ރާއްޖޭގެ ޤައުމީ އެއަރލައިން މޯލްޑިވިއަނުން އަންނަނީ ޗައިނާގެ 7 ސިޓީއަކަށާއި، އިންޑިއާގެ ޓްރިވެންޑްރަމާއި ޗެންނާއީ، ބަންގްލަދޭޝްގެ ވެރިރަށް ޑާކާ އަދި ތައިލެންޑްގެ ވެރިރަށް ބެންކޮކަށް ޝެޑިއުލް ދަތުރުތައް ކުރަމުންނެވެ. މީގެ އިތުރުން ރާއްޖޭގެ 9 މަންޒިލަކަށް މޯލްޑިވިއަންގެ ދަތުރުތައް ކުރެއެވެ.
މޯލްޑިވިއަނުން ދަތުރުތައް ކުރާ މަންޒިލްތަކުގެ ތެރެއިން އިންޑިއާ އަކީ އަބަދުވެސް ޑިމާންޑް ބޮޑު މަންޒިލެއްގެ ގޮތުގައި އެއަރލައިނުން ފާހަގަކުރެއެވެ. އިންޑިއާ އަކީ ރާއްޖެއަށް ގިނަ އަދަދެއްގެ ފަތުރުވެރިން ޒިޔާރަތްކުރާ މަންޒިލަކަށް ވުމާއި އެކު އިންޑިއާގެ އިތުރު ހިސާބުތަކަށް މޯލްޑިވިއަންގެ ދަތުރުތައް ފެށުމަށް އެކަމާއި ގުޅޭ ދިރާސާތައް ފައްޓަވާފައިވާ ކަމަށް އައިލެންޑް އޭވިއޭޝަނުން ހާމަކުރެއެވެ.
އިންޑިއާގެ ނިއުދިއްލީގައި ބޭއްވުމަށް ހަމަޖެހިފައިވާ މޯލްޑިވްސް އިންވެސްޓްމަންޓް ފޯރަމްގެ އެއަރލައިން ޕާރޓްނާރަކީ މޯލްޑިވިއަން ކަމުގައިވާ އިރު، އެ ފޯރަމްގެ ތެރެއިން އެކަމާއި ގުޅޭ މަޝްވަރާތައް އިންޑިއާގެ ޓުއަރ އޮޕަރޭޓަރުންނާއި އެކު ކުރުމަށް ހަމަޖެހިފައިވާ ކަމަށް އައިލެންޑް އޭވިއޭޝަންގެ ހެޑް އޮފް އޮޕަރޭޝަންސް އަލީ ނަޝާތު ވިދާޅުވިއެވެ. އަދި އަންނަ އަހަރުތެރޭ އިންޑިއާގެ އިތުރު މަންޒިލަކަށް މޯލްޑިވިއަންގެ ދަތުރުތައް ފެށިގެންދާނެ ކަމަށް ނަޝާތު ވިދާޅުވިއެވެ.
މޯލްޑިވިއަންގެ މަތިންދާ ބޯޓު ފްލީޓުގައި މިހާރުވެސް ޑޭޝް 8 މަރުކައިގެ 8 މަތިންދާ ބޯޓު އޮވެއެވެ. މޯލްޑިވިއަނުން ޑޭޝް 8 މަރުކާގެ މަތިންދާ ބޯޓުތައް ބޭނުންކުރަމުން އަންނަނީ ރާއްޖޭގެ އެތެރޭގެ އުދުހުންތަކުގައާއި އިންޑިއާގެ ޓްރިވެންޑްރަމަށް ދަތުރުތައް ކުރުމަށެވެ. މޯލްޑިވިއަނުން މިހާރު ވަނީ ޑޭޝް 8މަރުކައިގެ އިތުރު މަތިންދާ ބޯޓެއް ގެނައުމަށް ނިންމާފައެވެ. އެގޮތުން މިއަހަރުގެ ޑިސެމްބަރ މަހުގެ ތެރޭ ޑޭޝް 8 މަރުކާއިގެ ބޯޓެއް ރާއްޖެ ގެނައުމަށް ހަމަޖެހިފައިވާ ކަމަށް ނަޝާތު ވިދާޅުވިއެވެ. އަދި މި އަހަރު ނިމޭއިރު، ސީ ޕްލޭން ފްލީޓާއި އެކު، މޯލްޑިވިއަންގައި އުދުހުމަށް ބޭނުންކުރާ ބޯޓުތަކުގެ އަދަދު ދިހަ އަކަށް އަރާނެ ކަން ނަޝާތު ފާހަގަކުރެއްވިއެވެ.
މޯލްޑިވިއަނުން ވަނީ މިއަހަރުގެ ތެރޭ ޗައިނާގެ ޗެންޑޫއަށް އެއަރލައިންގެ ދަތުރުތައް ފަށާފައެވެ. ޗެންޑޫއަކީ މޯލްޑިއަނުން ދަތުރުތައް ފެށި ޗައިނާގެ ހަތްވަނަ ސިޓީއެވެ.