ރާއްޖެ އިޝްތިހާރުކުރުމުގެ މަސައްކަތަށް ބޭނުންވާ ފޮޓޯ ނަގައިދޭނެ މީހުން ހޯދުމަށް އެމްއެމްޕީއާރުސީން އިޢުލާންކޮށްފިއެވެ.
އެގޮތުން އެއް އަހަރު ދުވަހުގެ މުއްދަތަށް 5 ފޮޓޯގްރާފަރުން ހޯދަން އެ ކޯރޕަރޭޝަނުން އިޢުލާންކޮށްފައިވެއެވެ. އެމް.އެމް.ޕީ.އާރު.ސީ. ފޮޓޯގްރަފީ އެމްބެސެޑާރސް ޕްރޮގްރާމުގެ ނަމުގައި ކުރިއަށްގެންދާ މި ޕްރޮގްރާމަށް ހޮވޭ ފަރާތްތަކަށް 4 ތީމަކަށް ފޮޓޯ ނަގަން ޙަވާލުކުރަން ހަމަޖެހިފައިވާ ކަމަށާއި، ކޮންމެ ފޮޓޯގްރާފަރަކަށް ޙަވާލުކުރާނީ ދެ އެސައިންމެންޓު ކަމަށް އެމްއެމްޕީއާރުސީން ހާމަކުރެއެވެ. ފޮޓޯގުރާފަރުން މިޕްރޮގްރާމުގައި ނަގާ ފޮޓޯތައް ދައްކާލުމަށް އެގްޒެބިޝަނެއް ބޭއްވުމަށް އެމްއެމްޕީއާރުސީން އެހީވުމަށްވެސް ވަނީ ހަމަޖެހިފައެވެ.
މި ޕްރޮގްރާމްގައި ބައިވެރިވުމަށް ޝައުޤުވެރިވެރިވާ ފަރާތްތަކުން މިމަހުގެ 20 ވަނަ ދުވަހު އެކޯޕަރޭޝަނުން މަޢުލޫމާތު ސާފުކުރުމަށްފަހު، މިމަހުގެ 28ވާ އަންގާރަ ދުވަހު އެކޯޕަރޭޝަނަށް ޕްރޮޕޯސަލް ހުށައަޅަންވާނެ ކަމަށް އެމްއެޕީއާރުސީން ބުނެއެވެ. މަޢުލޫމާތު ސާފުކުރުމަށް ނާންނަ ފަރާތްތަކުގެ ޕްރޮޕޯސަލް ބަލައިނުގަންނާނެ ކަމަށްވެސް އެމްއެމްޕީއާރުސީން ހާމަކުރެއެވެ.