ލަންކާއަށް އެހީވުމަށް ޕީއެސްއެމުން އިސްނަގައިގެން ޓެލެތޯނެއް

ބާރުގަދަ ތޫފާނެއް ކަމުގައިވާ ދިތުވާއާ ގުޅިގެން އަވަށްޓެރި ސްރީލަންކާއަށް ކުރަމުންދާ ވިއްސާރައިގައި އެޤައުމަށް ބޮޑެތި ގެއްލުންތަކެއްވެ އެތައްބަޔަކު މަރުވެ އެތައްބަޔަކު ޙާލުގައި ޖެހިފައިވާތީ، އެޤައުމަށް އެހީތެރިވުމުގެ ގޮތުން ޚާއްސަ ޓެލެތޯނެއް ކުރިއަށްގެންދިޔުމަށް ޕަބްލިކް ސަރވިސް މީޑިއާ (ޕީއެސްއެމް)އިން ނިންމައިފިއެވެ.

މި ޓެލެތޯން ކުރިއަށް ގެންދަން ނިންމާފައިވަނީ މާދަމާ 30 ނޮވެންބަރު 2025ވާ އާދީއްތަ ދުވަހު ހެނދުނު 9:00އިން މެންދަމު 1:00އަށެވެ.

ސްރީލަންކާއަކީ ޒަމާނުއްސުރެ ދިވެހިރާއްޖެއާ ނުހަނު ގާތް ރަޙުމަތްތެރި ޤައުމެކެވެ. އަދި އެޤައުމުގެ ރައްޔިތުންނަކީ ދިވެހިންނާ ވަރަށް ގާތްގުޅުންތަކެއް ބާއްވާ އެކުވެރި ބައެކެވެ. ރާއްޖޭން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ޤައުމަކީވެސް އަވަށްޓެރި އެކުވެރި ސްރީލަންކާއެވެ.

ޕީއެސްއެމުން ވިދާޅުވީ ލަންކާއަށް ކުރިމަތިވެފައިވާ ހިތާމަވެރި ޙާލަތުގައި ދިވެހިންނަށް ދެވެން އޮތް ކޮންމެ އެހީތެރިކަމެއް ދިނުން މުހިއްމު ކަމަށެވެ.

މާދަމާގެ މި ޓެލެތޯނުގައި ޕީއެސްއެމްއާއި ބައިވެރިވުމަށް ރާއްޖޭގެ ހުރިހާ ނޫސް މީޑިއާތަކަށް ވަނީ ދަޢުވަތުދީފައެވެ. އަދި މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށް، ޖަމްޢިއްޔާ، ޖަމާޢަތް، ކްލަބްތަކާއި އޮފީސްތައް ފަދަ ހުރިހާ ތަންތަނަށްވެސް އޮތް ކަމަށް ޕީއެސްއެމުން ވިދާޅުވެއެވެ.

ޓެލެތޯން ކުރިއަށް ދާނެގޮތުގެ އިތުރު ތަފްސީލް މިއަދާއި މިރޭ ޕީއެސްއެމް އިން ހާމަކުރަމުން ގެންދާނެއެވެ.