އެސްޓޯނިއާ ދަތުރުން ރާއްޖެއަކީ ޑިޖިޓަލައިޒްޑް ޤައުމަކަށް ހެދުމަށް ކުރެވޭ މަސައްކަތުގައި ބޮޑު ކާމިޔާބީއެއް ލިބުނު: ރައީސް

އެސްޓޯނިއާއަށް ކުރެއްވި ދަތުރުފުޅުގެ ސަބަބުން ރާއްޖެއަކީ ޑިޖިޓަލައިޒްޑް ޤައުމަކަށް ހެދުމަށްޓަކާ ކުރެވޭ މަސައްކަތުގައި ބޮޑު ކާމިޔާބީއެއް ލިބިގެންގޮސްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އެސްޓޯނިއާއަށް ކުރެއްވި ދަތުރުފުޅާ ގުޅޭގޮތުން ޕީއެސްއެމް ނިއުސްއަށް ދެއްވި ބަސްދީގަތުމުގައެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ އެސްޓޯނިއާގެ ރައީސްގެ ދަޢުވަތަކަށް އެޤައުމަށް ކުރެއްވި ދަތުރުފުޅަކީ ތާރީޚީ ދަތުރުފުޅެއްކަމަށެވެ. އަދި މިއީ ރާއްޖޭގެ ރައީސަކު އެސްޓޯނިއާއަށް ދަތުރުކުރެއްވި ފުރަތަމަ ފަހަރުކަންވެސް ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މިދަތުރުފުޅު ކާމިޔާބުވާ ސަބަބަކީ ޑިޖިޓަލައިޒޭޝަން ދާއިރާއިން އެންމެ ކުރިއަރާފައިވާ ޤައުމުން އެކަން ކުރަމުންދާ ގޮތް އެނގިގެން ދިޔައީމަކަމަށެވެ. އަދި މިދަތުރުފުޅުން އެމަނިކުފާނު އިޢުލާންކޮށްފައިވާ މެނިފެސްޓޯގައި އޮތް ވިޝަން، ރާއްޖެއަކީ ޑިޖިޓަލައިޒްޑް ޤައުމަކަށް ހެދުމަށްޓަކާ އެމައިދާނުގައި ދުނިޔޭގެ އެންމެ ކާމިޔާބު ހޯދާފައިވާ ޤައުމުގައި ކަންކަން ބައްޓަންކޮށްފައިވާ ގޮތް ދަސްކޮށް އެކަމުގައި އެހީތެރިކަން ހޯދޭނެ ގޮތްތަކާ މެދުގައި މަޝްވަރާކޮށް ކުރިއަށް ދެވޭނެ މަގުތައް ހޯދިގެން ދިޔަކަމަށް ވިދާޅުވިއެވެ. އަދި އެމަޤްސަދު ހާސިލްކުރުމަށްޓަކައި އެސްޓޯނިއާގެ ރައީސާއި ރަސްމީ އިދާރާތަކުން ވަރަށްބޮޑު އެހީތެރިކަމެއް ދެއްވިކަން ރައީސް ފާހަގަކުރެއްވިއެވެ.

"ޑިޖިޓަލައިޒޭޝަނާ ބެހޭ ހުރިހާ ކަމެއް މިގައުމުގައި މިވޭތުވެދިޔަ އަހަރުތަކުގައި ކިހިނެއްކަން ކާމިޔާބުކަމާއެކީގައި ހާސިލްކޮށްފައިވަނީ. އަދި ދިމާވި އެކިކަހަލަ ދަތިތަކާއި އެކަންކަމުން އަރައިގަތުމަށް ކަންކަން ކުރިގޮތާއި، އެހެންދާއިރާތަކުންވެސް ކުރިއެރުން ހޯދާފައިވާގޮތް ވަރަށް ރަނގަޅަށް އޮޅުން ފިލައިގެންދިޔަ."ރައީސުލްޖުމްހޫރިއްޔާ ވިދާޅުވިއެވެ.

ރައީސްގެ މި ދަތުރުފުޅުގައި 3 ދާއިރާއަކުން އެމްއޯޔޫތަކުގައި ވަނީ ސޮއިކުރައްވާފައެވެ. އެސްޓޯނިއާއަކީވެސް ތިމާވެއްޓަށް އަންނަ ބަދަލުތަކުގެ ނޭދެވޭ އަސަރުކުރާ ޤައުމެއްކަން ފާހަގަކުރައްވާ ރައީސް ވަނީ އެ ދާއިރާއިންވެސް އެމްއޯޔޫއެއްގައި ސޮއިކުރެއްވިކަން ފާހަގަކުރައްވާފައެވެ. އަދި އެސްޓޯނިއާގެ ތިމާވެއްޓާއި ސިއްޙީ އަދި ތަޢުލީމީ ވަޒީރާ ބައްދަލުކުރެއްވިކަން ރައީސް ފާހަގަކުރެއްވިއެވެ.