މޯލްޑިވްސް ފިޝަމަންސް އެސޯސިއޭޝަނުން ރާއްޖޭގެ ސްކޫލްތަކުގައި ފެށުމަށް ރާވާފައިވާ ޔަންގް ފިޝަރސް ކްލަބްގެ ސްޕޮންސަރިންގ ޕާރޓްނަރއެއްގެ ގޮތުގައި ދިރާގު ހަމަޖައްސައި އެކަމުގެ އެއްބަސްވުމުގައި ސޮއިކޮށްފިއެވެ. މި އެއްބަސްވުމުގައި ދިރާގުގެ ފަރާތުން ސޮއިކުރެއްވީ އެކުންފުނީގެ ޗީފް މާކެޓިންގ އޮފިސަރ އީޒަބެލް ހާޖްރީއެވެ. އަދި މޯލްޑިވްސް ފިޝަމަންސް އެސޯސިއޭޝަންގެ ފަރާތުން ސޮއިކުރެއްވީ އެ އެސޯސިއޭޝަންގެ ސެކްރެޓަރީ ޖެނެރަލް އަބްދުﷲ ޝާކިރު މުޙައްމަދެވެ.
ދިރާގުން ޔަންގް ފިޝަރސް ކްލަބުގެ ޑިވެލޮޕްމެންޓް ޕާރޓްނަރެއްގެ ގޮތުން ބައިވެރި ވީ މި ކްލަބު ގެ ދަށުން ރާއްޖޭގެ އެކި ހިސާބު ތަކުގައި ދިރިއުޅޭ ޒުވާނުންނަށް މަސްވެރި ކަމުގެ ދާއިރާއިން ތަފާތު ތައުލީމީ ފުރުސަތުތަށް ހޯދައިދިނުމުގެ ބޭނުމުގައިކަމަށް ދިރާގުން ބުނެއެވެ.
ދިރާގުން ބުނީ މި އެއްބަސްވުމުގެ ދަށުން މި ކްލަބްގެ ފަރާތުން ދަރިވަރުންނަށާއި، ޓީޗަރުންނަށް ހިންގާ ތަފާތު ޙަރަކާތްތައް ހިންގުމުގައި ދިރާގުގެ ފަރާތުން މާލީ އަދި ފަންނީ އެހީތެރިކަން ފޯރުކޮށްދޭނެކަމަށެވެ. އެގޮތުން ކޮމިއުނިކޭޝަން އާއި ޓެކްނޮލޮޖީއާއި ގުޅޭ ތަފާތު ހަރަކާތްތައް ހިންގުމުގައި ދިރާގުގެ ފަރާތުން އެހީތެރިކަން ފޯރުކޮށްދިނުމަށް ހަމަޖެހިފައިވެއެވެ.
ޔަންގް ފިޝަރސް ކްލަބަކީ މަސްވެރިކަމާއި، މަސްވެރިކަމާއި ގުޅުންހުރި ތަފާތު ދާއިރާތަކާއި، ކަނޑުތަކުގެ ތިމާވެށްޓާއި ގުޅޭގޮތުން ދަރިވަރުން ހޭލުންތެރިކޮށް އެ ދާއިރާތަކުން ބޭނުންވާ ހުނަރާއި، ތަމްރީން ފޯރުކޮށްދިނުމަށް ސްކޫލްތަކުގައި ހިންގުމަށް ހަމަޖެހިފައިވާ ޚާއްޞާ ކްލަބެކެވެ. އެގޮތުން އެކްލަބްގެ ޙަރަކާތްތަކުގެ ތެރޭގައި، ތިމާވެއްޓާއި، ދެމެއްޓެނިވި މަސްވެރިކަމާއި، ކަނޑުމަތީގެ ސަލާމަތާއި ރައްކާތެރިކަމާއި، ނިޔަމިކަމާއި، މުވާޞަލާތީ ތަފާތުން ކަންތައްތަކާއިގުޅޭގޮތުން އެކިއެކި ޙަރަކާތްތައް ހިންގުން ހިމެނެއެވެ.