ގދ. ތިނަދޫގައި ސަރުކާރުން ތަރައްޤީކުރާ 200 ރޯހައުސްއަށް ކުރިމަތިލުމުގެ ފުރުޞަތު ހުޅުވާލައިފި

ގދ. ތިނަދޫގައި ސަރުކާރުން ތަރައްޤީކުރާ 200 ރޯހައުސްއަށް ކުރިމަތިލުމުގެ ފުރުޞަތު ހުޅުވާލައިފިއެވެ.

ތިނަދޫ ސިޓީ ކައުންސިލުން ވިދާޅުވީ ޔުނިޓްތަކަށް ކުރިމަތިލުމަށް ހުޅުވާލާފައިވަނީ، ކައުންސިލްގެ އޮންލައިން ހައުސިން ޕޯޓްލްގެ ތެރެއިންކަމަށެވެ.

ގދ. ތިނަދުއަކީ 7500 އަށްވުރެ ބޮޑު އާބާދީއެއް އޮންނަ ރަށެކެވެ. ރަށަށް ދިމާވެފައިވާ ބޯހިޔާވަހިކަމުގެ މައްސަލައަށް ރިޢާޔަތްކޮށް އެރަށުގައި 200 ރޯހައުސް ތަރައްޤީކުރުމުގެ މަޝްރޫޢު ފަށާފަވަނީ 2022 ވަނަ އަހަރުއެވެ. މިއީ ޖާގަ ތަނަވަސް 3 ކޮޓަރީގެ ރޯހައުސްތަކެކެވެ.

ތިނަދޫގައި 200 ހައުސިން ޔުނިޓް އަޅަން ސިއެރާ ކޮންސްޓްރަކްޝަނާއި ހަވާލުކޮށްފައިވަނީ ސްޓާ ކޮންސްޓްރަކްޝަންގެ ޖޮއިންޓް ވެންޗާއާއެވެ. މި ހައުސިން ޔުނިޓުތައް އަޅަން ހަމަޖެހިފައިވަނީ 700 އަކަފޫޓުގެ ޖާގައެއްގައި ދެ ފަންގިފިލާގެ ރޯހައުސްތަކެއްގެ ގޮތުގައެވެ. ތިން ކޮޓަރާއި ތިން ފާހަނާ، ސިޓިން ރޫމް، ކާގެ އާއި ބަދިގެ، ލޯންޑްރީ އަދި ގުދަނެއް ކޮންމެ ރޯ ހައުސެއްގައި ހުންނާނެއެވެ.

އެ ހައުސިން ޔުނިޓުތަކުގައި ދިރިއުޅޭ ރައްޔިތުންގެ ފަސޭހައަށާއި ހިތްހަމަޖެހުމަށް އެ ސަރަހައްދުގައި ޕާކަކާއި ވެހިކަލް ޕާކިން ޒޯނެއް ޤާއުމުކުރާނެއެވެ. އަދި ކޮންމެ ހައުސިން ޔުނިޓެއްގައި ބޭރު ފެންނާނެހެން ބެލްކަންޏެއްވެސް ހުންނާނެއެވެ.

ތިނަދޫ ސިޓީ ކައުންސިލުން ވިދާޅުވީ ހައުސިން ޔުނިޓްތަކުގެ ކޮންކްރީޓް ހުރިހާ މަސައްކަތްތަކެއްހެން ނިމިފަވާކަމަށެވެ. މިވަގުތު ކުރަމުންދަނީ ޔުނިޓްތަކުގެ ފުރާޅުގެ މަސައްކަތްތައްކަމަށާއި އޭގެ %20 މަސައްކަތް ނިމިފަވާކަމަށްވެސް ކައުންސިލުން ފާހަގަކުރެއެވެ.

ސިޓީ ކައުންސިލުން ވިދާޅުވީ ޕްރޮޖެކްޓްގެ ހުރިހާ މަސައްކަތްތައް މިއަހަރުގެ ޖުލައިމަހުގެ ނިޔަލަށް ނިމޭވަރަށް، އަވަސް ސްޕީޑްގައި މަސައްކަތްތައް ކުރިއަށްދާކަމަށެވެ.

ތިނަދޫ ސިޓީ ކައުންސިލުން ވިދާޅުވީ ހައުސިން ޔުނިޓްތަކަށް ކުރިމަތިލުމުގެ ފުރުޞަތު، ކައުންސިލްގެ އޮންލައިން ހައުސިން ޕޯޓަލް މެދުވެރިކޮށް ހުޅުވާލާފަވާކަމަށެވެ. ޔުނިޓްތަކަށް ކުރިމަތިލުމާ ގުޅޭ އުސޫލުވެސް ވަނީ ގެޒެޓުކޮށްފައެވެ.

މި ހައުސިން ސްކީމްގައި 3 ކެޓަގަރީއެއް ހިމެނެއެވެ. މީގެތެރޭގައި ތިނަދޫގެ ރައްޔިތުންނަށް ޚާއްސަ ކެޓަގަރީއާއި ތިނަދޫގެ ދަފްތަރު އަދި ތިނަދޫ ސިޓީއަށް ރަށްވެހިކަން ބަދަލުކޮށްފަވާ މީހުންގެ ކެޓަގަރީ އަދި ތިނަދޫގެ އާބާދީ އިތުރުކުރުމުގެ ސިޔާސަތުގެދަށުން ތިނަދޫ ސިޓީއަށް ހިޖުރަ ކުރަން ބޭނުންވާ ފަރާތްތަކަށް ޚާއްސަ ކެޓަގަރީ ހިމެނެއެވެ.

ހައުސިން ޔުނިޓްތައް ދިނުމުގެ މަސައްކަތް ވިލަރެސްކޮށް، ޔުނިޓް ލިބޭ މީހުން ކަނޑައަޅާނީ އެކަމަށް ޚާއްސަކޮށް އެކުލަވާލާ ކޮމިޓީއަކުންނެވެ. ގެޒެޓުކޮށްފަވާ އުސޫލުގައި ވަނީ އެކި ކެޓަގަރީތަކުން ހުށައަޅަންޖެހޭ ލިޔެކިޔުންތަކާ އަދި މާކްސް ދޭ ގޮތުގެ ތަފްސީލްތައްވެސް ހިމަނާފައެވެ. ސިޓީ ކައުންސިލުން ވިދާޅުވީ ރޯހައުސްތަކަށް އެދި ކުރިމަތިލުމުގެ ފުރުޞަތު، އޭޕްރިލް މަހުގެ 30ވަނަ ދުވަހުގެ ނިޔަލަށް ހުޅުވާލާފަވާކަމަށެވެ.

ތިނަދޫގައި 200 ރޯހައުސް ތަރައްޤީކުރުމުގެ ޕްރޮޖެކްޓަކީ ސަރުކާރުގެ ޕީއެސްއައިޕީ ބަޖެޓުން 540 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ.