އެސްޓޯނިއާ ދަތުރުފުޅުން ޓެކްނޮލޮޖީ ދާއިރާ ކުރިއަރުވަން ފަހި ފުރުޞަތުތަކެއް ލިބިގެންދާނެ: ޑރ. ކިނާނަތު

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އެސްޓޯނިއާއަށް ކުރައްވާ ދަތުރުފުޅުގެ ތެރެއިން ރާއްޖޭގެ ޑިޖިޓަލް ޓެކްނޮލޮޖީ މިހާރު އޮތް ހާލަތުން އިތުރު ހަރުފަތަކަށް ގެންދިއުމަށް އެހީތެރިކަން ލިބިގެންދާނެކަމަށް ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވެއްޖެއެވެ. ޑރ. ކިނާނަތު މިހެން ވިދާޅުވީ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުންނެވެ.

ރައީސުލްޖުމްހޫރިއްޔާ އެސްޓޯނިއާ ކުރައްވާ ރަސްމީ ދަތުރުފުޅަކީ މި މަހުގެ 13 އިން 16އަށް ކުރައްވާ ދަތުރުފުޅެކެވެ. މިއީ ދިވެހިރާއްޖޭގެ ރައީސަކު އެސްޓޯނިއާއަށް ރަސްމީ ދަތުރުފުޅެއް ކުރައްވާ ފުރަތަމަ ފަހަރެވެ.

މި ދަތުރުފުޅާއި ގުޅޭގޮތުން ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔަތާއި ބެހޭ ވުޒާރާގެ ސްޓޭޓް މިނިސްޓަރ ޑރ. މުޙައްމަދު ކިނާނަތު ވިދާޅުވީ، އެސްޓޯނިއާއަކީ ޑިޖިޓަލް ޓެކްނޮލޮޖީގެ ދާއިރާއިން ދުނިޔޭގައި ކުރިއަރާފައިވާ ފާހަގަކޮށްލެވޭ ޤައުމެއްކަމަށެވެ. އެހެންކަމުން ރައީސްގެ ދަތުރުފުޅުގެ ތެރެއިން ރާއްޖޭގެ ޓެކްނޮލޮޖީ ކުރިއެރުވުމަށް ވަރަށް ބޮޑު އެހީތެރިކަމެއް ލިބިގެންދާނެކަމަށާއި، މި ދަތުރުފުޅުގެ ތެރެއިން އެސްޓޯނިއާއިން އެޤައުމުގެ ޓެކްނޮލޮޖީ ކުރިއަރުވަން ކުރި މަސައްކަތާއި ތަޖުރިބާތަކާއި، ގާތުން ބަލާލުމުގެ ފުރުޞަތުލިބި ރާއްޖެއަށް އެކަމުން ފައިދާތަކެއް ކުރާނެކަން ޑރ. ކިނާނަތު ފާހަގަކުރެއްވިއެވެ.

"އަޅުގަނޑު ދެކޭގޮތުގައި ލިބޭނެ އެންމެ ބޮޑު ފައިދާއަކީ ރާއްޖޭގެ ޓެކްނޮލޮޖީ މިއޮތް ހާލަތުން އިތުރު ހަރުފަތަކަށް ގެންދިއުމަށް ވަރަށް މުހިންމު ފުރުޞަތަކަށް ވާނީ. ދެން އެސްޓޯނިއާއަކީ ޓެކްނޮލޮޖީގެ ގޮތުން ޔޫރަޕްގައި ވަރަށް ކުރިއަރާފައި އޮތް ޤައުމެއް. ޚާއްސަކޮށް ޔޫރަޕްގައި އަދި މުޅި ދުނިޔެއަށް ބެލިއަސް ވަރަށް ކުރިއަރާފައި އިން ޤައުމެއް. އެހެންވީމަ އެސްޓޯނިއާގެ އެކްސްޕީރިއަންސް އަޅުގަނޑުމެންނަށް ޝެއަރކުރަން ލިބުމުގެ ފުރުސަތު އަޅުގަނޑުމެންނަށް ލިބިއްޖެއްޔާ އެއީ އަޅުގަނޑުމެންނަށް ވަރަށް ބޮޑު ކުރިއެރުމަކަށް ވާނެ." ކިނާނަތު ވިދާޅުވިއެވެ.

އެސްޓޯނިއާއަކީ ޑިޖިޓަލް ސޮސައިޓީ ރޭންކިންއަށް ބަލާއިރު ވަރަށް ކުރީގައި އުޅޭ ޤައުމެކެވެ. އެގޮތުން ގްލޯބަލް ސެކިއުރިޓީ އިންޑެކްސްގައި އެސްޓޯނިއާ އޮތީ 3 ވަނައިގައެވެ. ދުނިޔޭގެ އިކޮނޮމިކް ފޯރަމް މޯބައިލް ބްރޯޑްބޭންޑް ސަބްސްކްރިޕްޝަންގައި އެސްޓޯނިއާއަކީ ދުނިޔޭގެ 1 ވަނައެވެ.

އެސްޓޯނިއާގެ ރައީސްގެ ދައުވަތަކަށް ރައީސުލްޖުމްހޫރިއްޔާގެ އެޤައުމަށް ކުރައްވާ ދަތުރުފުޅުގައި ދެ ޤައުމުގެ ދޭދޭ ގުޅުން އިތުރަށް ހަރުދަނާ ކުރެއްވުމާއި ދެ ޤައުމު ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުން ދެޤައުމުގެ ރައީސުން މަޝްވަރާ ކުރެއްވުމުގެ އިތުރުން ޑިޖިޓަލް ދާއިރާ އާއި ސައިބަރ އަދި އީ-ގަވަނެންސް ދާއިރާ އާއި މޫސުމީ ބަދަލުތަކާއި ތިމާވެއްޓާ ގުޅުންހުރި ދާއިރާތަކުން ގުޅުން ބަދަހިކުރުމަށް މަޝްވަރާ ކުރައްވާނެކަމަށް ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.

ޑިޖިޓަލް ޓްރާންސްފޯމޭޝަނަކީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިސްކަންދެއްވާ ކަމެކެވެ. ޑިޖިޓަލް އިޤްތިޞާދެއް ޤާއިމުކުރައްވައި، 2030 ވަނަ އަހަރު އަންނަންވާއިރަށް، ރާއްޖޭގެ އުފެއްދުންތެރިކަމުގެ ނިސްބަތުގެ 30 އިންސައްތަ ހިއްސާކުރަނީ، ޑިޖިޓަލް އިޤްތިޞާދަކުން ކަމަށް ހެދުމަކީ އެމަނިކުފާނުގެ ވަޢުދުފުޅެކެވެ. އެއީ 2040 ވަނަ އަހަރު އަންނަ އިރު ދިވެހިރާއްޖެއަކީ ތަރައްޤީވެފައިވާ ޤައުމަކަށް ހެއްދެވުމަށް އެމަނިކުފާނު ގެންގުޅުއްވާ ތަޞައްވަރުގެ މުހިންމު ބަހާއެކެވެ.