އުތީމު ޤައުމީ ބިނާތައް ތަރައްޤީކުރުމަށް ޤައުމީ މަޝްރޫޢެއް ރައީސް އިޢުލާންކުރައްވައިފި
-
އުތީމު ބިނާތައް ތަރައްޤީކުރާނީ އަސްލު ނުގެއްލޭގޮތަށް
-
އުތީމަށް ވެފައިވާ ވަޢުދުތައް ފުއްދަވާނެކަމުގެ ޔަޤީންކަން ދެއްވި
-
ޤައުމީ ދުވަސް ޤައުމީ ފެންވަރެއްގައި 2 އަހަރު އުތީމުގައި ފާހަގަކުރެއްވުމަށް ވަނީ ނިންމަވާފައި
ތިލަދުންމަތީ އުތީމުގައި ހުރި ޤައުމީ ބިނާތައް އަސްލު ނުގެއްލޭނެގޮތަށް ތަރައްޤީކޮށް ކުރިއަރުވަން ޤައުމިއްޔަތުގެ މަޝްރޫޢުއެއް ކުރިއަށްގެންދިއުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާ އެކަން އިޢުލާންކުރައްވައިފިއެވެ. މި މަޝްރޫޢު ރައީސް އިޢުލާންކުރެއްވީ ޤައުމީ ބަޠަލު ބޮޑުތަކުރުފާނުގެ އުފަންރަށްކަމަށްވާ ހއ. އުތީމުގައި ވާހަކަފުޅު ދައްކަވަމުންނެވެ.
ހއ. އުތީމުގައި ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، އުތީމުން އެމަނިކުފާނަށް ކުރެއްވެނީ ޤައުމީ އިޙްސާސްތަކެއްކަމަށް ސިފަކުރައްވާފައެވެ.
އެގޮތުން ރިޔާސީ އިންތިޚާބުގެ ކެމްޕެއިނުގައި އަދި ރައިސުލްޖުމްހޫރިއްޔާކަމުގެ ހުވާކުރައްވައި ދެއްކެވި ވާހަކަފުޅުގައިވެސް ޤައުމިއްޔަތު ކުރިއަރުވައި ނަގަހައްޓަން އިސްކަން ދެއްވާނެކަމަށް ވިދާޅުވެފައިވާ ވާހަކަފުޅުގެ ހަނދާން އައުކުރައްވާ ރައީސް ވިދާޅުވީ ޤައުމުގެ ތަރައްޤީއަކީ ޢިމާރާތް ބިނާކުރުމާއެކު ފިކުރުވެސް ތަރައްޤީކުރުންކަމަށެވެ.
ދިވެހިންނަކީ ކޮންބައެއްކަމާއި ޤައުމިއްޔަތު އިއާދަކޮށް ކުރިއަރުވަންކުރަން ހުރި މަސައްކަތްތައް ތަފްސީލްކޮށްދެއްވަމުން ރައީސް ވިދާޅުވީ ރާއްޖޭގެ ޤައުމިއްޔަތު އާލާކޮށް، ކުރިއަރުވައި އަންނަންއޮތް ޖީލަށް ފޯރުކޮށްދިނުމަށް ފަށާފައިވާ މަސައްކަތަކީ މުހިންމު މަސައްކަތެއްކަމަށެވެ. ފަޚުރުވެރި އުތީމު މަހާރަދުންގެ ބިނާއާއި އެރަށުގެ ކޮންމެ ވެލިފުކެއް ބުނެދޭ ބުނެ ދިނުމާއި ރައްޔިތުންގެ ލޮލުން ބުނެދޭ ވާހަކައަކީ ޤައުމިއްޔަތު ހިމާޔަތްކުރާނަމަ އުތީމަށް ސަމާލުވާން ޖެހޭކަންކަމަށް ރައީސް ވިދާޅުވިއެވެ.
ރައީސް ވިދާޅުވީ ސަރުކާރުގެ ތަރައްޤީގެ ދުވެލީގައި އުތީމަކީ ވަރަށް ފުރިހަމަ ދައުރެއް އަދާކުރާނެ ރަށެއްކަމަށާއި، އެކަމަށް ވަރަށް ސަމާލުކަން ދީގެން ކުރިއަށްގެންދަވާނެކަމަށެވެ. އުތީމުގެ ތަރައްޤީއަށް ވެވަޑައިގެންފައިވާ ހުރިހާ ވައުދެއް ފުރިހަމަކުރައްވާނެކަމުގެ ޔަޤީންކަންވެސް ރައީސް ވަނީ ދެއްވާފައެވެ.
