ރާއްޖޭގެ ކަނޑުގެ ސަރަޙައްދުގައި ހަރަކާތްތެރިވަމުންދިޔަ ބޭރުގެ މަސްބޯޓެއް އަތުލައިގެންފި
-
މިއީ ސްރީލަންކާގެ މަސް ބޯޓެއް
-
މިބޯޓުގައި 6 މީހުންތިބި
-
ބޯޓު މިހާރުވަނީ ދިވެހި ފުލުހުންގެ ޚިދުމަތާ ހަވާލުކުރައްވާފައި
ދިވެހިރާއްޖޭގެ މަސްވެރިކަމުގެ ޤާނޫނާ ޚިލާފަށް ރާއްޖޭގެ ކަނޑުގެ ސަރަޙައްދުގައި ހަރަކާތްތެރިވަމުންދިޔަ ބޭރުގެ މަސްބޯޓެއް، އެމްއެންޑީއެފް ކޯސްޓްގާޑްގެ ބެލުމުގެ ދަށަށް ގެންގޮސްފިއެވެ.
އެމްއެންޑީއެފުން ވިދާޅުވީ މިއީ ސްރީލަންކާގެ މަސްބޯޓެއް ކަމަށާއި މިބޯޓުގައި 6 މީހުން ތިބިކަމަށެވެ. އަދި މިބޯޓު މިހާރު ދިވެހި ފުލުހުންގެ ޚިދުމަތާ ހަވާލުކުރައްވާފައިވާ ކަމަށް އެމްއެންޑީއެފުން ވިދާޅުވިއެވެ.
މިދިޔަ ޑިސެމްބަރުމަހުގެ 26 ވަނަ ދުވަހުވެސްވަނީ ރާއްޖެ ސަރަހައްދުގައި ޤާނޫނާއި ޚިލާފަށް ހަރަކާތްތެރިވަމުންދިޔަ ބޭރުގެ މަސް ބޯޓެއް އަތުލައިގެންފައެވެ. ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި މިމަސް ބޯޓު ލޮކޭޓްކުރީ އެމްއެންޑީއެފް އެއަރ ކޯރގެ ޑްރޯންގެ އެހީގައިކަމަށް އެމްއެންޑީއެފުންވަނީ ވިދާޅުވެފައެވެ.
މީގެ އިތުރުން ރާއްޖެ ސަރަހައްދުގައި ޤާނޫނާއި ޚިލާފަށް ޑިންގީއެއްގައި އުޅުނު ބޭރު ޤައުމެއްގެ ބަޔަކުވެސް މިދިޔަ ޑިސެމްބަރުމަހު އެމްއެންޑީއެފްގެ ބެލުމުގެ ދަށަށް ގެންދިއުމަށްފަހުވަނީ ދިވެހި ފުލުހުންގެ ޚިދުމަތާއި ހަވާލުކުރައްވާފައެވެ.