އިންޑިއާ ފަތުރުވެރިންގެ މެދުގައި ރާއްޖެއަށް އޮތް މަޤްބޫލުކަން އިތުރުވަމުން އަންނަ ކަމަށް ސަރވޭއަކުން ދައްކައިފިއެވެ.
ފްލައިޓު އަދި ހޮޓާތަކުގެ މައުލޫމާތު ފޯރުކޮށްދޭ 'ސްކައިސްކޭނަރސް"އިން ކުރިއަށް ގެންގޮސްފައިވާ ސަރވޭއިން ދައްކާގޮތުން ރާއްޖެއަށް ދަތުރުކުރާ ފްލައިޓްތަކާއި ގުޅޭގޮތުން އެ ވެބްސައިޓުގައި މައުލޫމާތު ސާފުކޮށްފައިވާ ފަރާތްތަކުގެ އަދަދު ވަނީ ވަރަށް ބޮޑުތަން އިތުރުވެފައެވެ. އެގޮތުން މިދިޔަ އަހަރުގެ ފުރަތަމަ ހަމަސް ދުވަހާއި އަޅާބަލާއިރު މިއަހަރުގެ ފުރަތަމަ ހަމަސްދުވަހު އެ އަދަދު ވަނީ ތޭރަ އިންސައްތަ އިތުރުވެފައެވެ.
އެ ސަރވޭއިން ދައްކާގޮތުން އޮން އަރައިވަލް ވިސާ ލިބޭ ޤައުމުތަކަށް އިންޑިއާ ފަތުރުވެރިންދާން ޝައުގުވެރިކަން ހުރެއެވެ، އެގޮތުން ބޫޓާން، ދިވެހިރާއްޖެ، މޮރީޝަސް، އިންޑޮނޭޝިއާ އަދި ސީޝެލްސް ފަދަ ޤައުމުތަކަކީ އިންޑިއާ ފަތުރުވެރިންގެ މެދުގައި މަޤްބޫލް މަންޒިލްތައްކަން ސަރވޭއިން ވަނީ ފާހަގަވެފައެވެ.
ރާއްޖޭގެ ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އިންޑިއާގެ ފަތުރުވެރިންގެ އަދަދު އަންނަނީ އަހަރަކަށް ވުރެ އަހަރެއް އިތުރުވަމުންނެވެ. އެގޮތުން މިއަހަރުގެ ފުރަތަމަ 6 މަސްދުވަހުގެތެރޭ އިންޑިއާއިން ރާއްޖެއަށް ތިރީސް ހަތަރުހާސް އަށްސަތޭކަ އަށްޑިހަ ހަތަރު ފަތުރުވެރިން ޒިޔާރަތްކޮށްފައިވެއެވެ. މިއީ، މިދިޔަ އަހަރުގެ އެމުއްދަތާ އަޅާ ބަލާއިރު، އެކާވީސް ޕޮއިންޓް ފަހެއް އިންސައްތަ އިތުރު އަދަދެކެވެ.