްތައެއް ފޯރުކޮށްދޭ ޤައުމެވެ. މިދިޔަ ފަސް އަހަރުގެ ތެރޭގައި އެ ޤައުމުން ވަނީ އިންސާނީ އެހީގެ ގޮތުގައި 64.5 ބިލިޔަން އެމެރިކާ ޑޮލަރު ފޯރުކޮށްދީފައެވެ. މިއީ އިންސާނީ އެހީގެ ގޮތުގައި މިދިޔަ ފަސް އަހަރު އދއަށް ލިބުނު އެހީގެ 38 އިންސައްތައެވެ.

އިންސާނީ އެހީގެ ދެބައިކުޅަ އެއް ބަޔަކީ އެމެރިކާއާއި ޖަރުމަނުވިލާތާއި ޔޫރަޕިއަން ކޮމިޝަނުން ފޯރުކޮށްދޭ އެހީއެވެ. 2020ން 2024އަށް ކުރިމަތިވި އެކި ކާރިސާތަކާ ގުޅިގެން އދން އިންސާނީ އެހީގެ ގޮތުގައި ހޭދަކުރި 170 ބިލިޔަން އެމެރިކާ ޑޮލަރުގެ %58 ފޯރުކޮށްދީފައި ވަނީ އެ ތިން ބާރުންނެވެ. ޗައިނާ، ރަޝިޔާ އަދި އިންޑިޔާ އެއްކޮށް، އެ މުއްދަތުގައި އިންސާނީ އެހީގެ ގޮތުގައި ފޯރުކޮށްދިން ޢަދަދަކީ އދގެ ފަންޑުގެ %1އަށްވުރެ ވެސް މަދު ޢަދަދެއް ކަމަށް ތަފާސްހިސާބުތައް ދައްކައެވެ. އެހީ ފޯރުކޯށްދޭ ބޮޑެތި ބާރުތަކުން، ފޯރުކޮށްދޭ އެހީގެ މި ފަރަގު ބޮޑު ވުމަކީ ބަނޑަށްޖެހިފައިވާ މީހުންނަށް އެހީ ފޯރުކޮށްދިނުމަށް ދިމާވާ އެންމެ ބޮޑު އެއް ގޮންޖެހުމެވެ.

މުއްސަނދި ބޮޑެތި ޤައުމުތަކުން، އެކަށީގެންވާ އަދަދެއް އެހީގެ ގޮތުގައި ފޯރުކޮށްނުދޭ މައްސަލައީ ޓްރަމްޕް އެންމެ ގަދަޔަށް ދައްކަވާ އެއް ވާހަކައެވެ. އެމެރިކާގެ ވެރިކަމާ ދެވަނަ ފަހަރަށް ހަވާލުވެޑައިގަންނަވާއިރު، އެހެން ބޮޑެތި ޤައުމުތަކުން ވެސް އިންސާނީ އެހީއަށް ކުރާ ހޭދަ އިތުރު ކުރުމަށް މަސައްކަތް ކުރުމަށް އެހީ ފޯރުކޮށްދޭ ޖަމްޢިއްޔާއިން ވަނީ ގޮވާލާފައެވެ. އަދި އެމެރިކާއިން އިތުރު އެހީ ބޭނުން ނަމަ، އެހެން ޤަ އުމުތަކުން ދޭ އެހީ އިތުރުކުރަން ޖެހޭނެ ކަމަށްވެސް ވަނީ ވިދާޅުވެފައެވެ.