"ކެމްޕެއިންގައި ވީ ވައުދުތައް ލިޔެވިފަ އެހުރީ. ހަނދާންވެސް އެބަހުރި. މަގު ހެދުންކަމަށްވިޔަސް ބަނދަރު ހެދުންވިޔަސް، ތައުލީމީ ދާއިރާއިން ސްކޫލަށް ބޭނުންވާ ކަންކަންވިޔަސް ސިއްހީ ދާއިރާއިން މަރުކަޒަށް ބޭނުންވާ ކަންކަންވިޔަސް ޖުމްލަކޮށް ރަށުގެ ކުދިބޮޑު އެންމެންގެ އުންމީދުތައް ހަގީގަތަކަށް ހަދައިދިނުމަށް މިއަޒުމް އޮތްކަން ދަންނަވަން." ރައީސުލްޖުމްހޫރިއްޔާ ވިދާޅުވިއެވެ.
ރައީސް ވިދާޅުވީ ޤައުމިއްޔަތު އިސްކަންދޭނަމަ އުތީމު ގަނޑުވަރު ބެލެހެއްޓެންޖެހޭކަމަށާއި، އަސްލުވަންތަކަން ދަމަހައްޓަންޖެހޭކަމަށެވެ. އެކަން ކުރައްވާނެކަމަށާއި، އެންމެ އިސްކަންދީގެން ޤައުމީ ވިސްނުމުގައި ކޮށްދޭންޖެހޭ ހުރިހާ ކަމެއްކުރައްވާނެކަމަށް ރައީސް ވިދާޅުވިއެވެ.
އެކަމަށް ބޭރުގެ އެހީއެއްވެސް ހަމަޖެހިފައިވާ އޮތްކަން ފާހަގަކުރައްވާ ރައީސް ވިދާޅުވީ ޤައުމީ ބިނާތަކުގެ އަސްލު ނުގެއްލޭނެހެން އެކަންކަން ކުރައްވާނެކަމަށާއި، ޤައުމީ ދުވަސް ފާހަގަކުރާއިރު، ކުރިއާ ޚިލާފަށް އެމަނިކުފާނުގެ ވިސްނުމަކީ މަޝްރޫޢުއެއްގެ ގޮތުގައި ކުރިއަށް ގެންދިއުންކަމަށެވެ.
"އަޅުގަނޑު ބޭނުންވަނީ ގަނޑުވަރާ މުހިންމު ތަންތަނާ ތާރީޚީ ތަންތަން ހިމާޔަތްކޮށް، ޤައުމީ ވިސްނުމުގައި ޕްރޮގްރާމްތައް ހިންގައި ޤައުމީ މަޝްރޫޢުއެއްގެ ގޮތުގައި ކަންކަން ކުރަން. އެކަމަށް ބާރެއްގެ ގޮތުގައި މިހާތަނަށް ސަރުކާރުތަކުން ނުދޭ ސަމާލުކަން ދީގެން، މިއަހަރާ އަންނަ އަހަރު ޤައުމީ ދުވަސް ޤައުމީ ފެންވަރުގައި މިރަށުގައި ފާހަގަކުރާނަން. އަޅުގަނޑު ގަސްތުކުރަނީ ޤައުމީ މަޝްރޫޢޫގެގޮތުގައި އެކަން ހިންގަން. ނަތީޖާއަކީ އެއީ އަޅުގަނޑުމެންގެ ޤައުމީ ފިކުރުގައި ކޮށޭ މަގެއްގެ ގޮތުގައި." ރައީސުލްޖުމްހޫރިއްޔާ ވިދާޅުވިއެވެ.
މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ޤައުމީ ދުވަސް ޤައުމީ ފެންވަރުގައި 2 އަހަރު އުތީމުގައި ފާހަގަކުރެއްވުމަށް ނިންމަވާފައިވާކަން އިޢުލާންކުރައްވާ، މިއަހަރުގެ ޤައުމީ ދުވަހު އުތީމަށް ވަޑައިގަތުމަށް އުންމީދުކުރައްވާކަމަށް ވިދާޅުވެފައެވެ.